Kokkurinn hringsparkaður og líklega meinlausir Indverjar

2.7.2008 | 10:35

Kokkurinn hringsparkaður og líklega meinlausir Indverjar

Yndisleg strætóferðin í morgun. Flott rúta flutti okkur í Mosó og það var ekkert erfitt að líta svolítið niður á hina bílana, svona þannig. Það var þónokkur bílaumferð í morgun og skrambi hvasst á köflum á Kjalarnesinu. Það vantar alveg annan vindmæli þangað. Þessi eini er staðsettur rétt áður en maður ekur niður í Kollafjörðinn áleiðis í bæinn. Þar er oft hvasst en oft er miklu klikkaðra á milli gangna og Grundarhverfis. Stökk léttilega út úr 27 í Mosó þrátt fyrir að hafa misreiknað fjarlægðina niður, enda hoppið úr mun hærri vagni en venjulega, hálfgerðri fjallarútu, það hefði kostað sjúkrahúsvist á tímabilinu fyrir Betu en ég missteig mig ekki einu sinni núna, bara hló tryllingslega innra með mér yfir þessum bata. Þeir (40-50) sem halda að elli kerling sé farin að angra þá ættu að prófa eitt stykki sjúkraþjálfun áður en lagst er í kör ...

Elsku Indverjinn minn var í leið 18 og við brostum hvort til annars og buðum góðan dag, ég fattaði þegar ég hafði sleppt orðinu að ég notaði óvart úrdú eins og bjáni. Góðan dag á úrdú táknar nefnilega kjánaprik/geitahland á hindí. Hefði getað orðið alvarleg móðgun en ég bjargaði því með skærum hlátri og orðinu djók, sem táknar það sama á öllum tungumálum heims.

Ég sat allt of framarlega í vagninum, pínulitla vagninum sem notaður er fyrir leið 18, og sá því miður ekki hvort allir karlarnir mínir væru með, það grillti alla vega hvergi í þann ógreidda. Indversku tölvusnillingarnir fóru óvænt út á sama stað og ég, okkur þýðandanum til mikillar skelfingar, við tókum á rás og hlupum hratt hönd í hönd að bakdyrum hússins okkar og ég opnaði skjálfandi á meðan hann setti sig í karatestellingu. Indverjarnir horfðu vingjarnlega á okkur þegar þeir gengu framhjá, annað hvort svona lúmskir eða bara meinlausir. Slíkir útlendingar eru til, skilst mér.

Þar sem adrenalínið var hvort eð er komið í gang tók ég hringspark (a la Chuck Norris, sjá mynd) á kokkinn þegar ég gekk í gegnum matsalinn og sagði honum að ef hann byði nokkurn tímann aftur upp á „nýja ýsu“ sem væri þannig útlítandi að Guðný spyrði mig hvort þetta væri síld, þá yrði mér að mæta. Það gerðist einmitt á mánudaginn síðasta. Það kreppir víða að og sparnaður orðinn geigvænlegur.

Eigið dásamlegan dag!

Flokkur: Bloggar | Facebook

Athugasemdir

Sömuleiðis Gurrí mín. Ég var líka að koma úr fríi og er loksins í netsambandi.

Steingerður Steinarsdóttir, 2.7.2008 kl. 10:42

Velkommmm til umheimsins, frú Steingerður. Vona að það hafi verið gaman hjá þér í fríinu!

Guðríður Hrefna Haraldsdóttir, 2.7.2008 kl. 10:54

Ég held að þú hljótir að vera eina manneskjan í heiminum sem getur talað um strætóferðir þannig að allir hafi gaman af. Einstakur hæfileiki sem þú hefur, frú Guðríður.

Helga Magnúsdóttir, 2.7.2008 kl. 10:54

Góðan daginn. Getur þú kennt mér svona Chuck Norris spark ? Gæti komið sér vel

Svava S. Steinars, 2.7.2008 kl. 10:55

Ég er sammála henni Helgu, þú gerir hversdagslega hluti að upplifun.

Annars er ég í kasti yfir launfyndinni sem þú ert sérfræðingur í. Urdú!! Ég dey.

Jenný Anna Baldursdóttir, 2.7.2008 kl. 11:07

"Elsku Indverjinn minn var í leið 18 og við brostum hvort til annars og buðum góðan dag, ég fattaði þegar ég hafði sleppt orðinu að ég notaði óvart úrdú eins og bjáni.Góðan dag á úrdú táknar nefnilega kjánaprik/geitahland á hindí."

Get ég komið í kennslu til þín í úrdu og hindí?

Edda Agnarsdóttir, 2.7.2008 kl. 11:13

Hvar var ógreiddi maðurinn?

Lára Hanna Einarsdóttir, 2.7.2008 kl. 11:51

Ógreiddi maðurinn var bak við Indverjana, Lára Hanna, eða hann svaf yfir sig og var ekkert í strætó. Kunni ekki við að kíkja of mikið aftur fyrir mig.

Kenni Úrdu, hindí, serbókróatísku, swahilí og fleira, Edda :) Risaknús á rest!

Guðríður Hrefna Haraldsdóttir, 2.7.2008 kl. 12:11

Ég var einmitt að velta því sama fyrir mér og Lára Hanna.

Jóna Á. Gísladóttir, 2.7.2008 kl. 16:03

Áttu einhverjar bíómyndir með Chuck?? eru þær kannski ofarlega á óskalista fyrir afmælið þitt?? eða kannski ég gæti fengið Chuck til að mæta í eigin spurningu, hann þarf ekki flugvél, hann bara ákveður að vera hjá þér og þá er það þannig. Knús á þig dúllan mín