Dularfullt leyninúmer í morgunsárið

Sá tvö ný "missed calles" á gemsanum mínum þegar ég ætlaði að rjúka út á stoppistöð. Hmmm ... Ásta vön að senda gleðirík BDSMS, ekki hringja. Síminn minn er stilltur þannig að aðeins ein hringing heyrist, síðan bara hristingur og suð. Afar heimskulegt, þessu verður breytt í dag. Hringt var úr leyninúmeri svo að ég gat ekki hringt til baka. Vakti þess í stað með SMS-i tvær veikar vinkonur mínar. Það voru ekki Ásta eða Inga sem hringdu í morgun, komnar með leyninúmer. Prófaði ekki Sigþóru morgunhænu þar sem hún á ekki bíl ... Í strætó barðist ég við samviskubit yfir því að hafa valdið Ástu og Ingu auknum kvölum; höfuðverk, nefrennsli og geðvonsku, svona eins og gerist iðulega ef veikt fólk fær ekki að sofa. Það blandaðist kvíðakenndum hugsunum um erfiða Súkkulaðibrekkuna í roki og rigningu. 

Við lúsuðumst í gegnum  Kjalarnesið (frá göngum og fram hjá Grundahverfinu) á c.a. 30 km/klst þar sem vindhviðurnar voru viðbjóðslega sterkar, hélt að hurðin fyki af á köflum og við með ... þAÐ VANTAR ANNAN HVIÐUMÆLI ÞARNA áður en fleiri óhöpp verða (sl. vetur fauk strætó út af). Hjá mælinum, sem er staðsettur við Kollafjörð, var næstum logn, miðað við hitt helvítið! (Mælirinn sýndi 25 m/sek. sem er allt í lagi) Svakalega þurfti ég að gera mig stífa í morgun til að við fykjum ekki út af. Skil ekki hvernig smiðurinn og sessunautur hennar gátu masað og hlegið á leiðinni. Eftir að sessunauturinn var farinn út í Mosó spjölluðum við smiða um símatímann á Bylgjunni þar sem kvenhatarar af báðum kynjum gerðu grín að hugmynd Steinunnar um að breyta orðinu ráðherra. Ég heyrði engan hlæja þegar flugfreyjunafninu var breytt, það þótti sjálfsögð virðing við nýtilkomna karlmenn í faginu að kvengera þá ekki!

Einhver algjör töffari kom inn í strætó við íþróttahúsið á Akranesi og spurði hátt og snjallt hvort þessi vagn færi ekki í Hálsahverfið. (I wish, hugsaði ég). „Ég stoppa við Vesturlandsveginn, fyrir neðan Hálsahverfið,“ sagði bílstjórinn ósveigjanlegur. Ég hef margoft reynt að múta þessum greinilega forríku bílstjórum með 50 krónum eða svo til að fara Hálsahverfið en það hefur ekki gengið. Brekkan getur verið ansi brött og vindasöm og sleip og löng ...

Hefði svo sem getað farið alla leið í Ártún og beðið þar í korter eftir leið 18 sem gengur Hálsana, eftir að hafa farið í gegnum allan Árbæinn. Sá fyrrum troðfulli strætisvagn sem gekk áður Stórhöfðann og upp Súkkulaðibrekkuna og stoppaði fyrir neðan húsið mitt skröltir nú hálftómur í Árbænum og ég er steinhætt að hitta sætu Pólverjana mína, einu karlana sem sendu mér áfergjulegt augnaráð svo snemma dags. Fer ekki ofan af því, þau hjá Strætó bs hefðu átt að fá mig til leiðsagnar, ekki einhvern Dana sem hefur aldrei upp í íslenskan strætó komið og fyrirlítur Ísland og þolir ekki þjóðina þar sem við erum búin að kaupa allt í Köben nema Tívolí. 

Gerði ráð fyrir því/vonaði að við töffarinn myndum ganga samstiga upp Súkkulaðibrekkuna, kynnast og verða fínir vinir, eins og við skólastrákurinn minn í fyrra/hittiðfyrra, nei, þetta snobbhænsn, sem vinnur annað hvort í kaffiverksmiðju eða er í Kvikmyndaskólanum, lét eins og það sæi mig ekki ... og við sem tókum sama strætó! Svört sem syndin læddist ég alein og veðurbarin uppeftir í áttina að Lynghálsinum. Ég á tvö endurskinsmerki, Tuma tígurs-merki, sem ég keypti nýlega í Skaganesti, held að það sé alveg orðið tímabært að setja þau á kápuna mína kolsvörtu.

Athugasemdir

[Jenný Anna Baldursdóttir, 26.11.2007 kl. 09:53]

Eftir stendur að spyrja

en ég veit ekki hvar á að byrja. 

DJÓK ætla ekkert að limrast á þér í dag.  En hvernig stendur á því að strætó óð í bæinn þegar stórir bílar eru fastir upp á Skaga vegna veðurhams?  Þetta er skelfilegt flan

Njóttu dagsins Gurrí mín,

[Guðríður Hrefna Haraldsdóttir, 26.11.2007 kl. 10:05]

Strætó fer eftir vindhviðumælinum á Kjalarnesi, ef hann er undir 30 þá ferð strætó! Það vantar sárlega hviðumæli rétt hjá göngunum, þar er alltaf hvassara og væri skynsamlegra að taka mark á honum!

Rosalega ertu góð í limrum og vísum og slíku, líst vel á þig! Njóttu dagsins líka, skvísudúlla.

[Már Högnason (IP-tala skráð) 26.11.2007 kl. 10:09]

Að ganga brekkur herðir hupp

-hýrum augum renna

menn á Gurrí ganga upp

glæsilegust kvenna.

[Guðríður Hrefna Haraldsdóttir, 26.11.2007 kl. 10:17]

Ó, Már, þetta var snilld. Gangan verður léttbærari héðan í frá.

[Ragnheiður , 26.11.2007 kl. 11:34]

Oj ég gæti þetta bara ekki...myndi bara mæta í vinnuna á sumarmánuðunum..

[Guðríður Hrefna Haraldsdóttir, 26.11.2007 kl. 12:14]

Sumir strákar taka þessu nú samt eins og árás á karla. Ég dái og dýrka karlmenn, get ekki án þeirra verið, elska þá heitt, þessar dúllur og gæti aldrei ráðist á þá. Það þykir samt fyndið ef strákar kallast hjúkkur og allir flissa, en kona er flottur stjóri og algjör óþarfi að breyta því. Segi nú svona. Hafði hreinlega aldrei hugsað út í þetta fyrr en bálreiðir menn fóru að skammast ... aðrir að hlæja ... þá fór aðeins að fjúka í mína. Eða þannig.

Held að ég nærist á brjálaða rokinu á Kjalarnesinu, Ragga mín. Ef ekkert væri rokið þá væru engin ævintýrin!

Ætla að afplána PASTA-máltíð í matsalnum. Samúð óskast!  

[Lára Hanna Einarsdóttir, 26.11.2007 kl. 13:15]

Hvernig er þetta með stjórnendurna hjá Strætó... lesa þeir ekki bloggið þitt? Ég væri löngu búin að breyta kerfinu þarna uppfrá ef ég réði einhverju þar. Og setja upp fleiri hviðumæla! 

[Steingrímur Helgason, 26.11.2007 kl. 21:09]

Hvað er þetta flugþjónn ?