Jibbí, komin í vinnuna!

18.6.2007 | 08:45

Ég gleymdi ekki að fara í vinnuna í morgun, sjúkkitt. Krúttið hann Tommi bílstjóri kom okkur klakklaust í bæinn á fínum tíma, enda lítil umferð og fáar stoppistöðvar á leiðinni. Mikið var notalegt að hlusta á Rás 2, góð lög og fínar útvarpskonur. Það eru aðeins meiri læti á Bylgjunni og viðkvæmt taugakerfi okkar Skagamanna á erfiðara með mikið stuð, viljum frekar dorma (nessum dorma) í þægilegri rútu.

Maður sem vinnur hjá Prentmet hoppaði út á Vesturlandsveginum og ég hafði þrjár sekúndur til að ákveða mig hvort ég færi út með honum. Strætó númer 18 er hættur að stoppa þarna fyrir neðan, heldur fer í Árbæinn fyrst (arggg) svo að ég þarf að fara í Ártún ef ég ætla að ná honum ... EN gönguferðahatarinn moi ákvað að tölta bara uppeftir. Þeir sem þekkja mig vita að þetta er mjög ólíkt mér. Þótt þetta sé frekar há brekka sem liggur þarna uppeftir þá er hún ekki næstum því jafnviðurstyggilega hræðileg og lúmska brekkan í Ártúni (sunnan megin við Ártúnsbrekkuna).

Ég blés ekki úr nös, enda labbaði ég löturhægt. Ástæða: helvítis verkurinn í vinstri fæti, verkurinn sem læknirinn sagði að myndi lagast (fyrir einu og hálfi ári), hann sagði reyndar ekki að þetta væri vírus, eins og algengt er á heilsugæslustöðvum. Ég þurfti að stoppa nokkrum sinnum á leiðinni og komst ekkert áfram af viti fyrr en ég fattaði að bora með fokkfingrinum þéttingsfast í vinstra lærið framanvert, þá fór þetta eitthvað að ganga. Upp brekkuna komst ég þótt ég liti eflaust út eins og hálfviti. Þetta er svolítið fúlt ... ég flyt á Skagann þar sem dásamlegar gönguleiðir eru um allt og ætla að fara að hreyfa mig meira en mér er of illt í fætinum til að geta gengið ... og myndi eflaust lagast ef ég hreyfði mig meira. Vítahringur dauðans! Mun heimta sjúkraþjálfun, nenni þessu ekki lengur.

Ég mætti langfyrst allra, rúmlega hálf átta, og hef m.a. afrekað að taka til á skrifborðinu mínu, fara í gegnum tölvupóstinn, panta espressóbaunir frá Kaffitári og hlusta á Króa á Rás 2 (Kristin R. Ólafsson) en við unnum saman úti í Vestmannaeyjum í gamla daga þegar þótti fínt að vinna í fiski. Hann man alveg örugglega ekki eftir mér en er sjálfur mjög minnisstæður og skemmtilegur.

Mikki bauð glaðlega góðan dag þegar hann kom loksins og ég kunni ekki við bjóða honum gott kvöld á móti þótt hann kæmi seinna en ég ... Doddi, aftur á móti sagði græðgislega: "Ný klipping?" Mikið er gott að vera komin aftur í vinnuna þar sem ég fæ sanna aðdáun! Held að Skagamenn og samfarþegar mínir í strætó gangi að mér vísri ... að vísu sagði samstrætóstoppistöðvarmaður minn: "Hvar hefur þú verið?" þegar ég birtist á stoppistöðinni kl. 6.43 í morgun. Smá sakn greinilega.

Meginflokkur: Bloggar | Aukaflokkar: Dægurmál, Ferðalög, Lífstíll, Matur og drykkur, Stjórnmál og samfélag, Tónlist, Vinir og fjölskylda | Facebook

Athugasemdir

Mikið andskoti geturðu verið skemmtileg kona, þrátt fyrir að vera skagakona og að þú sért vöknuð fyrir allar aldir. Velkomin í mannabyggðir. Takk fyrir ævintýrapistilinn. Smjúts *Sakn*

Jenný Anna Baldursdóttir, 18.6.2007 kl. 09:01

Tékkaðu á nálastungum.. Örn í laugarneshverfinu er kraftaverkamaður!! Annars góðan og blessaðan daginn

Ester Júlía, 18.6.2007 kl. 09:02

Ég set stórt spurningamerki við fólk sem er mætt í vinnuna hálf-8! Sjálf er ég á sér-díl í minni vinnu... ef ég er mætt inn á baðherbergið mitt fyrir 9 til að gera mig klára er ég sama sem mætt í vinnuna

Heiða B. Heiðars, 18.6.2007 kl. 10:05

Það er slæmt að finna svona til í fætinum. Eigðu góðan dag.

Kristín Katla Árnadóttir, 18.6.2007 kl. 11:05

Mætt hálf átta!!! - ÞAÐ gæti stafað af vírus - láttu athuga þig

Anna Ólafsdóttir (anno) (IP-tala skráð) 18.6.2007 kl. 12:40

Þetta er nú vaninn, krúttin mín. Mér finnst hetjudáð að vakna kl. 6 virka daga, vinna frá 7.30-15.30 eða lengur og breytast svo í algjöra B-manneskju um helgar. Ég þori að viðurkenna núna að ég vaknaði yfirleitt ekki fyrr en á hádegi í fríinu mínu, nema ég væri að sumarbúðast eða eitthvað ... Þetta er vírus ... e.k. syndrom. Svo er ég búin að panta tíma hjá lækni, mæti 10 í fyrramálið. Þvílík þolinmæði að vera illt í fætinum í eitt og hálft ár ... er þetta leti?