Nótt hinna þúsund ... handklæða

Stórt baðhandklæði er komið í gluggann í bókaherberginu. Erfðaprinsinn sat við tölvuna og tók ekki eftir því að það dældist rigning inn um litla, opnanlega gluggann sem var lokaður. Nokkrir millirúmsentimetralítrar, eða svona 12.549 dropar, höfðu lekið alla leið niður á gólf. Það hefur ekki gerst áður. Setti eldhúsrúllubréf til að þétta gluggann, hefði líklega þurft steypuhræru. Lúmska rigningin hefði eflaust fundið sér leið í gegnum hana líka. Dagblöð og stórt handklæði eru líka við svaladyrnar. Hvað er eiginlega hægt að gera? Ég er búin að fá menn þrisvar eða fjórum sinnum til að þétta og spartla og borga fyrir það, samt lekur. Ef maður fengi þrumur og eldingar með þessu vatnsveðri yrði ég miklu sáttari.

Erfðaprinsinn er kominn upp í rúm með Arnald, rosa spenntur, og svei mér ef ég fer ekki að drífa mig upp í líka ... með Mary. Ansi spennuþrungið kvöld fram undan í himnaríki, hnegg, hnegg!

Athugasemdir

[Guðný Anna Arnþórsdóttir, 3.11.2007 kl. 23:34]

Gott rigningarkvöld, elsku kona. Hér lemja regnhryjur alla glugga og þar sem mismunandi halli er á þeim, verður úr margradda(eða tóna) synfónía. Gersamlega geggjað.

[Jóna Á. Gísladóttir, 3.11.2007 kl. 23:37]

assgotans vesen er þetta með lekann hjá þér kona.

Ég var að lesa fyrstu bls í Arnaldi á netinu og sá að það er vitnað í þig sem krítikker. Svo hætti ég að lesa því ég hef ákveðið að Bretinn gefi mér þessa í jólagjöf.

[Jenný Anna Baldursdóttir, 3.11.2007 kl. 23:43]

Rosalega er alltaf kósí að lesa óveðursrapportin þín.  Verð græn af öfund mínus leiki. Nigthy, nigthy

[Saumakonan, 3.11.2007 kl. 23:44]

Velkomin í hópinn.... hér duga sko ekki handklæðin heldur er ég með heilu balana  í borðstofunni... gardínurnar leiða vatnið í balann þar sem það lekur fyrir OFAN gluggann hjá mér og það ekkert smá!    "dropp.... dropp... dropp... dropp" niðar í eyrunum á mér alltaf hreint og svo eru nýju flísarnar í forstofunni allar á floti líka þar sem lekur í gegnum þröskuldinn.  *dæs*    Líður eiginlega eins og í teiknimyndunum þar sem það eru pottar útum alla íbúð og maður þarf að hlaupa á milli!!!

[Guðríður Hrefna Haraldsdóttir, 3.11.2007 kl. 23:52]

Já, þetta er gjörsamlega geggjað. Náttúruöflin í miklu stuði. Erfðaprinsinn hló hátt að móður sinni þegar hún benti honum á nýlega að ef það kæmi harður jarðskjálfti myndi hún mögulega rúlla út um gluggann sem er í sömu hæð og rúmið ... og alla leiðina út í sjó. Maður lifir spennandi lífi hérna. Annars er lekinn minn greinilega ekkert miðað við hjá Saumakonunni ... argggg. Hugmyndin góð að leiða vatnið ofan í bala. Ég prófaði þetta með eldhúsgluggann einu sinni og það hálffylltist stór blómapottur (án blóms). Best að sjá hvað ég get gert núna ef það heldur svona áfram að rigna. Þarf að kíkja á www.yr.no, flottu veðursíðuna mína.

[Jónsi (IP-tala skráð) 4.11.2007 kl. 09:22]

Þið hefðuð átt að skipta, viss um að erfðaprinsinn hefði nú skemmt sér betur mað Mary í rúminu og þú með Arnaldi - nei segi nú bara sona

[JóhannaH (IP-tala skráð) 4.11.2007 kl. 10:14]

Í Búsetablokkinni í Kópavogi notuðum við 4 ísbox sem gluggaskreytingu í forstofunni í heila 2 mánuði. Mæli með ísboxum í rigningartíð.

[Marta B Helgadóttir, 4.11.2007 kl. 14:20]

Nú er bókaspjallið komið í gang á síðunni minni, um bókina Sendiherrann. Endilega leggðu orð í belg ef þú hefur tíma.

[Ásdís Sigurðardóttir, 4.11.2007 kl. 14:32]

Góðan daginn. Hvernig er í himnaríki.  Jóna vinkona okkar er að leita af símanúmerinu hjá GUÐI, hefur þú einhver ráð??  Þú ert greinilega með lekavandamál. 

[Guðríður Hrefna Haraldsdóttir, 4.11.2007 kl. 14:36]

Var einmitt að hugsa það sama, Jónsi ... Jóhanna, held að ísbox séu of lítil í þennan leka ... arggg. Ég kíki á síðuna eftir Þjóðahátíð, Marta. Já, og góðan dag, Ásdís, veit ekki öll símanúmer þótt ég sé minnug á tölur ... skal reyna að komast að því. Hehhehe