Áhyggjufækkun, peningaminnkun, gleðiaukning

Það birti yfir í Skrúðgarðinum þegar Guðmundur, bloggvinurinn besti, gekk inn. Sumir standa við „hótanir“ gærdagsins, Guðmundur er einn þeirra. Mikið var gaman að hitta hann! Hulda, eina sanna, var í búðarápi og ég dreif hana með í Skrúðgarðinn. Súpan alveg súpergóð og þriðjudagsmömmuklúbburinn á sínum stað í öðrum sal. Sakna þeirra helling en skil þær svo sem alveg að vilja vera sér og spjalla. Hitti eina þeirra og viðraði þennan söknuð. Kjáði framan í prinsinn hennar, ógurlega sætan. Held að ég fari alveg að öðlast þann þroska að verða amma. Hef, held ég, gefið upp á bátinn að koma með litla systur fyrir erfðaprinsinn. Það væri samt kúl að hafa tæp 30 ár á milli barna. Koma tímar, koma ráð.

Útsvarsáhyggjurnar: Í gærkvöldi kíkti Sigrún Ósk, meðreiðarmær mín, í heimsókn í himnaríki. Finnst líklegt að hún verði frábær í leiklistinni. Henni tókst að koma skilaboðum til Bjarna Ármanns í gær um að hann yrði látinn hlaupa í bjölluna, enda maraþonhlaupari mikill. Ég fæ sem sagt að sitja eins og klessa og vera sæt ... og vonandi gáfuð. Um daginn fékk ég spurninguna: „Í hverju ætlar þú að vera?“ Sú manneskja á skilið mikið þakklæti því að ég hefði annars lent í miklum vandræðum. Föt eru ekki mínar ær og kýr. Skrapp í Nínu eftir Skrúðgarðinn og fékk svo góða hjálp við að velja falleg föt að ég mun bera af öllum þeim keppendum fyrr eða síðar sem nokkurn tíma hafa tekið þátt í spurningakeppni á Íslandi, jafnvel í öllum heiminum. Held ég. Hvít skyrta, svart vesti, svartur jakki, svört hálsfesti. Jólafötin komin, líka páska-, bolludags-, hvítasunnu- ...

 
Fór loksins með uppáhaldsúrið mitt í viðgerð til úrsmiðsins í Lesbókinni (Morgunblaðshöll okkar Skagamanna, Tommi bílstjóri býr á efstu hæðinni). Úrið á myndinni hér t.h. er svolítið líkt því. 

Reykvískur úrsmiður hafði metið úrið ónýtt og ég ætlaði loksins að kaupa nýtt úr á keðjuna. Á henni eru fjórir fallegir túrkíssteinar. Þessi frábæri úrsmiður sagði að það þyrfti bara að hreinsa úrið, í því væri gott verk og algjör óþarfi að henda því. Snillingur! Þetta gladdi mig mjög. 

Svona er allt á Skaganum. Konan hjá sýslumanni hér gerði t.d. óumbeðin við ökuskírteinið mitt eftir að hún hafði úrskurðað það í gildi. Bara lítið dæmi.

Athugasemdir

[Jenný Anna Baldursdóttir, 27.11.2007 kl. 15:24]

Ég bíð ógeðslega spennt eftir föstudagskvöldinu og vá hvað ég held með Skaganum.  Það er ekki eðlilegt hvað ég held með þér, honní.

[Guðríður Hrefna Haraldsdóttir, 27.11.2007 kl. 15:34]

Ó, takk, Jenný!!! Ef allir bloggvinir (sem ekki eru hafnfirskir að upplagi) loka augunum og einbeita sér að sigri Skagamanna, senda svörin í hugskeyti og svona, þá held ég að vel gangi. Þótt við sigrum ekki þá verður samt gaman, við Sigrún ákváðum það í gærkvöldi.

Guðmundur, það var frábært að hitta þig. Vonandi kemur þú sem oftast á Skagann!

[Anna Ólafsdóttir Björnsson, 27.11.2007 kl. 15:36]

Hæ og æ, ég þarf að horfa á útsvarið eftir á á netinu. Jólahlaðborð (er að hugsa upp afsakanir, en nei, ég hef svo oft skrópað að ég get varla gert honum Ara það). Svona er þetta með samkvæmislífið, horfði á Álftanes frá Ungverjalandi og núna þarf ég að horfa á þig vinna um miðja nótt. Ég held með liðum sem byrja á A og Á og enda á -nes! Hlakka svo til.

[siggi (IP-tala skráð) 27.11.2007 kl. 15:40]

já mikið verður gaman að sjá þig á sjónvarpsskjánum, ætlar þú að taka að þér hultverkið að látbragðleik?

 siggi

[Guðríður Hrefna Haraldsdóttir, 27.11.2007 kl. 15:50]

Ætla líka að horfa á þetta á Netinu, ef ég þori. Farðu endilega á jólahlaðborð, Anna mín.

Held, Siggi, að Sigrún fari í látbragðsleikinn, hún virkar góð leikkona, þessi elska. Ég ætla að sitja kyrr og vera sæt!  

[Ragnheiður , 27.11.2007 kl. 16:03]

Þó ég aki hvern dag um í Hafnarfirði og hætti á hermdaraðgerðir þá skal ég halda með Skaganum af lífi og sál. Guðmundur er náttlega eðalnáungi, það þekki ég persónulega...ekki verra að hann á líka son sem er eðal líka.

