Símtöl, misskilningur og fullt af boldi ...

Fékk skemmtilega upphringingu áðan frá gamalli nágrannakonu í bænum. Hún vinnur við nýja, íslenska spennuþætti sem verið er að taka upp fyrir sjónvarp og vantaði góða manneskju til að sjá um kaffið ofan í mannskapinn á mánudaginn þegar tökur fara fram rétt við Akranes. Hefði hlaupið til sjálf ef ég væri ekki að fara að vinna. Er búin að finna góða og hressa Skagakonu í verkið og henni fannst þetta bara skemmtilegt. Samt sagði ég henni að það væri ekkert víst að Baltasar Kormákur væri einn leikaranna. Hún hló bara og sagðist eiga svo sætan karl að það skipti engu ... hehehe

Í vikunni fór ég á góðan og fróðlegan fund hjá Rauða krossinum vegna komu palestínsku flóttakvennanna á Skagann. Að mörgu þarf að huga og m.a. tungumálamisskilningi ... Flóttamannafjölskylda, sem hafði verið um hríð á Íslandi, fékk bréf frá Rauða krossinum sem hófst á Kæra fjölskylda. Konan sem opnaði bréfið þekkti orðið fjölskylda en fletti upp í orðabók á kæra ...

BOLD: „Þessi rotta er að plana eitthvað, sérstakan kvöldverð kannski,“ sagði slökkviliðsmaðurinn Hector áhyggjufullur og átti við Shane, garðyrkjumanninn grunsamlega, sem hefur ofurást á Phoebe og hún þorir ekki að hafna því að hann er lykilvitni í réttarhöldunum gegn Taylor, móður Phoebe. Nokkuð er til í þessu þar sem sérstakur kvöldverður bíður Phoebe, kertaljós og krúttlegheit. Hún sendir Shane út í vínbúð til að kaupa kampavín og hringir síðan óttaslegin í Hector. Verst að Shane hafði gleymt veskinu og kom til baka þegar hún var að tala ... og hafði líka nýlega uppgötvað ljósmyndir af sjálfri sér uppi á vegg hjá Shane.

Harry, vinur Phoebe, og ég veit ekkert um, keyrir í ofboði og finnur heimili Shane og bankar upp á. Hann vill bjarga dömunni sem vill þó ekki láta bjarga sér, segist ráða við þetta. Phoebe segir við Shane að hún laðaðist vissulega að honum en væri ung og þetta gengi allt of hratt fyrir sig. Réttarhöldin eiga að vera daginn eftir og þau gætu vonandi fagnað saman eftir þau. Shane gleðst við þetta.

Saksóknari kallar dr. Taylor (geðlækni) lygara og morðingja í opnunarræðu sinni og kviðdómurinn horfir á doktorinn með viðbjóði. Þetta verður erfitt verk fyrir Storm lögfræðing sem er, held ég, bróðir Brooke.

Bridget talar við barnsföður sinn, Dante, mann og barnsföður Feliciu, systur Bridgetar, og segir að hún sé búin að missa fóstrið. „Ó, ég trúi þessu ekki, barnið okkar!“ segir Dante. „Ég er svo misheppnuð,“ segir Bridget en þetta er í annað skipti sem þessi elska missir fóstur.

Shane kemur ekki sérlega vel fyrir í vitnastúkunni, enda hefur hann unnið sem garðyrkjumaður hjá Taylor í einhverja mánuði og saksóknari lætur hann líta út fyrir að vera tryggan starfsmann sem myndi ljúga fyrir atvinnuveitanda sinn.

Þegar Storm verjandi gagnspyr Shane og er kominn vel af stað þarf dómarinn að gera hlé til næsta morguns ... og Phoebe í djúpum skít, þarf að hitta ógeðið hann Shane ... Harry liggur í leyni og þegar Shane gerist nærgöngull stekkur hann fram og kýlir Shane. Shane kýlir til baka og Harry rotast. Hector, sem BB-aðdáendur vita að blindaðist í eldsvoða, kemur með beisbollkylfu og slær út í loftið. Þátturinn endar áður en áhorfandinn fær að vita hvort hann hitti Shane eða Phoebe! Það blæðir alla vega úr einhverjum ...

Símtal áðan: „Ég ætla að vera rosalega góð við þig ... og kynna þig fyrir Herbalife!“ Ég keypti auðvitað margra ára birgðir og svo er ég líka að hugsa um að verða Vottur Jehóva eftir fróðlegar heimsóknir undanfarið ...

Athugasemdir

[Anna (IP-tala skráð) 30.8.2008 kl. 14:40]

hehe "kæra" þannig að þau hafa haldið að þetta hafi verið kæra á þau. Æji greyin

Takk fyrir þetta bold "update" , missti einmitt af endursýningunni áðan og er alltaf að vinna þegar það er sýnt. Ætli hann hafi ekki rotað Phoebe greyið síðan, hjálplegi slökkviliðsmaðurinn hvað!? :D

[Jenný Anna Baldursdóttir, 30.8.2008 kl. 15:08]

Ég sá umfjöllun um þessar skelfilegu flóttamannabúðir í gærkvöldi held ég.  Mikið held ég að það hljóti að vera mikill léttir fyrir konurnar og börnin að komast þaðan í burtu.  Og mér sýnist eins og Akranes hljóti að vera góður staður.  Allir boðnir og búnir til að taka vel á móti þessu fólki.

Þið eigið heiður skilinn.

[Kjartan Pálmarsson, 30.8.2008 kl. 15:33]

Gaman að vita að alltaf er jafn gaman í þínum bekk

Svo vona ég að innan flóttamannahópsins leynist góðir knattspyrnumenn sem eitthvað geta hjálpað til við að byggja upp Skagamannaveldið á nýjan leik

Bold kveðjur í bíbb-veldi

[Þröstur Unnar, 30.8.2008 kl. 16:07]

What! Þekktirðu ekki Herbalife sjálfan. Hann er frábær jafnt fyrir granna og hrausta sem og Bold trausta.

Sá þessa frétt í gær og svei mér þá ef mig langaði ekki til að knúsa bara den hele family.

[Aprílrós, 30.8.2008 kl. 17:30]

Góða helgi mín kæra ;)

[Anna Ragna Alexandersdóttir, 30.8.2008 kl. 19:24]

Góða helgi

[Anna Ólafsdóttir Björnsson, 30.8.2008 kl. 22:34]

Úpps, kæra ... ég var líka næstum farin með pólska smiðinn sem vann fyrir okkur (æja, þú hittir einmitt hann Henrik) á körfuboltaleik, þegar hann langaði í kirkju, við fórum línuvillt í orðabókinni.

[Ásdís Sigurðardóttir, 30.8.2008 kl. 22:46]

Kæra Gurrý - done,  kæra borgarstjóran- done.  Eins gott að passa sig.  Takk fyrir boldið, bíð spennt eftir að fá að vita hvern hann sló.