Mikil menning

23.11.2007 | 22:41

Fór í skyndimenningarreisu um miðbæ Reykjavíkur eftir vinnu og er endurnærð á eftir. Ef ég ynni ekki í Reykjavík þyrfti ég ekki að fara þangað næstu mánuðina. Fyrst var það Sólon, efri hæðin, en þar var Pétur Blöndal með útgáfupartí. Eva frænka er í bókinni hans og ég vonaðist til að hitta hana og knúsa svolítið. Hitti í staðinn Nönnu Rögnvaldar og gladdist mjög, alltaf gaman að hitta hana. Pétur sjálfur kom til okkar og gerði sér lítið fyrir og kyssti hana. Ég heimtaði koss og fékk, enda dagur íslenskrar tung ... æ, úps, svona dónaskapur á ekki heima á virðulegri bloggsíðu. Þess vegna hef ég ekki sagt frá því á þessum vettvangi hvernig ég plataði strákana í vinnunni nýlega. Sagði Nönnu að ég myndi mæta í annað svona menningarpartí eftir viku en þá mundi ég ekki eftir Útsvari.

Sjö og hálfri mínútu síðar labbaði ég upp í Menn og málningu en þar voru Guðni Ágústsson og Sigmundur Ernir að kynna nýútkomna ævisögu Guðna. Þar var margt um manninn. Hverjir voru þar? Nú, Adda Steina, Þórir Guðmundsson, Guðni, Sigmundur Ernir, Guðrún og Þorgerður frá Bjarti og við Inga, svo ég telji nú upp þá merkilegustu. Missti því miður af því að koma í fréttum Stöðvar 2 í kvöld frá atburðinum en það munaði aftur á móti mjög litlu að mér tækist að lauma mér inn á ráðherra- og alþingismannamynd á Sólon. Þar voru Þorgerður Katrín, Össur, Sigurður Kári og fleira gott fólk. Össur nikkaði ekki til mín eins og hann hefur alltaf gert síðan við spjölluðum saman fyrir löngu um Evrópusambandið. Þetta var á þáverandi vinnustað mínum og Össur að hitta vin sinn sem vann með mér. Hann ætlaði alltaf að sannfæra mig um nauðsyn þess að við gengjum í Evrópusambandið en sá tími hefur ekki komið og ég verð sífellt meira á móti því ... sem er eins og gefur að skilja alfarið sök Össurar. Ætlaði að brosa sætt til Sigurðar Kára en mundi eftir því á síðustu stundu að litla viðtalið sem ég tók við hann um árið var í gegnum síma.

Á Skaganum verður líka mikil menning á næstunni. Megas mætir í Skrúðgarðinn annað kvöld og Páll Óskar verður með tónleika 1. des. í Bíóhöllinni. Mig langar að mæta á báða atburðina.

Sá þetta í Póstinum, innanbæjarblaði okkar Skagamanna, sem er alltaf lesið í tætlur af öllum. Sjónvarpsdagskráin er þarna en auglýsingarnar eru líka mjög spennandi, í alvöru. Ég gæti fengið gefins hillusamstæðu ef mig vantaði eða hvítan fresskött, 5 mánaða. Þarna eru líka vetrardekk af öllum stærðum og gerðum.

Meginflokkur: Bloggar | Aukaflokkar: Bækur, Menning og listir, Vinir og fjölskylda | Facebook

Athugasemdir

Hvítur kisustrákur er nú eitthvað fyrir mig.

Rannveig Lena Gísladóttir, 23.11.2007 kl. 22:47

Það er aldeilis alltaf nóg að gera hjá þér og þú alltaf svo menningarleg Jáhá þegar ég kem á skagann er sko farið yfir pésana sem komið hafa frá því að ég var síðast á skaganum Ja ég veit ekki hvað hægt er að gera við þig í samband við þennan koss og Pétur Blöndal en held að mér lítist ekki nógu vel á þetta hí,hí Endilega skella sér svo á Megas en sko afi minn og amma hans voru hálfsystkini(samfeðra) en ég þekkji hann samt ekkert.Það þarf víst ekkert að efast um að þín helgi verður góð en samt allavega góða helgi

Katrín Ósk Adamsdóttir, 23.11.2007 kl. 23:19

Þú ert svo alls staðar Gurrí! You crazy it-girl! Ég bý hérna í hringiðunni og er alltaf hvergi Á ég að segja þér hversu langt er síðan ég kom á Akranes?

Laufey Ólafsdóttir, 23.11.2007 kl. 23:30

Ég er í kasti, hvers á maður að gjalda þegar kona "slysast" hér inn?

Pétur Blöndal? Hvaða Pétur Blöndal? Af hverju vildurðu ekki kyssa hann á degi tungunnar?

Hann Pétur rak sig í tungu,

hennar Gurríar Haralds, síungu

Hann sagði,

hvað er þetta kona?

ég er alltaf að vona

að við gætum sleikst oní lungu!

Jenný Anna Baldursdóttir, 23.11.2007 kl. 23:39

Mía systir bjó á Kirkjubæjarklaustri einu sinni. Á einni helgi eitt árið tókst henni að menningast meira en ég heilan vetur. Tónleikar, danssýning, leikhús, bíó ... og ég sem bjó á landamærum 101 og 107 Reykjavík á þessum tíma.

