Eftir páska

Náði líklega hátt í 24 tíma nætursvefni og vaknaði útsofin og sæmilega frísk um kl. 5.50 í morgun. Til að drepa tímann fram að strætóferð var farið í morgunbað, búinn til latte og skipt um parkett í stofunni. Svo var það bara langfyrsta ferð strætó í bæinn (6.41) eftir margra vikna leti og útsofelsi til rúmlega sjö. Sigþóra var ánægð með að fá loksins samferðakonu upp Súkkulaðibrekkuna en við tókum eftir því að katlarnir voru greinilega kaldir hjá Nóa Síríus, engin súkkulaðilykt að þessu sinni. Það var aftur á móti nóg að gera hjá salathollustunni þarna ofar á hægri hönd og verður án efa á næstunni. Það kemur sterk fisklykt inn um gluggann minn núna en miðað við síðustu reynslu af plokkfiski (saltfiskur og bein og vond lykt) þá ætla ég ekki að koma nálægt eldhúsinu í hádeginu.  

Kiddi sat undir stýri á strætó og það er greinilegt að hann hefur afsiðast mikið eftir að ég hætti að fara með fyrstu ferð. Hann stoppaði allt of snemma við skaðræðisbrekkuna á Vesturlandsveginum sem olli því að ég þurfti að fara stóran sveig áður en ég lagði í kvikindið (vegkantinn). Ég er búin að ákveða að fara í skaðabótamál við strætó ef ég fótbrýt mig á þessum stað. Þarna á ekki að vera stoppistöð, þetta er stórhættulegt því auðvitað reynir fólk að stytta sér leið og fetar sig niður háan og stórhættulegan vegkantinn. Sigþóra hefur rúllað þarna niður oftar en einu sinni, þrátt fyrir góða skó, og það er bara ekki sæmandi virðulegum konum. Ég legg ekki í það en er samt alltaf í hættu ... þeir sem rúlla niður gætu nefnilega orðið fyrir bíl sem er á leið upp brekkuna! Skamm, strætó! Ég sat hjá smiðnum alla leiðina í bæinn, hún er alltaf jafnhress. Sigþóra sat hinum megin við ganginn eða hjá Hlina. Afskaplega heimilislegt, vantaði bara Tomma. Ég viðurkenni að það var ansi erfitt að komast upp Súkkulaðibrekkuna, páskaeggjaát, hreyfingarleysi og svona olli ... Ég er enn rauð í framan klukkutíma seinna en heita baðið í morgun og heita kaffið á stoppistöðinni og heita kaffið í vinnunni getur haft eitthvað með það að gera.

Þunn filma af snjó var á Akranesi, eða hvít jörð, en hlýtt og notalegt að labba út á stoppistöð í logninu. Í Reykjavík hafði aftur á móti ekkert snjóað en það var kaldur gustur. Skrýtið að veðrið skuli vera svona ólíkt innan ekki stærra landssvæðis.  

Sorgarfréttir bárust í gær frá elsku bloggvinum mínum, Fjólu Æ og Mumma Guð, en sonur þeirra, Huginn Heiðar, er látinn. Einn laugardaginn fyrir um ári vafraði ég um á Netinu og datt niður á heimasíðu Hugins Heiðars. Eitthvað við skrifin heillaði mig, æðruleysi, takmarkalaus ást á veika barninu og gleði yfir öllum þeim litlu og stóru sigrum sem unnust. Ég las dagbók HH frá upphafi til enda, þótt það tæki marga klukkutíma, þetta voru dagleg skrif frá fæðingu hans 2004. Mér fannst ég þekkja litla gullrassinn og var farið að þykja innilega vænt um hann og fjölskyldu hans. Ekki svo löngu síðar eignaðist ég yndislega bloggvinkonu, Fjólu Æ, og áttaði mig skömmu seinna á því að hún væri mamma Hugins Heiðars, http://fjolan.blog.is/blog/fjolan/entry/483649/. Svo bættist Mummi, pabbi hans, við nokkru síðar. Skrýtið hvað „ókunnugt“ fólk, eða fólk sem ég hef aldrei hitt en finnst ég samt þekkja svo vel, getur eignast stóran hluta í hjarta manns. Ég finn virkilega mikið til með fjölskyldunni í sorg hennar og sendi mínar innilegustu samúðarkveðjur suður eftir.

Athugasemdir

[Arna (IP-tala skráð) 25.3.2008 kl. 10:05]

Ég veit hvaða stoppistöð þú ert að tala um. stórhættuleg

er ekki hægt að senda kvörtun til SVR ?  

[Guðríður Hrefna Haraldsdóttir, 25.3.2008 kl. 10:13]

Jú, ég þarf að gera það! Lét þá vita í fyrra eða hittiðfyrra en ekkert dugði, prófa bara aftur.

[TARA ÓLA/GUÐMUNDSD., 25.3.2008 kl. 11:32]

Mikið ertu heilbrigð kona  ef þetta er satt og rétt, gaman að kynnast slíku. Auðvitað á ég við þetta með að vakna kl 5.50 útsofin, get svo sem vel trúað því, en það er þetta með parketið sem ég er að efast um, og hm líka þetta með að það kallist að sofa út ef sofið er til kl 7. En kæmi mér þó ekki á óvart þegar ég rifja upp hvað ég hef lesið frá þér og um þig gegnum árin og þegar ég minnist Hildu systur þinnar hressu úr Austurbæjarskólanum hérna í gamla gamla...

[Magnús Geir Guðmundsson, 25.3.2008 kl. 11:53]

Hættið að kvarta kellurnar, bara fá sér stafi og brokka með sæmd niður þennan smáhalla haha!

Og fram í eldhús með þig, þarft næringu eftir páskamegrunina!

En svona meir í alvöru, fallegt af þér að minnast þessa litla lífs sem nú er á brott horfið, þú ert með gott hjartalag fröken Guðríður!

Ættir svo bara að "misnota" Vikuna eða eitthvert annað blað til að hreifa við strætóbákninu!?

[Guðmundur G. Hreiðarsson (IP-tala skráð) 25.3.2008 kl. 12:41]

Hjá okkur var boðið upp á eitthvað "grænmetisstrúdel"; algjör viðbjóður og næringarinnihaldið vísast nálægt lágmarki.[börrrrgh]

[Ásdís Sigurðardóttir, 25.3.2008 kl. 14:34]

Svefninn er góður og líka gott að fara að vinna aftur. Farðu vel með þig í vikunni og ég vona að veðrið verði hagstætt í metrum.

[Lilja Guðrún Þorvaldsdóttir, 26.3.2008 kl. 01:36]

Hressandi að lesa pistlana þína.  Takk fyrir það, og ég öfunda þig að vera búin að skella parkettinu á, dugleg ertu, og svona snögg að því.   Mér gengur eitthvað svo illa með smellurnar á mínu parketti, svo ég gafst upp í bili.