Einstakar móttökur, stórgjöf og fyrirhuguð ... kaffiuppáhelling

Fékk yndislegan tölvupóst áðan frá Skagakonu sem sagði mér af móttökum sem ein fjölskyldan fékk í blokkinni sinni. Hér kemur úrdráttur úr bréfinu: 

Það kom hingað maður í vinnuna til mín og sagði mér það að ein fjölskyldan hefði verið að flytja í íbúð beint á móti hans fyrrverandi, syni hans, tengdadóttur (sem kom hingað til Íslands frá Gvatemala fyrir rúml.ári ) og eins árs tvíburum ;-)

Nema það að þessi maður fór inn á google-translate, http://translate.google.com/translate_t#  skrifaði þar á ensku og þýddi yfir á Arabísku: Verið velkomin í blokkina og ef ykkur vantar eitthvað þá endilega komið bara og biðjið um aðstoð, við búum í íbúðinni beint á móti. Þetta prentaði hann út, fór og keypti blómvönd og þegar hann rennir upp að blokkinni eru þau einmitt að koma heim ásamt stuðningskonu og túlkinum. Hann gefur konunni blómin og réttir henni blaðið sem hann prentaði út á Arabísku. Konan varð rosalega ánægð og túlkurinn alsæll og á leiðinni upp hittu þau tengdadótturina, börnin hlupu inn í íbúðina hennar og beint inn í stofu að skoða dótið hjá litlu tvíburunum.

Um rúmlega níu sama kvöld er bankað hjá þeim og þar fyrir utan stendur „flóttakonan“ og eftir smá líkamstjáningu ..hehe.. fara konan, sem heitir Anna og tengdadóttirin sem heitir Thelma, með henni yfir í hennar íbúð, þar var hún með fisk, ýmislegt meðlæti, eldavél og dósaupptakara ... sem hún var ekki alveg viss um hvernig ætti að nota. Svo þær tóku sig bara til og elduðu á staðnum fyrir konuna og börnin þessa dýrindis máltíð og þau voru svo alsæl.  

Þetta fannst mér svo frábært hjá þeim að ég mátti til með að leyfa þér nýbakaðri ömmunni að heyra.

Fleiri yndislegheit ... Forlagið ætlar að gefa öllum fjölskyldunum Stóru myndaorðabókina en það er einstök bók sem á eftir að hjálpa fólkinu gríðarlega mikið í íslenskunáminu. Þetta er engin smágjöf, hver bók kostar um 15.000 krónur og þetta eru átta stykki!

Komst að því í gær að Lína er hrifin af kaffi (alvörukona) og fer núna á eftir og kenni henni að búa sér til góðan kaffisopa. Hún er með brúsa, plastkaffitrekt sem kom í söfnuninni í sumar, nokkra filterpoka og svo afgangskaffi úr afmælinu mínu sem er ekki slorkaffi, Krakatá frá Kaffitári. Nú verður búinn til góður sopi í dag. Held að það megi alveg drekka kaffi þótt það sé akkúrat Ramadan núna. Annars fær hún sér bara sopa í kvöld.

Viðbót: http://www.unhcr.org/news/NEWS/48c54ef44.html

Athugasemdir

[Heiðrún (IP-tala skráð) 10.9.2008 kl. 14:17]

Æ þetta er allt eitthvað svo dásamlegt.  Nú er Jón með þinni og minni að kaupa inniskó. Vildi gjarnan vera fluga á vegg og fylgjast með honum með þær tvær upp á arminn - konur sem vita sko alveg hvað þær vilja. Vona samt aað ég hafi ekki náð að smita liðið. Er sem sagt heima í dag og ætla að ná þessu úr mér . Takk kæra Gurrý fyrir skemmtilega samvinnu hingað til.

[Guðríður Hrefna Haraldsdóttir, 10.9.2008 kl. 14:23]

Sömuleiðis, Heiðrún. Mikið hefur þetta verið gaman allt saman og líka dýrmætt að kynnast svona mörgum skemmtilegum Skagamönnum í þessu verkefni. Sé alveg fyrir mér hann Jón þinn með þær upp á arminn. Hahahhahaah! Svo fer ég í kaffikennslu kl. 3 og sýni "minni" eflaust sitt af hverju meira. M.a. þýðingarvélina í google á tölvunni. Vona að þér batni sem allra, allra fyrst.

[Silja Dögg (IP-tala skráð) 10.9.2008 kl. 14:26]

Hæ Gurrý mín. Sá þig í sjónvarpinu og datt í hug að kíkja í heimsókn... Það er satt sem þú segir; myndavélarnar bæta amk 20 kg. á fólk. Þú ert raunverulega tágrönn (til skýringar fyrir þá sem aldrei hafa hitt Gurrý í eigin persónu;-)

Mér finnst það sem þú og fleiri, eruð að gera, alveg frábært! Ég vil óska ykkur öllum alls hins besta og maður á eftir að fylgjast með hvernig hópnum gengu. Kv. Silja

[Helga Magnúsdóttir, 10.9.2008 kl. 14:29]

OOOOH, Gurrí, það er algjörlega sálarupplyftandi (nýyrði) að lesa bloggið þitt þessa dagana, Frábært hvað þið Skagamenn eruð að strauja, stífa og standa ykkur.

[Kristín Katla Árnadóttir, 10.9.2008 kl. 14:29]

Mikið finnst mér þetta yndislegt að heyra ég verð bara klök

[Þröstur Unnar, 10.9.2008 kl. 14:34]

Hrpfmm,,,, kunna fleiri en ég að strauja og stífa.

Þið eruð snillar upp til hópa, addna stuðningsfólk.

[Kristín Björg Þorsteinsdóttir, 10.9.2008 kl. 15:13]

Nei nú skæli ég bara hreinlega....mikið er þetta dásamlegt - ég er eiginlega óvinnufær sökum tára.....

[Jenný Anna Baldursdóttir, 10.9.2008 kl. 15:41]

[Ragnheiður , 10.9.2008 kl. 19:16]

Hvernig er þetta ? Á ég að grenja í allan dag ? Svona færslur um gott fólk koma út á mér tárunum....þetta er yndislegt !

[Anna Gísladóttir, 10.9.2008 kl. 19:25]

Þetta er yndislegt að lesa um ....... (og það tók á að halda aftur af tárunum)

[Linda Linnet Hilmarsdóttir, 10.9.2008 kl. 19:28]

Þetta er bara yndislegt og fallegt

[Svala Jónsdóttir, 10.9.2008 kl. 19:35]

Frábært að lesa þetta. Þær eru svo sannarlega heppnar, konurnar, að þarna á Skaganum skuli búa fólk eins og þú og þeir sem þú segir frá. :)