Nýr strætóbílstjóri og nýtt bold ...

Lagði ekki í plokkfiskinn í hádeginu ... Heyrði samt fólk í kringum mig segja hann ágætan. Var samferða Sigþóru heim í fjögurstrætó. Undir stýri var enginn Gummi, heldur nýr og bara sæmilega útlítandi bílstjóri á óræðum aldri. Miðað við skólastrákinn minn sem reyndist vera rígfullorðinn afi á aldur við mig segi ég bara að hann sé á aldrinum 30-50 ára. Hann keyrði nokkrum sentimetrum of langt á Garðabrautinni þannig að fegurð hans minnkaði ögn í huga okkar Hlina. Sigþóra fékk hláturskast í strætó. Stelpan fyrir aftan okkur lét símann sinn hringja endalaust og hringingin var barnshlátur, afar smitandi nema fyrir lífsreyndar konur eins og mig sem afplána þennan hlátur í símum í vinnunni á hverjum degi. Ég sneri mér við og bað ungu stúlkuna vinsamlegast að hætta þessu svo ég fengi frið til að lesa. Fúl á móti? Nei, ég var bara að stríða henni. Hún hafði ógurlega gaman að viðbrögðum Sigþóru sem hristist öll. Það þarf svo sem ekki mikið til að koma henni til að hlæja. Bókin sem ég er að lesa heitir Jaðiaugað og er spennubók. Hún er rosalega skemmtileg, samt er spennan ekki enn hafin, enda er ég rétt byrjuð á henni.  

Nick er að fara yfir um af afbrýðisemi út í hálfbróður sinn, Ridge. Honum finnst Brooke gefa Ridge loðin skilaboð og hreinlega æsa hann upp í viðreynslu. Þegar Brooke kemur inn á skrifstofuna sér hún að Nick hamast á málverki af Ridge og tætir það í sig með fótunum, mögulega málverk eftir Da Vinci. Nick fölnar svo þegar hann kemst að því að fyrrverandi kærasta hans og núverandi tilvonandi stjúpdóttir, Bridget, er skotin í Dante sem lenti í því þarna um daginn í fráhvarfi að biðja Feliciu sem tekur því svo vel ... og hratt. Stefanía er hætt við að reyna að senda hann sem útlendingsræfil úr landi og býður hann velkominn í fjölskylduna. Carlos, frændi Dante, horfir ástríðufullum augum á Bridget og segir með ítölskum pastahreimi: „Þú ert ekki hamingjusöm!“ Bridget lætur sig hverfa, alveg í rusli. Stefanía tekur eftir því og líka þegar Bridget og Dante láta sig hverfa saman nokkru síðar til að tala um vonlausa ástina sem þau bera hvort til annars. Þau kyssast og láta sig hverfa inn í geymslu.

Fyrir þá sem ekki vita þá eru Bridget og Felicia hálfsystur. Felicia fær flott brúðarslör, Feneyjablúndu, frá tengdó og sjokkerar þau þegar hún spyr hvort hún megi ekki láta lita það svart ... í stíl við brúðarkjólinn sem pabbi hennar er að hanna og láta sauma. Stefanía varar Dante við en hann lætur ekki segjast, hann vill opinbera trúlofun sína og Bridgetar í þessari trúlofunarveislu hans og Feliciu. Bridget má ekki heyra á það minnst. Ridge sendir Brooke blautleg skilaboð, mynd af nærfatalínunni sem hún mun líklega sitja fyrir í og segist hlakka til mátunarinnar. Já, og Bridget verður brúðarmær í brúðkaupi Feliciu og Dante, mannsins sem hún elskar.

Athugasemdir

[Þröstur Unnar, 25.3.2008 kl. 18:19]

Djísús, inni í geymslu. Þoli varla spennuna. Meira, meira, meira.

[Lára Hanna Einarsdóttir, 25.3.2008 kl. 19:01]

Rosalega er Bridget eitthvað glæsikvendisleg á þessari mynd...  Og Ridge og Brooke bara komin í klassísku línuna með hatta og alles...  

[Linda Linnet Hilmarsdóttir, 25.3.2008 kl. 19:07]

Innlitskvitt

[Ásdís Sigurðardóttir, 25.3.2008 kl. 19:28]

Ég held að það sé skemmtilegra að Boldinu sem prentuðu máli hjá þér frekar en í mynd 

[Tiger, 25.3.2008 kl. 21:17]

 Þokkalega miklar flækjur alltaf í þessari fjölskyldudrama í boldheimum.. en gaman að fá smá innsýn þangað hjá þér. Knús inn í vinnuvikuna þína Gurrí mín..

[Hulda (IP-tala skráð) 25.3.2008 kl. 21:23]

ég er orðlaus eftir boldið

[Jenný Anna Baldursdóttir, 25.3.2008 kl. 23:08]

Ofsalega eru þetta glaðir farþegar.  Það á að setja þessa mynd á auglýsingaspjald fyrir Strætó b/s.

Hvaða bold eru allir að tala um?

[jensen (IP-tala skráð) 25.3.2008 kl. 23:27]

Strætó og Bold.,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,enn og aftur,,,,,,,,,,,,,,,,,,,,,,,,,,,ritstífla ????

[Guðríður Hrefna Haraldsdóttir, 25.3.2008 kl. 23:47]

Jensen minn, bold og strætó er lif mitt, allt annað er bara hjóm! Vissi ekki að þér leiddist strætó og bold.

Jenný, góða fólkið af google.com yrði örugglega mjög ánægt með að auglýsa fyrir strætó ...

[Marta B Helgadóttir, 26.3.2008 kl. 00:17]

Frábært

[Lilja Guðrún Þorvaldsdóttir, 26.3.2008 kl. 01:42]

Aumingja Bridget, skyldi henni takast að komast í gegnum þetta, ég er ekki viss!!

[kikka (IP-tala skráð) 26.3.2008 kl. 09:46]

Æi takk Gurrí mín. Gleðst alltaf yfir smá Bolding fréttum og nú ertu búin að spara mér áskrift að stöð 2 í .. ja ansi langann tima. Hefurðu eitthvað frétt af Amber???

[Guðríður Hrefna Haraldsdóttir, 26.3.2008 kl. 09:52]

Það hefur ekkert frést af Amber, ekki síðan hún bjargaði Ridge minnislausum úr klónum á rauðhærða kvendinu, var það fyrir eða eftir þegar hann komst að því að Bridget var ekki blóðskyld honum (systir) og þau fóru aðeins að dillast saman? Amber ætlaði að sanna eitthvað, man ekki af hverju ... og var rétt búin að drepa þau. Jammm.

[Kjartan Pálmarsson, 26.3.2008 kl. 10:05]

Alltaf gaman að fá svona strætósögur, vildi gjarna hafa þær BOLD-LETRAÐAR

[Vertu með á nótunum, 26.3.2008 kl. 10:14]

[Obersturmbahnführer Guðmundur (IP-tala skráð) 26.3.2008 kl. 13:25]

Fín mynd af Marlene!

Hún er ábyggilega að segja: Komm, Liebling komm. [ARGRGRGRGRGRrrrr).

[gua, 26.3.2008 kl. 15:38]

Ég öfunda þig að geta lesið í strætó, ef ég svo mikið sem sé bók þá æli ég.