Góður mánudagur

18.6.2007 | 22:41

Fyrsti vinnudagurinn eftir sumarfrí gekk frábærlega, gott að vera komin aftur í röð og reglu þótt hitt sé auðvitað notalegt.

Inga sótti mig um hálffimm, dauðþreytt eftir daginn. Henni hafði dottið í hug að steypa eina tröppu við húsið sitt og hélt að það væri ekki mikið mál. Annað kom á daginn. Hún dreif sig í Húsasmiðjuna til að kaupa sement og tilheyrandi. Karlarnir þar gátu ekkert hjálpað henni með aðferðirnar við steypun, enda vanir iðnaðarmönnum sem vita allt.

Inga bjóst eðlilega við að uppskrift að steypu væri aftan á sementspokunum, 300 g sement, 200 g vatn, dass af möl ... eitthvað svoleiðis en svo gott var það ekki. Hún gerði sér þá lítið fyrir og hringdi í framleiðandann, Sementsverksmiðju ríkisins á Akranesi, og fékk að tala við framkvæmdastjórann. Sá skemmti sér vel yfir símtalinu og bjargaði henni um uppskrift verkfræðings nokkurs að góðri steypu, hann fræddi hana líka um þriggja ára háskólanám í steypun en það bíður betri tíma. Inga keypti sér líka slípirokk í dag og er að springa úr stolti. Svo á hún svo margar tegundir af verkfærum að ég kann ekki að nefna þau.

Sá næsti sem talar um konur sem sleppa sér í fatabúðum ætti að hitta hina fögru Ingu sem stundar steypuverslanir af ástríðu. Karlarnir seldu henni reyndar allt of mikið af sementi, ranga möl og hvaðeina en hún gat reddað því.

Gat ekki stillt mig um að biðja hennar, enda stutt í framkvæmdir hjá mér og elsku smiðurinn er búinn að gleyma mér. Held reyndar að hann sé í sumarfríi.

Við sóttum Ernu og héldum á Skagann, náðum í Einarsbúð kl. 17.59, eða rétt fyrir lokun, og keyptum kjúklingabringur á útsölu. (Ég elska Einarsbúð) Inga kenndi okkur að gera mexíkóskan kjúklingarétt og kjúkling fylltan með gráðaosti og skinku. Algjört nammi. Skvísurnar eru farnar í bæinn og ég sit pakksödd með hellings afgang sem dugir í nokkrar máltíðir. Býst við að við gerum þetta að vana, í haust mun ég kenna þeim að búa til góðu súpuna mína með chilipiparnum.

Meginflokkur: Bloggar | Aukaflokkar: Dægurmál, Ferðalög, Lífstíll, Matur og drykkur, Vinir og fjölskylda, Vísindi og fræði | Facebook

Athugasemdir

Hvað er það með Einarsbúð og kjúklingabringur? Verð að fara og fá mér næturmat eftir að hafa lesið færsluna. Arg..

Jenný Anna Baldursdóttir, 18.6.2007 kl. 23:58

Ef það þarf 3ja ára háskólanám til að læra uppskrift að steypu er spurning hvað verkfræðingurinn væri lengi að læra uppskriftina mexíkóska kjúklingaréttinum

Anna Ólafsdóttir (anno) (IP-tala skráð) 19.6.2007 kl. 00:03

Skrambi tókst þú sumarfríðið snemma Guðríður.

Það er eflaust oft gott að vera snemma á ferðinni, minni ös á öllum stöðum ekki rétt?

Kær kveðja frá Kalla Tomm úr Mosó.

Karl Tómasson, 19.6.2007 kl. 00:26

Ef sumarfrí skyldi kalla, Kalli ... sofa út, horfa á sjónvarpið, lesa bækur, skreppa í sumarbúðirnar til Hildu systur (sumarbudir.is), skreppa í bæjarferð, slappa af. Vá, þetta er dýrleg uppskrift. Svo nýtur maður sumarsins seinnipart dagsins úti á nýju svölunum og tekur restina af fríinu í ágúst. Finnst bara þrusugott að taka megnið af fríinu maí/júní.

Góð spurning, Anna. Miðað við hvað Ingu gekk vel að steypa í dag, í fyrsta sinn á ævinni held ég að mexíkósk matargerð sé ögn flóknari.

Jenný, einhvern daginn tek ég þig með í Einarsbúð!

Guðríður Hrefna Haraldsdóttir, 19.6.2007 kl. 00:35

Ég sel nú steypu í poku..bara blanda vatni útí og hókuspókus...komin steypa...

Brynja Hjaltadóttir, 19.6.2007 kl. 00:52

Líf mitt snýst um steypu þessa dagana. Veistu hvað 25 kg sementspokar eru þungir? (25 kg. vissi að þú fattaðir það ;-) En alla vega, ein steypuumferð eftir. 17. júní fór í 17. júní og engin steypuvinna, enda Óli uppi í bústað fram á rauða kvöld og við tímdum sko ekki að ræsa hann þaðan. Þurfum að vera minnst þrjú þegar við erum að flota. Óli er fjölhæfur, hann er bæði vel heima í mexíkóskri matargerð og steypuvinnu, en það má ekki ganga um of á lagið.

Anna Ólafsdóttir Björnsson, 19.6.2007 kl. 01:07