Ævintýrahöfuðborgin

„Hvað er Hermann Hreiðarsson að gera á ísskápnum mínum?“ spurði ég erfðaprinsinn skömmu eftir heimkomu í dag. Ég tók allt í einu eftir því að einn flottasti íþróttamaður landsins glápti illilega á mig þegar ég var að búa mér til kaffi. Fátt varð um svör en ég kvarta ekki. Hann er orðinn ósköp skrautlegur ísskápurinn, m.a. nokkrar myndir af sjálfum erfðaprinsinum frá því hann var lítill og sætur. Nú er hann bara sætur. Hilda er þarna líka og Elvis Presley.

Við Inga byrjuðum í Rúmfatalagernum í Smáratorgi og ég gekk út með fjögur teppi. Tvö svo hroðalega ódýr að það hefði verið bjánalegt að kippa þeim ekki með. Við fórum með fenginn út í bíl og svo var gengið yfir bílastæðið til að kíkja á nýju leikfangabúðina í stærsta húsi í heimi sem verið er að byggja í Kópavogi. Við vorum  báðar svo fátækar þegar börnin okkar voru lítil að okkur datt í hug að bæta þeim upp æskuna núna þegar við erum orðnar svona ríkar ...  Hvorug okkar er orðin nógu gömul til að verða amma þannig að við höfðum eiginlega enga afsökun fyrir því að ganga í gegnum búðina. Þarna var eitthvað um tómar hillur og heilmikið um börn með blik í auga.
 

Áður höfðum við kíkt inn í Pier, nýja búð við hliðina á Toys-búðinni, sem opnaði í gær. Hún er óhugnanlega flott, eiginlega bara sjúklega æðisleg! Verðið á sumu þarna var líka ansi gott og þá er ég ekki að tala um hátt. Án þess að hafa ætlað að kaupa nokkuð féll ég kylliflöt fyrir míní-kommóðu án þess að vera mikið fyrir mínídót. Litirnir á skúffunum heilluðu mig algjörlega. Það kemst ansi lítið í skúffurnar, verð að viðurkenna það, varla eldspýtustokkur ... en erfðaprinsinn, stórhrifinn, sagði að hlytum að finna not fyrir þetta með tímanum. Hann fékk stórt og þykkt og grátt flísteppi úr RL, mitt teppi var svart og hvítt og fínrósótt, hrikalega mjúkt. Ódýru teppin voru ekki svo slæm heldur.

Það var alltaf eitthvað í gangi alla bæjarferðina. Ég sá t.d. lögguna í slag við skátaflokk, virtust vera mótmæli, og allt voða spennandi, blikkandi ljós og íslenski fáninn á fleygiferð, en Inga vildi meina að skátarnir væru bara í skrúðgöngu og löggan að liðka fyrir umferðinni. Mér finnst mín saga betri. Svo var haldið í Taco Bell sem er til húsa í KFC í Hafnarfirði, það vissi ég ekki. Inga valdi, enda vön, pantaði og borgaði sem var voða kósí. Virkilega góður matur og við drukkum fjalladrykk með.

Það var ekkert lát á ævintýrunum. Á leiðinni í Taco Bell létum við þvo bílinn og fórum í gegnum nokkur æsispennandi stig á bílaþvottastöðinni. Skvettustigið, árásarstigið, bládraugaganginn, gardínustigið og í lokin Kjalarnes í hviðum-stigið.

Tók með mér Mary Higgins Clark-bókina til að lesa í strætó á heimleiðinni sem reyndist vera algjör óþarfi. Inga ákvað bara að skutlast á Skagann með teppin og kommóðuna og ég fékk að fylgja með, heilir tveir tímar í strætó frá Mosó ... sem hún vissi ekki, þannig að þetta voru bara helber almennilegheit hjá henni.

Athugasemdir

[Fjóla Æ., 3.11.2007 kl. 18:12]

Vá þvílík ævintýri sem þú hefur lent í í dag. Gott þú ert komin heim svo þú getir hringað þig niður í Lasygirl umvafin dúnmjúkum svarthvítum rósum, með svaka spennu í fanginu  og starandi á þennan hrikalega sexy Hermann.

