Vorið ... ekki bara dans á rósum

Það var ekki séns að vakna kl. 6.15 í morgun eftir að hafa bylt sér fram á nótt. Leyfði Kubbi að stjórna svefnstellingu minni allt of lengi, þráðbein á bakinu-stellingin ... og slíkt ætti maður ekki að gera. Hún lá ofan á maganum á mér og hraut værðarlega. Færði mig löturhægt á hægri hliðina (þá dreymir mann víst frekar) og reyndi að móðga ekki læðuna hugumstóru í leiðinni ... og þannig sofnaði ég fyrir rest en dreymdi fátt. Huggulegi strætóbílstjórinn sat undir stýri í Gumma stað og tilkynnti snöktandi farþegum í saknaðarkasti að Gummi væri á Kanarí. Svikarinn ... Nú kemur hann brúnn og afslappaður til baka, beint í bardagann mikla, árlegu slagsmálin þar sem undanrennubláir Íslendingar reyna að berja af sér nývaknaðar geitungadrottningar. Vorið er sannarlega ekki bara dans á rósum!

Á leiðinni í bæinn sagði sessunautur minn, ung og falleg kona, frá mjög svo óskemmtilegum aðstæðum sem hún lenti einu sinni í á vinnustað. Samstarfsmaður hennar lagði á hana ofurást og var þess fullviss að ástin væri endurgoldin. Miklar ranghugmyndir í gangi, gaf gjafir, sendi henni sms á öllum tímum sólarhringsins ... endaði með löggu og hvaðeina. Hvernig þýðir maður orðið STALKER yfir á íslensku? Er STOKKARI nógu gott orð? Hvað segja íslenskusnillingar? Umsátursmaður er ekki nógu gott, tengist frekar stríði, skæruliðum og slíku, er það ekki?

Það má segja að ég sé með vottorð í leikfimi. Beta sjúkraþjálfari vill meina að ég eigi ekki að leika í Útsvari á morgun. Þarf oft ekki nema eina ranga hreyfingu til að fá í bakið ... Máni harðneitar leiklistinni og ætlar að hlaupa. Held að hlauparinn mikli sé í Kópavogsliðinu, þessi sem hljóp konuna niður sí og æ og skildi hana eftir í blóði sínu fyrir neðan sviðið í einum þættinum, minnir mig. Hann á ekkert í Mána! Að auki er Máni að læra lögfræði og getur farið í mál ... Jamm, ég finn að smástress laumast lævíslega að himnaríkisfrúnni. Ætla rétt að vona að það verði brjálað að gera á morgun í vinnunni svo ég geti unnið til að gleyma! Garggggg ... svo næ ég ekki í Bjarna, meðkeppnisvein minn, til að biðja hann um að æfa sig í leiklist. Ég lofa að vera vel sofið og ákaflega góður giskari!!!

Athugasemdir

[Jenný Anna Baldursdóttir, 27.3.2008 kl. 10:43]

Elsku stelpan.  Farðu varlega með bakið.  Úff dauðvorkenni þér. 

[Vera Knútsdóttir, 27.3.2008 kl. 10:48]

Tja samkvæmt orðabók er stalker einhver sem situr um einhvern, spurning að þýða það sem umsitjari eða eltari. Ég er hrifnari af umsitjari.

Leiðinlegt að geta ekki séð næsta útsvar (eða er það sýnt á ruv.is?). Ef það er sýnt á netinu þá mun ég fylgjast með og senda ykkur réttu svörin með hugskeyti, ég er sko fáránlega góð í slíkum skeyta sendingum þannig að Gurrí þú verður að fínstilla móttakarann  

Break a leg (hvernig væri að þýða það á íslensku?)!!!!  

[Lára Hanna Einarsdóttir, 27.3.2008 kl. 11:00]

Ef Akranesliðið vinnur skora ég á bæjarstjórnina að gera Himnaríkisfrúna að heiðursborgara Akraness! 

[Jóhanna (IP-tala skráð) 27.3.2008 kl. 11:06]

Þetta var ekki hvaða kona sem er þetta var eðaltöffarinn og Álftnesingurinn Vigga, sem var hlaupinn ansi illa niður. Segðu Mána bara að hlaupa hans niður frá mér.

En gangi þér annars svakalega vel á morgun og ég horfi spennt á það frá útlandinu....