Gangi þér vel að skutla skátunum, Guðmundur, þetta verður mikið stuð ef ég þekki skáta rétt.

Kannski kemur þú bara í afmælið mitt næsta sumar, Laufey, býð alltaf 100 allra, allra nánustu vinum mínum. Þá getur þú sagt að þú hafir komið á Skagann 2008.

Held ég kíki bara á tónleika Megasar, Katrín, verð að sjá hann frænda þinn.

Rannveig, þú veist hvar hvíti kötturinn er ... símanúmerið er í Póstinum, ég get flett upp fyrir þig

Guðríður Hrefna Haraldsdóttir, 23.11.2007 kl. 23:40

Þorrí, kominn í mig helgargalsi. Geretta ekkiattur, lofa.

Jenný Anna Baldursdóttir, 23.11.2007 kl. 23:40

JENNÝ!!!! omg ... Pétur Blöndal er ungur og sætur rithöfundur sem var að senda frá sér viðtalsbók, spjallaði við nokkur skáld, held ég, á eftir að kíkja í bókina. Hefði ekki þegið koss frá hinum Pétri Blöndal, sá hefur þannig peningaskoðanir og getur t.d. ekki sett sig í spor fátækra. Líklegast samt ágætismaður, þekki hann ekki.

En ... ég skrökvaði að nokkrum karlkynsvinnufélögum mínum á degi íslenskrar tungu að dagurinn gengi út á kossa ... þarf ég nokkuð að segja meira? Þeir höfðu aldrei heyrt minnst á Jónas Hallgrímsson, enda ungir og óupplýstir.

Guðríður Hrefna Haraldsdóttir, 23.11.2007 kl. 23:44

En maður má fabúlera og fantisera, ha?

Jenný Anna Baldursdóttir, 23.11.2007 kl. 23:46

Ég þorði ekki að kommenta á Pétur Blöndal en er fegin að það var ekki sá sem ég hélt það væri, sem var semsagt hitt eintakið Dagur íslenskrar tungu Gurrí!!! OMG, hvað náðirðu mörgum ungum tungum þann daginn?

...og Jenný! Skamastín! You're a KILLER!

Ps. Væri ógisslega upp með mér að vera á topp hundrað hjá þér Gurrí. Alveg tilefni til að prófa Skagavagninn og alles.

Laufey Ólafsdóttir, 23.11.2007 kl. 23:56

Já, Magna, frábær vísa hjá Jennýju! Jónas Hallgrímsson hvað!!!

Guðríður Hrefna Haraldsdóttir, 24.11.2007 kl. 00:19

Ég er enn í ksti yfir vísunni hennar Jennýjar, sértaklega þar sem ég var að hugsa um annan Pétur Blöndal...

Þuríður Björg Þorgrímsdóttir, 24.11.2007 kl. 01:02

yndisleg vísa sérstaklega þegar maður var með hin Pétur Blöndal

Góða nótt knús í himnaríki

Guðrún Jóhannesdóttir, 24.11.2007 kl. 01:12

Ó mæ ó mæ, Jenný, hvar fannstu tunguna hans G.Simmons í Kiss?? En annars góð og skemmtileg færsla að vanda Gurrý mín. Gangi þér vel í menningunni um helgina.

Ásdís Sigurðardóttir, 24.11.2007 kl. 12:14

Góður pistill... Skiptir engu máli fyrir okkur "útlendingana" að sjá ekki Séð og heyrt þegar við fáum svona fínar "hver var hvar" úttektir hér

Auður H Ingólfsdóttir (IP-tala skráð) 24.11.2007 kl. 20:20

p.s. einu sinni vann ég á blaði þar sem hönnuður, að beiðni ritstjórans, bjó til forsíðu fyrir dag íslenskrar tungu þar sem sjálfur Jónas var með tunguna lafandi út úr sér, skreytta fánalitum. Ég hótaði uppsögn og myndin fór aldrei í loftið...

Auður H Ingólfsdóttir (IP-tala skráð) 24.11.2007 kl. 20:22

Ekkert voða leiðinlegt hjá þér. Og ekki slæmt að eiga von á Megasi, fyrir utan talentinn er þetta þvílíkur öðlingur. Og Páll Óskar var svo frábær hjá Loga í gærkvöldi að mig dreplangar á tónleika með honum

Anna Ólafsdóttir (anno) (IP-tala skráð) 24.11.2007 kl. 21:08

Aha, hló fyrst út af degi íslenskrar tungu (í þinni túlkun) og svo vissi ég ekki að Jenný Anna væri hagyrðingur, limruskáld þar að auki. Alltaf gaman hjá þér, rosalega hafa óttaslegnir ritstjórar oft kæft góðar hugmyndir, mér líst vel á þetta sem Auður nefnir.

Anna Ólafsdóttir Björnsson, 24.11.2007 kl. 21:57

Ææ það er agalegt að komast ekki á tónleikana hjá Meistara Megas Var búinn að lofa mér í annað sem ég varð að standa við fúlt Svona er þetta stundum ekki allt hægt er samt hálf glær eftir flotta skemmtun og jólamat á örkinni í gærkveldi skemmtu þér æðislega á Tónleikum Meistarans hlakka til að heyra hvernig var