Þrír frakkar og enginn í fríi!

Vissi að þetta yrði góður dagur, eiginlega frábær! Skemmtileg byrjun á vikunni. Ég átti stefnumót við gamla og góða vinkonu sem ég hef ekki hitt alveg hrikalega lengi. Við hittumst á Þremur frökkum og borðuðum saman hádegisverð. Í kaupbæti hitti ég óvænt aðra gamla og góða vinkonu sem búsett er í Bath í Englandi. Kom heim til að vera við jarðarför. Upplýsingar: Sú sem þjónaði okkur var að fara til Flórída seinna í dag. Englandsvinkonan flýgur heim til Englands í fyrramálið og vinkona mín mun verja jólunum á Hawaii! En ... ekki öfunda, ekki er allt sem sýnist, onei!!! Það er nefnilega allt morandi af viðbjóðslegum skordýrum í útlöndum, stórhættulegum og svo ófríðum að þau geta drepið mann úr hræðslunni einni saman. Mætti ég frekar biðja um íslenskt veður; frost og snjó með tilheyrandi geitungaskorti!

Við fengum okkur sveppasúpu í forrétt og ég get alveg sagt það og staðið við að ég hef aldrei fengið betri sveppasúpu (ekki einu sinni hérna í mötuneytinu ...). Langar að læra að búa til svona súpu og hafa sem forrétt um jólin eða eitthvað! Oft verða súpurnar of saltar á veitingahúsum en þarna var ekki klikkað á neinu. Í aðalrétt fékk vinkonan sér rauðsprettu en ég veðjaði á karfa með rjóma-wasabi-sósu. Mjög, mjög gott. Hvítvínsglas með, hikk! Ég er eiginlega enn á rassgatinu!

Góða þjónustukonan heimtaði að gefa mér leifarnar í catty-bag (vinkona mín blaðraði því að ég ætti kisur) og mér hefði nú alveg fundist við hæfi að fá þær í Harrods-poka ... svona miðað við gæði staðarins og bragð matarins ... en nei, það var Bónuspoki, eins og ég sé eitthvað lágvöruverslanagengi! Kommon, hvað ætli fólkið í strætó segi þegar ég mætti með Bónuspoka?

Athugasemdir

[krossgata, 5.11.2007 kl. 15:26]

Verði þér að góðu.  En það er þetta með lágvörurnar (sem einn bloggvinur benti á) eru þessar vörur í lægri hillum en gengur og gerist í búðum?    Það er líklega eina leiðin til að gera vörurnar að lágvörum. 

[Guðríður Hrefna Haraldsdóttir, 5.11.2007 kl. 15:31]

Ég meinti einmitt svoleiðis lághilluvöruverslanir og bakverki í kjölfarið!!!

[Einar Vignir Einarsson, 5.11.2007 kl. 15:57]

Þú ættir að prófa PLOKKARANN hjá ÚLLA þeir eru hvergi betri.

[Guðríður Hrefna Haraldsdóttir, 5.11.2007 kl. 16:25]

Ætla sko næst í plokkfiskinn!!!

[Þröstur Unnar, 5.11.2007 kl. 17:36]

Meira snobbið í þér kjélling.

[Jenný Anna Baldursdóttir, 5.11.2007 kl. 17:43]

Noh, voðaleg ferðalög á vinkonunum.  Gætirðu ekki marið uppskrift á súpu út úr verti?  Væri ekki leiðinlegt.

Takk fyrir mig

[Jóna Á. Gísladóttir, 5.11.2007 kl. 17:49]

Mmmm ég er svöng.

Er þetta Demi More sem stendur á bak við kokkinn?

[Brynja www.blogg.central.is/skordal_1 (IP-tala skráð) 5.11.2007 kl. 20:02]

Ja hérna bara flottheit á Mánudegi nammi gott já sammála jónu er þetta Demi More þarna?

[Heimir Lárusson Fjeldsted, 5.11.2007 kl. 21:23]

Stúlkan á bak við Stefán kokk er systir hans Guðný og þau eru Úlfarsbörn.

[Guðný Anna Arnþórsdóttir, 5.11.2007 kl. 21:25]

Það hlýtur að vita á gott, þegar vikan byrjar svona vel. Næst þegar þú ferð á Þrjá frakka mæli ég með að þú fáir þér gellur, þær eru ómótstæðilegar.

[Jóna Á. Gísladóttir, 5.11.2007 kl. 21:44]

Það þarf einhver að segja henni Guðnýju Úlfarsdóttur frá þessu.

[Nanna Rögnvaldardóttir, 5.11.2007 kl. 22:17]

Gurrí mín, ég hélt að þú hefðir lært þetta hér um árið - kommon, ekki treysta á aðra, vertu sjálf með Harrods-poka í veskinu og notaðu hann hvenær sem færi gefst ...

[Guðríður Hrefna Haraldsdóttir, 5.11.2007 kl. 22:46]

Það var einmitt Guðný sem snerist í kringum okkur ... og var á leiðinni til Flórída í kvöld. Aumingja hún, pöddurnar sko.

Tek sko Harrods-poka með næst.

[Steingrímur Helgason, 6.11.2007 kl. 00:25]

Já, greyjið brósi minn fylgdi víst með henni Guðnýju konu sinni í þessa skelfilegu Flórídaferð.

Mar samúðast alveg í kríng.

En ég kenndi þeim nú að forðast flugurnar í þarna í gömlu daga & trúi nú alveg að þau hafi numið af sér eldri & vísari.

S.

[Guðríður Hrefna Haraldsdóttir, 6.11.2007 kl. 00:34]

Heimurinn lítill! Mikið áttu frábæra mágkonu! Vona að þau skemmti sér vel í Flórída og gott að Guðný er vel gift!