Bylting og sætar beljur

„Mánudagur til mæðu,“ stundi einn samstarfsmaður minn í mötuneytinu í hádeginu. Annar bætti við: „Nú eru allir dagar til mæðu!“ Við hlógum að þessu og þessir neikvæðu tóku alveg undir. Fólk í kringum mig er fúlt yfir aðgerðaleysi stjórnvalda, af hverju eru vextir t.d. ekki lækkaðir? spyr það. „Nú ætti að mótmæla í miðbænum,“ sagði einn, „almenningur vera á götum úti með mólótov-kokteila og mótmæla ráðamönnum!“ Ein konan sagði þreytulega: „Æ, það er svo erfitt að fá bílastæði í miðbænum, það myndi enginn nenna að mæta.“ Allir hlógu. Ísland í hnotskurn. Það er samt mikill hiti í fólki, allir vilja aðgerðir! Ég vona bara að ef við fáum lán hjá Alþjóðagjaldeyrissjóðnum þurfum við ekki að sæta afarkostum í staðinn, t.d. að einkavæða heilbrigðiskerfið okkar og annað sem margir hafa varað við að undanförnu. 

Ásta tók bráðhuggulegan ráðuneytisstarfsmann upp í bíl sinn í Mosó sl. föstudag og skutlaði honum heim á Skaga. Hann skammaði hana á leiðinni fyrir að draga samferðakonuna (mig) út í bíl einn morguninn á nærbuxunum ... Ástu fannst þetta ógurlega fyndið en ég ítrekaði við hana þegar við ræddum þetta í morgun, að ef ekkert markvert gerðist á leiðinni með henni þá þarf eitthvað að skreyta, það gerist t.d. alltaf eitthvað mjög magnað í strætó. Hjá okkur Ástu bar t.d. hæst í morgun að við þurftum að stoppa á Innnesveginum til að hleypa yfir sætum beljum á leið í fjósið. Minningar úr sveitinni í gamla daga rifjuðust upp og ég mundi eftir því hvað kýr eru annars dásamleg dýr.

Vonandi verður dagurinn ykkar dásamlegur, kæru bloggvinir. Er farin að vinna.

Athugasemdir

[Brynja skordal, 13.10.2008 kl. 13:16]

Hafðu ljúfan dag elskuleg

[Georg P Sveinbjörnsson, 13.10.2008 kl. 14:30]

Þó að fréttir af henni berist lítt til íslands ennþá er byltingin hafin fyrir löngu og breiðist hratt út um allan heim, fólk er að vakna af dvala í stórum stíl og heimselítan þarf að vera snögg til að stöðva þessa mögnuðu hreyfingu, nú fara hlutirnir að gerast hratt. Fjölmiðlar hafa ekki þorað að benda á ÞESSAR hrollvekjandi staðreyndir, fangabúðir fyrir milljónir manna tilbúnar til notkunar og fullmannaðar í Bandaríkjunum, fyrir hverja ætli þær séu hugsaðar? Ég spái að herlög verði sett á í Bandaríkjunum á næstu vikum þegar millistéttin áttar sig á því að búið er að ræna hana öllu.

[Brynja Dögg Ívarsdóttir, 13.10.2008 kl. 15:10]

Hæ Hafðu það sem best í dag, og mundu, öll él styttir upp um síðir, þetta lagast,það þarf bara að hafa þolinmæði.

Bið að heilsa kisunum þínum, vonandi er ekki kreppa í kattamatnum.

Hér er skýjað en samt aðeins sól í gegnum skýin. Hlýtt hiti um 28 stig, notalegt.

Farin út í gönguferð. Kv Gleymmerei. 

[Jenný Anna Baldursdóttir, 13.10.2008 kl. 15:22]