Læknisraunir Ástu&son, lífshætta og heitavatnsleysi!

Ásta sagði mér læknisfarir sínar ekki rennisléttar á leiðinni í bæinn með drossíunni hennar. Hún fór til læknis nýlega út af verkjum í mjöðm og gerði þau mistök að taka unglingsson sinn með ... en stráksi hafði slasað sig og verið til meðferðar hjá þessum sama lækni. Læknirinn trylltist yfir því að hún "reyndi að fá tvo fyrir einn" á svona ósvífinn hátt svo að barnið hrökklaðist fram og næstu fimm mínútur af tíu mínútna tímanum fóru í að læknirinn fann hitt skiptið sem Ásta mætti með barn með sér (án þess að gerð væri athugasemd við það þá). Ásta var reyndar ekki að spara peninga með þessu, heldur tíma og hefði glöð greitt annan 4.000 kall og sloppið við svona leiðindi. Verkir í mjöðmum reyndust vera bólgur í vöðvafestum og ekki séns að hún fengi sjúkraþjálfun eða bólgueyðandi ... óver his dedd boddí. Hún skyldi bara fara að hreyfa sig.

Ég vorkenni lækninum mest að hafa ekki getað sagt hryssingslega að Ásta ætti að fara í megrun og hætta að reykja, því miður, hans vegna er Ásta tággrönn, reyklaus og fer í minnst klukkutíma gönguferð á dag.

Sonur Ástu hringdi í næsta símatíma læknisins og kvartaði yfir bólgnum fæti og sárum verkjum eftir að gifsið var tekið. "Hvað með það?" sagði læknirinn. "Ha?" hváði drengurinn. "Só vott?" endurtók doksi upp á ensku. Hann sagði honum að drullast til að fara að vinna en skrifaði reyndar vottorð fyrir hann. Hélt fyrst að Ásta væri að grínast þegar hún sagði mér þetta, þeir væru útdauðir þessir læknar sem héldu að þeir væru guð. Minnir að ég hafi einu sinni upplifað dónaskap frá eldri lækni með nefið upp í loftið. Það pirraði hann eitthvað að geta ekki sjúkdómsgreint mig.

Mér finnst læknar almennt með skemmtilegra fólki, hafa góðan húmor og taka sig ekkert of hátíðlega. Ásta var engin ástæða leiðindanna, hann er víst svona við alla, elsku guðinn.

Eldaði eina bestu súpu lífs míns í gærkvöldi og ætlaði að skella niðurskornum kjúklingabitum út í til að gera hana matarmeiri. Okkur erfðaprinsi fannst skrýtið að óútskýrða fýlan í ískápnum hvarf þegar kjúklingurinn var kominn úr honum en samt fundum við enga fýlu af kjúllanum. Ég skar bringurnar niður og skellti þeim á heita pönnu ... þá kom ísskápslyktin aftur en nú upp úr pönnunni. Við fleygðum kjúklingnum (sem ég keypti fyrir fjórum, fimm dögum, dagsetn. sást ekki) en ég þorði ekki einu sinni að reyna að lokka Jónatan máv til mín aftur með honum. Tel að við prinsinn höfum verið í lífshættu um tíma í gær, enda hafði ég eiginlega hugsað mér að skella hráum kjötbitunum beint út í súpuna og láta þá malla þar ...

Í dag verður ljósmyndataka og ég hata myndatökur, enda er ég oftast eins og vélsagarmorðingi á myndum, sérstaklega á debitkortinu mínu. Getur Vikan ekki notað þessa sjö ára gömlu mynd af mér sem er t.d. hér á blogginu? Nei, það þarf að festa hverja nýja hrukku og hverja nýja fitufellingu á filmu fyrir komandi kynslóðir ... sem er þannig séð allt í lagi, hrukkur eru smart og fellingar kúl, það er bara þetta attitjút hjá ljósmyndurum að þurfa að láta mann brosa, ég þoli ekki að brosa, finnst það ömurlegt ... fólk hræðist mig ekki brosandi og missir alla virðingu fyrir mér ef ég brosi ... arggg

Í gærkvöldi ætlaði ég að gera mig óhugnanlega fallega og lita hárið á mér dekkra fyrir komandi myndatöku. En það var heitavatnslaust í himnaríki!! Hvernig er hægt að gera mér þetta á svona mikilvægum tímamótum? ANNA!!! Hvernig getur Orkuveitan útskýrt þetta? Var búin að blanda litinn sem bíður víst enn hristur en opnaður inni á baði, hlýtur að vera orðinn ónýtur. Kostaði BARA 2.000 kall. Ég er því með brúnt hár í dag, ekki dökkbrúnt. Mútaði reyndar Róberti snillingsmeistara með fimmtíukalli til að setja mig í fótósjopp. Hann mun án efa gefa rétta mynd af guðdómlegu innræti mínu. Myndin til vinstri sýnir hvað ég myndast hræðilega illa svona dagsdaglega, enda ekki með dökkbrúnt hár í þetta skiptið.

