Ævintýri á morgunslopp ... viðrun og jólamynd

Erfðaprinsinn viðraði háaldraða móður sína, eins og góðir synir gera á sunnudögum, og við skruppum í Skrúðgarðinn. Þvílík jólastemmning. Búið að skreyta jólatré og undir því lágu girnilegir jólapakkar. Börnin á staðnum voru alveg að missa sig, fullorðna fólki reyndi að halda stillingu sinni.
Heitt súkkulaði og ostakaka fyrir þá gömlu, súkkulaðikaka og kaffi fyrir ungann. Smakkaði á sjúklega girnilegu köku erfðaprinsins og kræst, fann hnetu- eða núggatbragð eitthvað hræðilega skelfilegt. Sjúkkitt að við pöntuðum ekki tvær svona, það munaði litlu. Sumar tertur leyna greinilega illilega á sér.

----------          --------------          ------------------          ------------ 

Fórum í búð og í anddyrinu þar sátu tveir undir sölumenn með tombólu. Keypti mjög fallega jólamynd, bauð 200 kall í hana og fékk. Efnilegur listamaður að nafni Guðmundur bjó hana til. Hún fær heiðursstað í himnaríki.

Ég lenti í svaðalegu ævintýri í dag, eða hefði gert ef erfðaprinsinn hefði ekki verið heima, held ég. Dyrabjallan hringdi, ég, spennufíkillinn í sloppnum einum fata, ýtti á OPNA, og beið spennt. Jú, þetta var enginn annar en húsfélagsformaðurinn! Hann þurfti að mæla eitthvað á svölunum. Hrópaði til hans þegar hann var á leiðinni upp stigana: „Ja, ég er nú eiginlega nakin, var að koma úr baði!“ Fyrstu vonbrigðin komu þegar hann svaraði: „Geturðu ekki farið í slopp?“ og það örlaði á skelfingu í rödd hans. Sumir hefðu nú farið að hlaupa ... „Ég er í slopp,“ sagði ég þreytulega. Formaðurinn var með tommustokk með sér (leikfang lostans hjá hugmyndaríku fólki sem notar m.a. grilláhöld og strauborð jöfnum höndum líka), dreif sig beint út á svalir ... og mældi. Hann sá síðan nýju bókina eftir Yrsu á stofuborðinu og eftir það átti hún hug hans allan. Ég sagðist vera búin með tvo kafla og væri voða spennt, gæti mælt með henni só far. Tek það fram að sloppurinn minn er fyrst og fremst hlýr, langt því frá sexí, enda bý ég á Íslandi.

Athugasemdir

[Magnús Geir Guðmundsson, 25.11.2007 kl. 18:59]

Guðríður geðshræringarvaki!

Æri þig fyrir siðanefnd Feministafélagsins,ef þú hættir ekki að "Flassa" svona framan í Bloggheiminn.

Fengir aldrei að kalla þig Feministabelju framar ella og þá væru góð ráð dýr!?

[Jens Guð, 25.11.2007 kl. 20:08]

Æ,  nú langar mig sjúklega í heitt súkkulaði.  Það er nefnilega hollt.  Sneisafullt af andoxunarefnum og steinefnum.   

[Jóna Á. Gísladóttir, 25.11.2007 kl. 22:13]

LOL helvítis húsfélagsformaðurinn

[Guðríður Hrefna Haraldsdóttir, 25.11.2007 kl. 22:41]

Jamm, segðu. Kannski misskildi ég allt saman ... gerði þetta líka kannski til að hann myndi hringja á undan sér næst!!! Arggggg! Það er út af svona aðstæðum sem best er að fólk hringi og spyrji hvernig standi á. Ég klæði mig ekki stundvíslega klukkan níu á sunnudagsmorgnum og bíð pen eftir því að gestir komi mögulega eða kannski, búin að baka og allt! Er nokkur þannig?

[Jenný Anna Baldursdóttir, 25.11.2007 kl. 23:47]

Það þarf ekki mikið að kosta

að verð´alveg heltekinn losta

um húsverði við tölum

sem eru teknir á svölum

og eru fullir af hormónaþorsta!

[Ingigerður Friðgeirsdóttir, 25.11.2007 kl. 23:51]

Takk fyrir góðar færslur alltaf ylja þær og kitla hláturtaugarnar.

Bestu kveðjur Ingigerður.

[Guðrún Jóhannesdóttir, 26.11.2007 kl. 00:19]

sofðu vel kæra Gurrí

[Hulda (IP-tala skráð) 26.11.2007 kl. 00:27]

flott jólamynd!  verður gaman að sjá hvernig útkoman verður með bókina hennar Yrsu, hef einmitt verið að spá í að bæta henni við sem aukajólagjöf hjá mér... (svo laumar maður sér kannski í hana þegar viðkomandi er búin að lesa hana)

[Steingrímur Helgason, 26.11.2007 kl. 00:54]

Ég er búinn að kæra þig fyrir ritstuld út af þessu "háaldraða móður sína" fyrir ritstjórn 'moggeríisbloggerísins' en veit sem er að það er mér náttúrlega fyrirfram tapað mál.

Já ertu með hnetuofnæmi gæzkan, það lá að.  (Woman who hate nuts united.)

Formaður þinn er tilfínnínglega heft kynlega gagnslaust tröll, & klárlega minni femínizdabelja en við tvær til samans.  Byltíng & yfirtaka á húsfélaginu er eina leiðin til þess að fækka mögulegum endurtekníngum á jafn niðrandi uppákomum án uppáferða sem þessarar.

Ég kaupi alltaf sloppa sem að hægt er að tvímenna í á mitt konudýr.

[Svava S. Steinars, 26.11.2007 kl. 01:21]

Þú hefðir auðvitað átt að brosa daðurslega og láta sloppinn opnast aðeins...auðvitað alveg "óvart".  Hefði samstundis komið þér í flokk tálkvenda í hans huga, hann myndi því mæta næst með rauðvín og osta ekki tommustokk

[Guðríður Hrefna Haraldsdóttir, 26.11.2007 kl. 07:51]

Hrikalega eruð þið fyndin, elskurnar ... hahahahahahah 

Sko, Steingrímur, ég hef kallað mig háaldraða í rúm 20 ár a.m.k. síðan ég heimtaði að sonur minn leyfði mér, háaldraðri móður sinni, að sitja í eina lausa sætinu í strætó!