Kettlingskrútt í Skrúðgarðinum

Kíkti aðeins í Skrúðgarðinn eftir sjúkraþjálfun og sá að starfsfólkið þar var í stökustu vandræðum með lítinn kettling í óskilum, þrílitan og algjöra kelirófu. Ekki nema um tveggja til þriggja mánaða og rataði greinilega ekki heim. Hann er með ól og bjöllu en ekkert nafnspjald. Ef einhver Skagamaður situr nú í öngum sínum og finnur ekki kettlinginn sinn, læðu eða högna, þá er lag að skreppa niður í Skrúðgarð og ná í dúllurúsínuna. Of mikil bílaumferð er á Kirkjubrautinni til að óhætt sé að sleppa honum lausum og skiptast gestir og gangandi á að halda á honum. Ég tók hjartkæran innanbæjarstrætó heim og bílstjórinn, sem er gjörkunnugur öllu og öllum, lofaði að fylgjast með fólki í kettlingsleit. Ef enginn eigandi gefur sig fram í dag mun kettlingurinn mögulega koma hingað í himnaríki ... og gera allt vitlaust þar til eigandinn finnst. Held að það yrði aldeilis upplit á Tomma og Kubbi!

Athugasemdir

[Magnús Geir Guðmundsson, 19.8.2008 kl. 15:20]

Halló sæta kattamamma, bara stutt kíkk, átt núna viku afmæli á nýja ungdómsæviskeiðinu!

[Ásdís Sigurðardóttir, 19.8.2008 kl. 16:03]

Ég legg enn og aftur til að við breytum þessu með aldurstal, við erum núna fimmtugs, fimmtíu og eitthvað, svo verðum við sextugs, sextíu og eitthvað.  Kapíss??  ó þú hefur svo gott hjarta, enginn köttur þyrfti að þjást ef þú réðir heiminum. Þú ert nú í himnaríki og ættir að fá að ráða smá meira, ekki satt?      

[Brynja skordal, 19.8.2008 kl. 16:09]

Ææ vonandi finnst eigandin fljótt vont að tapa kisu litlu en mikið eru þær góðar þarna í skrúðgarðinum að passa hana og þú fyrir að ætla að bjarga henni ef engin fynnst sem á hana en er þetta myndin af kisu?

[Guðríður Hrefna Haraldsdóttir, 19.8.2008 kl. 17:45]

Þetta er "sviðsett" mynd af kisu, gerð af google.is ... en samt ekkert rosalega ólíkt henni. Veit nú ekki hvort ég gæti tekið hana að mér, Anna, en væri til í að leyfa henni að vera hérna þar til heimili hennar finnst.

Já, Ásdís, er heldur betur til í þetta.

[Ásdis (IP-tala skráð) 19.8.2008 kl. 18:38]

Tek undir með nöfnu minni, reyndar held ég að allir kattarvinir eigi vísa vist í himnaríki:) Gaman að sjá hvað margir eru með stórt hjarta og gefa af sér.

[Jóhanna Sigrún Jónsdóttir, 20.8.2008 kl. 00:05]

Sæl öll !

Vonandi finnst eigandinn. Gurrý ég er líka með fallegan hund sem vantar heimili.

Voðalega sætur hundur hreinræktaður american cokker spanel rúmlega eins árs. Þetta er stelpuhundur og heitir Tinna.

Endilega láttu berast..

kv Hanna Rúnsí fyrrverandi skagakelling

[Guðrún Ágústa Einarsdóttir, 20.8.2008 kl. 13:05]

æji litla krúsímúsin..vonandi finnst eigandinn hennar/hans..en ég skil ekki afhverju fólk merki ekki dýrin sín, það er ekki nóg að setja bara ól en ekkert merkispjald. kv Gunna.