P.s. Ætli liturinn sé ekki ónýtur? Kannski bjartsýni að reyna að nota hann ... þ.e.a.s. ef heita vatnið verður komið í kvöld.

Athugasemdir

[Gunna-Polly, 3.10.2007 kl. 09:40]

eins gott að þú uppgötvaðir heitavatnsleysið áður en þú varst búin að setja litinn í

[Guðríður Hrefna Haraldsdóttir, 3.10.2007 kl. 10:06]

Átti nefnilega að bleyta hárið fyrst, þerra það og síðan setja litinn. Það bjargaði mér!

[Jenný Anna Baldursdóttir, 3.10.2007 kl. 10:14]

Aumingja Ásta.  Þessi læknir er búinn að setja sig í guðatölu og hefur greinilega ekki tekið kúrs í "bedside manners".

Til hamingju með háralitinn.

[krossgata, 3.10.2007 kl. 10:15]

Þvílíkar hrakfarir!   Á hrakfarir ofan.  Þú átt alla mína samúð (og Ásta) með lækninn, brosin og litinn.  En af hverju hitaðirðu ekki bara vatn í potti eða hraðsuðukatli og notaðir í litunaraðgerðir? 

[Oddný (IP-tala skráð) 3.10.2007 kl. 10:34]

Ef þú varst búin að hrista litinn saman en ekki opna hann, þá ertu heppinn ef brúsinn verður ekki sprunginn þegar þú kemur heim   Nei kannski ekki, en svona án gríns þá geta þeir samt sprungið ef of langur tími líður þangað til þeir eru opnaðir, það kom fyrir vinkonu mína. *pomm* litur út um ALLT baðherbergi    Það er ekki mælt með því að láta of langan tíma líða frá því þú hristir hann saman þar til þú notar hann. Ég er hrædd um að þú verðir bara að vera ljósbrúnhærð áfram

[Kristín Katla Árnadóttir, 3.10.2007 kl. 10:55]

Ég segi það sama og Gunna  polly knús til þín.

[Guðný Jóhannesdóttir, 3.10.2007 kl. 11:09]

Gurri, hvar er sveitaeðlið í þér, einhver hefði nú bara soðið vatn og blandað það síðan með köldu til þess að skola upp úr ;) maður á aldrei að deyja ráðalaus. Það er bannorð.

En ertu ekki líka alveg hrikalega sæt eins og þú ert, það finnst mér alla vega.

[Guðný Jóhannesdóttir, 3.10.2007 kl. 11:12]

Var greinilega ekki búin að lesa nógu vel því ég get ekki orða bundist með lækna. Ég sótti heim alls kyns lækna í níu ár og fékk ætíð að heyra að ekkert væri að mér. Einn gekk svo langt að segja að það væri ekkert að mér líkamlega!

Hitti á frábæra lækna eftir að ég flutti á Krók og í ljós kom að það sem hefur verið að hrjá mig er vefjagigt en ekki móðursýki. Mannasiður 102 er áfangi sem allir læknar þyrftu að taka og standast til þess að fá starfsréttindi.

[Valdimar Samúelsson, 3.10.2007 kl. 11:33]

Varðandi lækna ég held að þeir séu allmennt komir á þá skoðun um sjálfan sog að þeir geta ekkert, Þeir hjakka í sama fari eilíft og hlusta ekki á sjúklingin og jafnlvel gera grín og segja varstu að lesa einhvað á netinu og segja það er stórhættulegt. Það er kannski rétt enda les maður New England Jornual og mayoclinic.com ofl sem mikils metnir læknar skrifa.

[Hildigunnur Rúnarsdóttir, 3.10.2007 kl. 12:43]

einhvern veginn get ég ímyndað mér að Ásta og sonur séu búin að skipta um lækni. Þetta væri allavega feikinóg ástæða til slíks.

