Fótósjokk, kaffisjokk, húsfélagsfundur og hinstu orð Eiríks

Þegar Sigurður Mikael, blm á DV, gekk inn í strætó af Sætukarlastoppistöðinni á Skaganum spurði hann mig hvort ég hefði séð DV í dag. Hann var fölur og skömmustulegur þegar þegar hann tjáði mér að flennistór mynd væri af mér við viðtal við Sigþóru um Skaðræðisbrekkuna rétt við Súkkulaðibrekkuna. „Hva, af hverju voru þeir að birta mynd af mér?“ spurði ég sár, enda fann ég á mér að DV-menn myndu velja mynd af mér þar sem ég líkist vélsagarmorðingja (sjá debit- og kredidkort mín). Sigþóra, sem hefur rúllað oftar en tárum tekur niður Skaðræðisbrekkuna, vegkantinn háa hjá stoppistöðinni á Vesturlandsveginum, var á Spáni þegar viðtalið var tekið við hana og því ekki hægt að mynda hana. SM tjáði mér að myndin af mér næði yfir næstum því heila síðu og þá áttaði ég mig á því að ég myndi örugglega virka ógeðslega feit. Ég fölnaði af bræði ... eða hefði gert ef ég hefði ekki haldið í þá veiku von að myndin væri kannski í lagi eða fótósjoppuð vegna skilnings DV-manna. Nei, þetta var fótóSJOKK ... Og svo hef ég ekki kvartað margoft við Strætó bs yfir Skaðræðisbrekkunni ... bara hérna á blogginu. Var kannski ekki nógu skýr í svörum.

Erfið byrjun á degi eftir viðburðaríkan aðalfund húsfélagsins í gærkvöldi ... nótt ... Ég skrifaði undir trúðaðarloforðsþagnareið vegna fundarins og get því miður ekki sagt frá öllu því dásemdarsvínaríi sem viðgekkst þar. Ostur, vínber, Pólverji og súkkulaði kemur við sögu ...  Við ákváðum að halda svona fund eigi sjaldnar en einu sinni í viku héðan í frá. Önnur mál voru ekki á dagskrá. Ég get ómögulega munað hvort ég var kosin formaður, gjaldkeri, húsvörður eða ræstitæknir sameignarinnar eftir að hafa boðið mig aftur fram sem ritari.

Fljótlega eftir komu í vinnuna sagði Ragga hjá Séð og heyrt að ég væri greinilega í mikilli þörf fyrir líkamlegt samneyti ... (hvernig hefði hún svo sem átt að vita að ég var á húsfundi í gær), ég hváði, hló hæðnislega og hélt nú ekki, en þá sagði hún að þar sem ég væri í rauðum bol undir svarta jakkanum ... væri það raunin. Svo trítlaði hún yfir sætið sitt, svartklædd og gelluleg og það small í gólfinu undan rauðu hælaskónum hennar. Tobba er líka í þörf, hún er með rautt belti, allt hitt svart. Þá veit maður það.

Kaffibaunirnar kláruðust um níuleytið í morgun og Ragga djöfull stal ómerktum kaffibaunapakka einhvers staðar frammi og nú drekkum við einhvern hryllingsviðbjóð sem hefur ekki þótt nógu gott í vegkantafyllingar í Brasilíu. Hef reyndar ekki þorað að smakka það sá bara að Eiríkur Jónsson hneig niður við kaffivélina. Hinstu orð hans voru: „Veit hún Gurrí af þessu?“ Ég er búin að hringja í Selecta og biðja um neyðarkaffisendingu á vanalega kaffinu okkar (frá Kaffitári) og nú er klukkan farin að ganga 12, ekkert kaffi komið enn. Veit fólk ekki hvað alvöruneyð er? 

Vona að elsku Skúli bílstjóri á Skagastrætó fyrirgefi mér fyrir að hafa gleymt tómu kaffipappamáli í sætinu mínu í morgun, ég náði ekki að klára the latte on the stoppistöð og lauk við síðustu dropana inni í vagninum ... Tommi hefði drepið mig fyrir þetta, eða þá Gummi!

Athugasemdir

[Sigthora (IP-tala skráð) 25.9.2008 kl. 11:49]

sael elsku dullan min !!!

Her er bara frábaert vedur ad sjalfsogdu

tu geymir fyrir mig dv er thad ekki ?? Langar ekkert sma til ad lesa thessa frett og vonandi verdur hun til thess ad skadraedisbrekkan heyri sogunni til

Hafdu thad sem allra allra best

Solarkvedja fra Costa del Sol

[Lára Hanna Einarsdóttir, 25.9.2008 kl. 11:56]

Ég er farin að sakna Tomma verulega... og hvað varð af ógreidda manninum?

[Brynja Dögg Ívarsdóttir, 25.9.2008 kl. 11:56]

Hæ Hæ Gleymmerei hér frá Spáni, Hér er rigning og skýjað, spáð rigningu næstu daga, orðið kaldara.

Kötturinn sefur vært, eftir 2 bjóra, næs líf hjá honum, hiti einn á förnum vegi í morgun, klappaði honum aðeins.

Ég vona að þú fáir kaffisopann þinn, sammála að Kaffi frá Kaffitár er besta kaffið, liggur við að ég láti þá senda mér nokkra pakka, kaffið hér er ódrekkandi.

Kv úr rigningunni á SPáni Gleymmerei 

[Guðrún Jóhannesdóttir, 25.9.2008 kl. 12:10]

Innlitksvitt með skellihlátri

[Guðrún Jóhannesdóttir, 25.9.2008 kl. 12:10]

p.s. á eftir að komast yfir DV

[Þröstur Unnar, 25.9.2008 kl. 12:53]

Arrrg hvað ég skemmti mér vel hérna.

Hafa þessar kjéllingar endalaust efni á að vera í stanzlausum spánarferðum.

[mmm (IP-tala skráð) 25.9.2008 kl. 14:11]

Nú er hundadópkonan komin hér aftur sem gleymmér ei :Nú eru það kisurnar.

[Helga Magnúsdóttir, 25.9.2008 kl. 14:34]

Æ, ég hefði kannski átt að hringja í þig í gær og vara þig við. En það var viðtal sem var tekið (ekki tekið?) við þig svo ég hélt bara að þetta væri allt í sómanum.

[Hulda (IP-tala skráð) 25.9.2008 kl. 15:36]

haha, gat ekki annað en hlegið þegar ég kom að "eiríki að hníga niður við kaffivélina"

[Aprílrós, 25.9.2008 kl. 18:39]

innlitskvitt

[Jenný Anna Baldursdóttir, 25.9.2008 kl. 21:27]

Ragga djöfull. Ég dey.

[Linda Linnet Hilmarsdóttir, 25.9.2008 kl. 21:46]

Knús knús á þig elskulegust og góða nóttina

[Guðný Anna Arnþórsdóttir, 25.9.2008 kl. 21:49]

[Katrín Snæhólm Baldursdóttir, 26.9.2008 kl. 12:44]

Gurrí..þú ert ekkert venjulega fyndin kona....það bregst ekki að manni stökkvi bros eða jafnvel hlægi upphátt einn við tölvuna þegar maður les psitlana þína.

Þú ert ein helsta heilsusprauta okkar bloggara...vá hvað ónæmiskerfið hlytur að hafa styrkst hjá þínum fastalesendum!!! 

[Katrín Snæhólm Baldursdóttir, 26.9.2008 kl. 12:45]

fastalesendum...er þetta ekki skrítið orð??