[Brynja skordal, 27.3.2008 kl. 11:10]

já passaðu bakið mín kæra og farðu snemma að sofa í kvöld Je minn hvað þetta verður spennandi annað kvöld áframm Akranes

[hrund hauksdóttir (IP-tala skráð) 27.3.2008 kl. 11:17]

Auður Haralds kom eitt sinn með þá hugmynd að snúa mætti orðinu stalker yfir á fylgja ...

FYLGJAN - gæti verið titill á Steven King hrollara

[Guðríður Hrefna Haraldsdóttir, 27.3.2008 kl. 11:22]

Arrggg, já, svo er ég búin að tala við elskuna hann Bjarna sem ætlar að æfa sig heima í leiklist í kvöld og leika svo í þættinum á morgun. Þar minnkaði stresssið allsvakalega. Hanna, svo bið ég að sjálfsögðu Mána um að hlaupa hlauparann ógurlega niður á morgun, hvernig gat ég gleymt því að þetta var frú af Álftanesinu? Þess verður hefnt enn frekar fyrir bragðið.

Já, Vera, þetta verður sýnt á www.ruv.is. Held að þú getir horft í c.a. hálfan mánuð á eftir!

Lára Hanna, tek undir hvert orð ... hummmm, eða þannig. Heiðursborgari á launum ... þá gæti ég spásserað um bæinn og laðað þvílíkt að ferðamenn, svarað spurningum þeirra um hin ýmsu mál og svona .... eheheheheheheheh

Umsitjari segir í raun allt, orð sem þarf þó að venjast!

[Guðríður Hrefna Haraldsdóttir, 27.3.2008 kl. 11:24]

Fylgja, umsitjari, eltari ... er ekki orðið í miðjunni einna skýrast? Fylgja er mikið notað orð hjá dulrænu fólki og ljósmæðrum ...

[Lára Hanna Einarsdóttir, 27.3.2008 kl. 12:28]

Gurrí...  heiðursborgarar eru líka skattlausir - þ.e. þurfa ekki að borga útsvar í viðkomandi sveitarfélagi. Kannski fá þeir eitthvað fleira frítt. Er ekki bráðnauðsynlegt að laða að fleiri innlenda og erlenda ferðamenn til Akraness? Rakið tækifæri!

[Guðmundur G. Hreiðarsson (IP-tala skráð) 27.3.2008 kl. 12:45]

Hehehe. Hvergi óhult. Allsstaðar verið að gauka að þér lífsreynslusögum -meira að segja í Skagavagninum við sólarupprás.

[Svanhildur Karlsdóttir, 27.3.2008 kl. 12:56]

Ætla að reyna að muna eftir þættinum á morgun......

farðu vel með þig

[tanta (IP-tala skráð) 27.3.2008 kl. 13:16]

verð með þér í huganum á morgun missi af þættinu ætla að vera í París.

kveðja úr neðri Bláfjöllum Tana

[Steingerður Steinarsdóttir, 27.3.2008 kl. 14:28]

Jamm Gurrí mín, kannast við köttur í rúminu próblemið og óhjákvæmilega bakverki sem því fylgja. Ég vona að ég geti fylgst með þér á morgun en ég verð stödd á Hótel Glym þannig að hugsanlega verður lítð um sjónvarpsgláp. Gangi þér vel.

[Birna Dis Vilbertsdóttir (IP-tala skráð) 27.3.2008 kl. 14:55]

Fylgjan og undanrennubláir Íslendingar. hahahahahahahaha,Dásamleg orð.Gangi þér vel á morgun

[Hildigunnur Rúnarsdóttir, 27.3.2008 kl. 15:38]

Fylgja er allt of jákvætt.  Eltihrellir hef ég heyrt, svo mætti finna eitthvað draugaorð, til dæmis móri?

[Borghildur Anna (IP-tala skráð) 27.3.2008 kl. 16:17]

Hvernig væri eltir ? Eða jafnvel umsátari? Gefur ýmsa möguleika, svo sem... umsátarinn minn verður sífellt kátari ... þauleltir dæmdur í þrefalt nálgunarbann ...

[JóhannaH (IP-tala skráð) 27.3.2008 kl. 22:58]

Ég er skotnust í orðinu eltihrellir sem KRÓi prjónaði einu sinni handa mér þegar ég var í basli með orðið ljóta. Það vakti miklar og grimmar umræður. Gaman að orðapælingum.

[Helga Magnúsdóttir, 27.3.2008 kl. 23:22]

Hvað með skuggi? Einhver skuggalegur að læðast á eftir þér.