[Saumakonan, 3.10.2007 kl. 13:45]

Arrrrrrr "LÆKNAR" eru eitt af blótsyrðunum í mínum orðaforða... þar undantalinn elsku gigtarlæknirinn minn sem vill allt fyrir mig gera (ef hann fengi þeas)     Barðist við þessa fjanda í mörg ár en komst svo til manns sem bókstaflega bjargaði lífi mínu... án hans væri ég ekki á meðal ykkar í dag

Bíddu... var heitavatnslaust hjá ykkur líka????     Hér varð allt heitavatnslaust í gær og þegar ég hringdi til að ath málið þá var bilun í Varmaveitunni svo vatnið kólnaði þar niður.  Öll hús með fjarvarmaveitu urðu semsagt að gera sér að góðu kalt vatn þar til í gærkvöldi þegar tókst að fá upp hitann aftur. 

[Ásdís Sigurðardóttir, 3.10.2007 kl. 14:12]

Ég segi nú bara fuck the fucking doctor. svona menn eiga ekki að fá að starfa, nógu er nú erfitt að hafa sig í það að kvarta þegar eitthvað er að.  Henda manninum.  Fáum við nýja mynd þegar liturinn verður kominn í ???

[Annað viðhorf (IP-tala skráð) 3.10.2007 kl. 14:59]

Það hugsa ekki allir í peningum. Sumir bera virðingu fyrir tíma þeirra sem á eftir koma.

Eða viljum við fá ákveðinn tíma og sitja svo og bíða og bíða þar til búið er að afgreiða alla sem koma með þeim sem á pantaða tímann. Bara spyr.................

[Guðrún Jóhannesdóttir, 3.10.2007 kl. 16:41]

Gurrí, ég myndi ekki tora að nota hárlitinn eftir allan tennan tíma, hárið gæti sannarlega orðið undarlegt á litinn.

Læknar? ég toli ekki lækna!!! 

[Guðríður Hrefna Haraldsdóttir, 3.10.2007 kl. 17:58]

Mín var ánægjan, elsku Guðmundur, það var mjög gaman að fá þig og höfðinglegt af þér að bjóða okkur mæðginum út að borða!

Held að ég þori ekki að nota hárlitinn í kvöld eftir að hann var blandaður og túpan opin í sólarhring. 

Gott að fá annað viðhorf á læknablogg Ástu, auðvitað er tíminn dýrmætur líka, kurteisin hefði samt mátt vera meiri ... Held að Ásta hafi bara ætlað að biðja lækninn um að kíkja á fótinn á stráknum til að athuga hvort væri ástæða til að panta sérstakan tíma fyrir hann. 

[Sigga G. (IP-tala skráð) 5.10.2007 kl. 13:59]

Blessuð Gurrí mín.  Heldurðu ekki að hún vinkona þín sé aðeins að færa í stílinn frásögnina um læknisheimsóknina ? Ég held þetta hafi ekki verið spurning um peninga hjá þessum lækni heldur að það var pantaður tími fyrir 1 einstakling ekki 2.  Svo förum við að hittast á meðan við getum sagt að við séum fjörtíu og.......

[Guðríður Hrefna Haraldsdóttir, 5.10.2007 kl. 18:42]

Held að hún hafi aðallega verið hissa á attitjúdinu, ókurteisinni, bæði við hana og svo strákinn seinna. Eins gott að það eru engir Skagalæknar svona ... Jú, við verðum að hittast á meðan við erum bara rétt rúmlega fertugar.

Já, Anna, ég var að kalla. Er enn brúnhærð og bjútífúl, fleygði fjandans litnum, tók ekki sénsinnn svo að ég endaði ekki með fjólublátt hár. Fer fram á að OR gefi mér 2.000 króna afslátt af næsta reikningi. Sjúr.   

[Guðrún Vala Elísdóttir, 5.10.2007 kl. 19:38]

Er Oddný vinkona mín?  Þetta kom nebblega fyrir mig

[Guðríður Hrefna Haraldsdóttir, 5.10.2007 kl. 19:45]

Oddný? Ertu að meina Ástu?

[Guðrún Vala Elísdóttir, 5.10.2007 kl. 20:10]

nei sjáðu komment nr. 5

[Guðríður Hrefna Haraldsdóttir, 5.10.2007 kl. 20:13]

Úps, las of hratt yfir kommentin. Ég tók Oddnýju og fleiri svo alvarlega að ég fleygði litnum. Bíð bara þangað til hárgrisssslukonan mín litar mig í byrjun nóvember. Get verið ljósbrúnhærð þangað til. Sorrí, elsku Guðrún Vala mín.