Heimsókn, hittingur og klikkuð syfja ...

Þrátt fyrir klikkaða syfju ákvað ég að vaka eftir Jon Stewart en fyrsti þátturinn hans var á Stöð 2 í kvöld, seint. Hefði eflaust notið hans betur ef ég hefði náð blundi í dag en fannst samt gaman. Fékk líka skemmtilega heimsókn fyrr í kvöld ... en Katrín Snæhólm og Zordís kíktu í himnaríki, sú síðarnefnda í fyrsta sinn. Þær komu með gulrótarköku úr Björnsbakaríi og fengu guðdómlegt kaffi. Zordís færði mér frábært verk eftir sig, það fer beint á vegg í eldhúsinu sem hefur beðið eftir flottri mynd frá upphafi. Ég var farin að geispa eins og algjör dóni ... enda bara fimm tíma svefn sl. nótt. Það verður gott að sofa út í fyrramálið.

Eftir sjúkraþjálfun, súpu og salat á Skrúðgarðinum var orðið stutt í hittinginn við flóttakonurnar en hann var haldinn í Þorpinu, flottu unglingamiðstöðinni á Skaganum. Mjög gott var að hafa túlk en annars gengur okkur Línu bara vel að skilja hvor aðra. Leiklistarferill minn í Heilsubælinu í gamla daga (ég var bláa öxlin sem sást stundum í) hefur greinilega skipt sköpum. Við fengum ensk-arabískar orðabækur í dag, litlar og handhægar, og þær eiga eftir að koma sér vel þrátt fyrir leikhæfileikana.

Börnin léku á als oddi, búin að hvílast eftir ferðalagið langa, og unglingarnir litu ekki upp úr tölvunum. Eitthvað kannast maður við það ...

Litlan mín steinsvaf allan tímann í sófa í salnum þar sem við hittumst og rumskaði ekki þrátt fyrir hávaða í hinum börnunum. Yngsta barnið í hópnum, lítill krúttmoli, bræddi mannskapinn en hún var virkilega fjörug og athafnasöm, var uppi í fanginu á öllum, teiknaði á næstum allt sem hún náði í og prófaði snóker við litlar vinsældir strákanna minna sem voru í miðjum leik. Konunum fannst einstakt að heyra að innanbæjarstrætó hefði flaggað í tilefni af komu þeirra í bæinn og við Lína ætlum einmitt saman í strætóferð á föstudaginn með krakkana. Besti samgöngumátinn og krakkar elska að vera í strætó.

Virkilega fínn og skemmtilegur dagur. Væri reyndar alveg til í að „endurtaka“ heimsókn Katrínar og Zordísar og vera þá ögn meira á lífi ... Vonandi koma þær aftur áður en Zordís flýgur heim til Spánar. Henni virðist hafa gengið hreint ágætlega að aðlagast menningunni ytra, mataræðinu, tungumálinu og fleira ... lætur bara vel af búsetu sinni á suðlægum slóðum þótt hún geti reyndar ekki nálgast þorramat þar.

Athugasemdir

[Jenný Anna Baldursdóttir, 10.9.2008 kl. 00:52]

Úff ég grét yfir Kastljósinu.  Þessi litla sofandi stal úr mér hjartanu.

Knús á þig elsku Gurrí.

[www.zordis.com, 10.9.2008 kl. 01:23]

Þú hefur undurfagra kirtla Frú Gurrí!

hehhehhe .... hrútspungar, selshreifar og hákarl er það sem heldur íslendingnum í mér vakandi

[Agný, 10.9.2008 kl. 01:36]

Vonandi að allir taki jafnvel á móti hópnum og þú Gurrý en því er ekki vist að svo verði ...Því miður eru ansi margir íslendingar bölvaðir kynþátta og útlendinga hatarar inn við beinið..þó þeir þykist svo þess á milli að vera að drukkna úr náungakærleika...og víðsýni.. Kveðja úr Nesinu...

[Ragnheiður , 10.9.2008 kl. 08:33]

Ó það er svo gaman að fá að fylgjast með þessu hérna hjá þér. Gæðablóðinu heima hjá mér var eins farið og Jennýu, það blikaði á tár á hvörmum hjá gamla mínum. Hann er ofsalega ánægður með að þau séu hingað komin og ég fullvissaði hann um að það færi ekki illa um flóttafólk í höndum Gurríar og annarra Skagamanna

[Edda Agnarsdóttir, 10.9.2008 kl. 09:19]

Gurrý mín, takk fyrir færslurnar undanfarið, sko extra takk! Það eru margir í Brekkubæjarskóla sem fylgjast með blogginu þínu, sérstaklega núna og kaffitímar fara í umræður um þig og þína nýju!

Knús krútta.

[Margrét (IP-tala skráð) 10.9.2008 kl. 10:00]

Guðríður bara að þakka fyrir þitt framlag.Tek undir það sem komið er:)

[Helga Magnúsdóttir, 10.9.2008 kl. 10:47]

Ég tek undir það að maður varð ansi meyr þegar maður sá flóttamennina í sjónvarpinu. En það hressti lundina að vita hvað það er vel þekið á móti þeim.

[Brynja skordal, 10.9.2008 kl. 11:41]

[Án höfuðklúta takk (IP-tala skráð) 10.9.2008 kl. 12:49]

Alla höfuðklúta burt,jafnvel þótt einhver segi það verður nú að lofa þeim að hafa sitt. Vindurinn feykir þessm dulum út í hafsauga.Aldrei að skera sig úr,falla inn í fjöldann það er málið og læra málið.Gangi svo öllum vel.

[I. Hulda T. Markhus, 10.9.2008 kl. 13:50]

Gaman að fá að fylgjast svona með.
Bíð spennt eftir meiri fréttum af flóttamönnunum og gangi þér sem best í hlutverki stuðningsaðilans!