[siggi (IP-tala skráð) 27.11.2007 kl. 16:04]

ævinlega SÆT

siggi

[Þröstur Unnar, 27.11.2007 kl. 16:08]

Vildi hafa þorað til ykkar í Skrúðinn, er bara soooo feiminn.

Í hvaða vin á að hringja?

[Guðríður Hrefna Haraldsdóttir, 27.11.2007 kl. 16:19]

Þið eruð eðalfólk

Þröstur, þú þarft ekki að vera hræddur, við erum voða góð ... Takk fyrir ábendinguna, við þurfum endilega að ákveða hvern við hringjum í. Verst að Tommi strætóbílstjóri (sem veit allt) verður með rokkþátt á Útvarpi Akraness á þessum tíma. 

[Brynja blogg.central.is/skordal_1 (IP-tala skráð) 27.11.2007 kl. 16:41]

Já Ekki spurning það verður sko komið sér kósí fyrir í Lazygörl með osta og næs og horft á útsvar áframm Akranes Hlakka til að sjá þig skvísuna sjálfa í nýju fötunum frá Nínu það fer svo að vera freystandi að koma við í skúðgarðinum á þriðjudögum hummmm...Seigi eins og þröstur er hálf feimin ekkert mál að feysa fólk í netheimum ennn jah læðist kannski með veggjum þar næst

[Guðríður Hrefna Haraldsdóttir, 27.11.2007 kl. 16:49]

Mikið væri gaman að hitta þig, Brynja. Komdu endilega á Skrúðgarðinn, kannski á laugardaginn, þá verður mikið fjör. Útsending Útvarps Akraness verður þaðan sem er snilldarhugmynd!

[Jóna Á. Gísladóttir, 27.11.2007 kl. 18:19]

OMG hvað kona (moi) er illa inni í hlutunum. Hvar og hvenær á ég að horfa á Útsvarsþátt?

Gaman að heyra hversu mikil sveitastemning er á Skaganum; þá meina ég allir svo persónulegir og hjálpsamir. Gleðilegt að úrið skuli veri í góðu lagi.

[Guðríður Hrefna Haraldsdóttir, 27.11.2007 kl. 18:22]

Á föstudaginn (kl. 20.10 held ég). Ef þú ert ekki þeim mun meiri Hafnfirðingur í hjarta þínu þá máttu alveg senda góða strauma ... mín orðin nokkuð stressuð!

[Hulda (IP-tala skráð) 27.11.2007 kl. 19:53]

ekki skemmtilegt þegar eitthvað sem maður eeelskar bilar og einhver ein manneskja úrskurðar það dautt..ónýtt.

reyni að glápa á föstudaginn... eða tek það bara upp á nýju græjuna

[Katrín Snæhólm Baldursdóttir, 27.11.2007 kl. 20:12]

Sko ég verð nebbla komin með sjónvarpstengingu..jamm..sjónvarpskallinn kemur á morgun og þá fær þessi familí hérna LOKSINS sjónvarp og ég hin Hafnfirska mær mun senda hafnfirsk hugskeyti í gríð og erg til liðs skagamanna og svo kemur þú auðvitað bráðum í heimsókn í Vesturbæinn..ha?

Knús með tilhlökkunarívafi.

[Einar Vignir Einarsson, 27.11.2007 kl. 20:23]

Ef mig minnir rétt þá er það þannig með þig innanborðs þá getum við Sagamenn farið að fagna sigri. Ég horfi og sendi góða strauma.

[Guðríður Hrefna Haraldsdóttir, 27.11.2007 kl. 20:39]

Jón Arnar, vona að þú verðir ekki fyrir vonbrigðum. Minni á að sjónvarp bætir um 50 kílóum á fólk, sérstaklega konur (karlar verða bara herðabreiðari og karlmannlegri), og það er eiginlega tímabært að setja nýja mynd hér á bloggið. Þessi er örugglega orðin sjö ára. Guðmundur er í svo miklum afagír að hann myndi frekar hjálpa mér við að verða amma, karlormurinn ...

Hulda og Katrín, hlakka til að fá straumana frá ykkur. Og Einar Vignir, mundu að ég skrökva oft hérna á blogginu, bæði í sambandi við fegurð og gáfur. Annað ýki ég ... og dreg úr hinu. Nú er bara að giska ... heheheheh! Vona að við verðum heppin með spurningar og getum svarað einhverju! 

[Kristín Katla Árnadóttir, 27.11.2007 kl. 21:37]

[Jens Guð, 27.11.2007 kl. 22:10]

Ég hélt að enginn notaði úr lengur.  Það er klukka í öllum farsímum.

[Jensen (IP-tala skráð) 27.11.2007 kl. 23:53]

Hver er þessi galdraúrsmiður?Ég giska að hann heiti,Guðmundur Hannah.      ?

Sá gamli félagi minn er galdramaður í úrum og klukkugaldraverkum. 

[Guðrún Jóhannesdóttir, 28.11.2007 kl. 00:23]

ohh ! maður verður að fara að "rekast inn" á Skrúðgarðinn á þriðjudögum í súpu, aldrei að vita hverja maðaur hittir hehehehe