[Steingerður Steinarsdóttir, 3.11.2007 kl. 19:07]

Kommóðan er fyrir krydd elsku Gurrí mín. Þarna getur þú komið fyrir karríinu þínu, paprikunni og piparkornunum eða bara einhverju öðru sem þér finnst æðislegt.

[Guðrún Vala Elísdóttir, 3.11.2007 kl. 19:52]

Og ég sem var alveg viss um að hitta þig í Skrúðgarðinum í dag....

[Guðríður Hrefna Haraldsdóttir, 3.11.2007 kl. 20:24]

Ó, Guðrún Vala, ég ætla að mæta á þjóðahátíðina á morgun og kynnast allra þjóða kvikindum. 

Er þetta kryddkommóða, Steingerður almáttugur? En þornar kryddið ekki upp í svona hálfopnu dæmi? 

Ætla sko að eyða kvöldinu inni í rósóttu teppi, Fjóla. Við erfðaprins erum hreinlega ástfangin af teppunum okkar, föðmum þau án þess að skammast okkar. Ástin er á góðu verði í Rúmfatalagernum. 

[Jenný Anna Baldursdóttir, 3.11.2007 kl. 21:16]

Hehe, er nýbúin að fjárfesta í teppum, algjör unaður að skrúfa sér upp í þau.  En þessi kommóða er æðisleg, ég myndi þó halda að Steingerður almáttugur væri aðeins of fljót á sér með kryddið, verður það ekki að vera í lokuðum umbúðum? Hm.. hvað veit ég svo sem.  Geymdu alla demantshringana í kommóðunni.

Smjúts á ykkur þarna í Himnaríki.

[Jóna Á. Gísladóttir, 3.11.2007 kl. 21:27]

mig langar í svona kommóðu

[Halldór Sigurðsson, 3.11.2007 kl. 21:36]

Setja ískápinná Ebay --- örugglega verðmætur með allar þessar myndir á

[Katrín Ósk Adamsdóttir, 3.11.2007 kl. 21:57]

Ekkert smá flott kommóða en greinilega smekkmanneskja á ferð,knús til þín

[Kristín Katla Árnadóttir, 3.11.2007 kl. 22:21]

Flott kommóða knús til þín

[Anna Ólafsdóttir Björnsson, 3.11.2007 kl. 22:24]

Vá, þessar skúffur!

[Magnús Geir Guðmundsson, 3.11.2007 kl. 22:59]

Sæl Guðríður, ég heiti Maggi, hef aldrei skrifað þér áður, er svo feimin!

en læt samt eins og ég hafi þekkt þig í ótal ár og finnist þú sannarlega vera svo skemmtileg!

Nú missti rænu og ráð,

af rosahlátri í bráð.

Í Gurrí er gríni sáð,

guðs af mestu náð!

[Guðríður Hrefna Haraldsdóttir, 3.11.2007 kl. 23:28]

Takk fyrir daðrið, Magnús, enn einu sinni. Vísurnar þínar klikka ekki ... heheheh

Ég ætla að geyma demantshringana mína í nýju kommóðunni (sem kostaði innan við 3.000 kall) ... hún er tóm en ég hlýt að fá einhverja hringa í afmælisgjöf næst ef ég "síkrita" það. ("Ég ætla að eignast demantshring eða eitthvað glitrandi og nógu lítið til að komast í skúffurnar") 

[Saumakonan, 3.11.2007 kl. 23:38]

gegguð kommóða!!!!    Þarf greinilega að komast í þessa nýju búð í næstu borgarferð  (eins fallegt að kallinn verði hvergi nærri þá)

[Guðríður Hrefna Haraldsdóttir, 3.11.2007 kl. 23:58]

Rétt hjá þér, Anna. Ekki áttaði ég mig á þessu, mjög athyglisvert. Stúlkan sem kallaði upp númerið okkar Ingu á Taco Bell sagði: "Number fifty four, number fifty four!" til að kóróna þetta allt saman ... þetta sem ég fattaði ekki fyrr en þú bentir á það. 

[Brynja www.blogg.central.is/skordal_1 (IP-tala skráð) 4.11.2007 kl. 01:50]

Æðislega Flott míni-kommóðan En já það jafnast fátt við að vefja sig inn í mjúku teppin Frá RL Magasýn