Smitandi friðarsúla

Öldurnar hafa verið svo háværar í kvöld og leitt að geta ekki séð þær. Það hefði verið snjallt að flytja ljóskastarann í sundlauginni hér á Skaganum (þennan sem blindar mig þegar ég sit við borðstofuborðið) við Langasandinn og beina honum út að sjó. Þessu er hér með komið á framfæri. Ljóskastarinn hefur löngum angrað mig, enda fyndist mér réttara að láta hann lýsa á sundlaugarsvæðið, ekki í augu fólks í himnaríki.

Sigþóra var á miklum kagga í dag, bíl sonar síns, og bauð mér far heim. Það var skrambi notalegt. Annars var gott að hvíla í örmum Ástu í strætó í morgun en það var frekar kalt á leiðinni upp brekkuna, það er komið vettlingaveður. Ég kvíði oggulítið fyrir föstudagsveðrinu en þá verður hvasst og erfið vindátt fyrir strætó. Frekar fúlt að komast ekki heim í helgarfrí fyrir hviðum. Get fylgst vel með á www.yr.no - æðislegu veðursíðunni minni.

Held að friðarsúlan hennar Yoko Ono hafi þegar haft góð áhrif. A.m.k. gerði reykurinn úr sementsverksmiðjunni heiðarlega tilraun til að herma eftir henni og stóð þráðbeint upp í loftið þegar við Sigþóra ókum inn á Skagann í dag. Skil ekki hvers vegna fólk heldur að það sé alltaf rok hérna. Skagalognið er frægt víða um heim.  

Athugasemdir

[Halldór Sigurðsson, 10.10.2007 kl. 22:26]

Og flott mynd - blankalogn.

[Ragnheiður , 10.10.2007 kl. 22:27]

þessi mynd er voðalega falleg og friðsæl

[Ásdís Sigurðardóttir, 10.10.2007 kl. 22:40]

Þetta er nú bara yndisleg mynd, vantar bara þig í rómantískri kvöldgöngu með þessum á hvíta hestinum, hann gæti skilið hestinn eftir heima og svo haldið þið á skónum ykkar og við hækkum svo hitastigið um 30 gráður. Unaðslegt    

[krossgata, 10.10.2007 kl. 22:50]

Hrikalega flott og friðsæl mynd.  Skagalognið  hmm.  Ég hef heyrt um fagurt kvenfólk og góðar kartöflur.

[Brynja (IP-tala skráð) 10.10.2007 kl. 22:53]

Þessi mynd sýnir nú bara hvað það er kyrrlátt og fallegt hér á skaganum En vona að þú komist heim heilu höldnu fyrir helgina ef hvessir eitthvað hinu megin við göngin Annars er ég hálf fúl að komast ekki gegnum blessuð göngin í nótt vegna lokunar:/ þarf að keyra Hvalfjörðin í myrkrinu Því ég þarf að komast til keflavíkurvöll ætla að djamma með frændum okkar írum næstu 4 daga hafið góða helgi öll

[Guðríður Hrefna Haraldsdóttir, 10.10.2007 kl. 23:00]

Tryllingslega fagurt kvenfólk, góðar kartöflur og logn. Mundi ekki alveg þetta þriðja en það er örugglega lognið.

Góða ferð, Brynja og skemmtu þér konunglega hjá elsku Írunum. Leitt að næturlokunin hittir svona akkúrat á ferðalagið þitt, Hvalfjörðurinn er fallegur ... en það verður myrkur, dammmmn. Það styttist í rómantískar kvöldgöngur, hugsa ég. Kannski bara með Jónasi.

[Guðríður Hrefna Haraldsdóttir, 10.10.2007 kl. 23:09]

Mig langar að hvetja ykkur til að horfa á RÚV núna, Ríkissjónvarpið um kristilegu sumarbúðirnar fyrir börn. Held að þetta sé dúndurmynd!!!