Með taugarnar þandar ...

„Jæja,“ sagði Tommi jákvæður þegar við ókum framhjá tómri sætukarlastoppistöðinni. „Það hlýnar með þessu roki.“ Hann var að hlusta á veðurfregnirnar á Rás 2.

„Okkur verður þá ekki kalt þegar við fjúkum út af,“ sagði ég enn jákvæðari.

„Voða gálgahúmor er þetta,“ sagði Ásta og hnussaði hneyksluð.

„Ja, við verðum ekki úti í svona hita, Ásta mín,“ sagði Tommi vingjarnlega.

Ég bjóst við hinu versta þegar við komum út úr göngunum en merkilegt nokk, það var bara allt í lagi, enda fóru hviðurnar bara upp í 27 m/sek. Ég gat samt alveg sungið í huganum með GCD í útvarpinu: "Með taugarnar þandar, tra la la la la ..."                         Ásta plataði mig svolítið, hún heilaþvoði mig til að fara út í Ártúni um leið og allir hinir. Þetta flýtti för Ástu á Landspítalann um 2 mínútur en hjá mér tók við bið dauðans ... í heilar 14 mínútur í allt of vel loftræstu biðskýli. Fyrst kom lítið kvikindi (nr. 18), reyndar of snemma en strætóinn sem var á leiðinni, fullur af farþegum, hafði bilað og þetta var aukavagn. 

Vegna fegurðar minnar bauð bílstjórinn mér að bíða í vagninum þangað til bilaði vagninn kæmi. Ég gat því valið um sæti. Eftir nokkra bið komu hinir farþegarnir óttaslegnir á svip, enda hafði verið afar undarlegt aukahljóð í strætó alla leiðina neðan úr bæ. Konan sem settist við hliðina á mér í Ártúni var í spjallstuði og sagði mér allt um óhljóðin í strætó. Ég vildi toppa þetta og sagði henni allt um vindhviðurnar á Kjalarnesi. Þegar við beygðum upp í Árbæ vorum við orðnar perluvinkonur. Hún býr í miðbænum og fór að tala illa um háhýsin við sjávarsíðuna. Hún hafði fulla trú á því að orkan frá hafinu sem feykti slæmum hlutum á brott væri hindruð af stóru húsunum við ströndina. Lætin í miðbænum ... þarf að segja meira? Mér fannst þetta mjög athyglisvert og á stoppistöðinni við Prentmet, þar sem hún fór út, tókumst við í hendur, agalega ánægðar með þessu stuttu kynni.

Voðalega missir fólk af miklu með því að keyra þessar blikkbeljur sínar í stað þess að geta spjallað hvert við annað í strætó, kynnst nýju fólki á hverjum degi, lært útlensku, notið útsýnis og ýmislegt fleira. Öllum finnst kúl að taka strætó eða lest í útlöndum ... ekki hér heima, er það kannski veðrið, strjálar ferðir eða þessi gamli, algjörlega fáránlegi misskilningur að það sé bara ljótt fólk og lúserar sem taka strætó?

Athugasemdir

[Kjartan Pálmarsson, 1.10.2007 kl. 09:40]

Þú ert fyrir löngu búin að afsanna það að það sé bara ljótt fólk og lúserar sem taka strætó

[Kristín Katla Árnadóttir, 1.10.2007 kl. 11:50]

Þú er alveg frábær elsku Gurrí mín.

[María Anna P Kristjánsdóttir, 1.10.2007 kl. 11:57]

Bara eins og akandi félagsmiðstöð,það ætti kannski að bjóða upp á strætóferðir alla nóttina frá miðbæ Reykjavíkur um helgar til að koma börnunum heim á skikkanlegum tíma

[krossgata, 1.10.2007 kl. 12:18]

Eru þá ekki slæmir inn til landsins og allt vaðandi í ofbeldi þar, þar sem engin sjávarorka kemur?  Ég man eftir einum þvagleggjara inn til landsins svona þegar ég reyni svolítið á minnið.

[Ólöf Anna , 1.10.2007 kl. 12:26]

Dam u!! Nú er laglínan "með taugarnar þandar" á háa c-inu límd á heilann minn.

En gott að heyra að þú komst heil í borg óttans

[Rannveig Lena Gísladóttir, 1.10.2007 kl. 12:42]

Þegar að ég bjó í borg óttans og syndanna þá var það stundum helgarskemmtun hjá mér og börnunum eða fara í smá ferðalag með strætó.  Þeim fannst þetta alltaf jafn gaman. 

En að nota hann á hverjum degi til að koma börnum á leikskóla og mér í vinnu hefði tekið mig rúmlega klst lengur heldur en að fara á blikkdósinni minni... sem tók þó ansi langan tíma.

Núna bý ég bara í "sveitinni" og naut þess í botn í morgun að labba með börnunum í skóla í morgun og svo áfram í vinnuna... og það tók bara uþb 10 mínútur í fáránlega miklu roki!

[Jenný Anna Baldursdóttir, 1.10.2007 kl. 14:35]

Kostirnir við að taka almenningsvagn eru ótvíræðir.  Það hefur þú kennt mér kona góð.  Knús í daginn.

[Magnús Geir Guðmundsson, 1.10.2007 kl. 17:59]

´Hví í ósköpunum hafa forsvarsmenn Strætó Byggðasamlags, ekki notað höfuð sín og ráðið þig sem sérstakan áróðursfulltrúa, göfuga fröken Guðríður Haraldsdóttir!?

[Glúmur Gylfason (IP-tala skráð) 1.10.2007 kl. 21:48]

Sem blaðamaður hefðir þú þurft að vera í vagninum sem bilaði. Stórkostleg lífsreynsla að lend í því í Róm. Tók vagninn 5 mínútur að stöðvast alveg til fulls. Rykkir og  drunur í 5 mínútur, þá STOPP. Allir kaddlar þurftu að segja sína skoðun - líka með útlimum: "Þetta er diskurinn". "Nei hann er sjálfskiptur". "Bensínstífla". "Nei þetta er Diesilbíll........ "

[Ólöf Anna , 1.10.2007 kl. 22:10]

[Svava S. Steinars, 1.10.2007 kl. 23:28]

hmm, hvar er sætukarlastoppustöðin ? Ég þarf að skoða hana

[Þröstur Unnar, 1.10.2007 kl. 23:41]

Hún er þar sem við "sætukarlanir" keyrum framhjá á stóru jeppunum okkar og vorkennum konunum sem hírast þar í votviðrinu, en það er alltaf svo lítið pláss í sætunum fyrir drasli ,Svava. 

[Jóna Á. Gísladóttir, 1.10.2007 kl. 23:54]

Þú hlýtur að vera á prósentum hjá bus.is gurrí mín

[Þröstur Unnar, 1.10.2007 kl. 23:58]

Sko, hún situr örugglega niðri á Galito að gúffa í sig Tandorri kjúlla.

[Guðríður Hrefna Haraldsdóttir, 2.10.2007 kl. 08:29]

Vá, hér var sofnað snemma í gær og ekkert vaknað fyrr en 13-14 tímum síðar. Það verður bloggað um hádegisbil, fyrst þarf að fara í sjúkraþjálfun.

[Saumakonan, 2.10.2007 kl. 08:46]

Bara 27m/sek???????    Miðað við reynsluna sem ég fékk við að  keyra heim fyrir viku síðan held ég mig HEIMA ef hviðurnar eru yfir 15!!!! Ekki einu sinni lokk um verslunarferð myndi draga mig út að keyra í svona veðri aftur!!!!