Karlar úr bókaheiminum kysstir og nýjar tvíburamyndir

21.6.2007 | 08:31

Karlar úr bókaheiminum kysstir og nýjar tvíburamyndir

Morgunþátturinn var ekki alveg undir hælnum á Möggu mágkonu í morgun eins og í gær. Eina rjómatíska lagið á Rás 2 var: "Komdu aftur til mín Dísa - komdu til mín Kenwood Chef!" Get alla vega ekki heyrt betur en maðurinn í laginu líki Dísu við hrærivél og því er ekkert skrýtið að konan hafi farið. Ég myndi ekki hanga lengi með manni sem kallaði mig AEG eða Bloomberg!

Ég vann lengi frameftir í fyrrakvöld og svaf því ekki nema í fjóra eða fimm tíma um nóttina. Það hafði afleiðingar. Ég dottaði við tölvuna eftir að ég kom heim um sjöleytið í gærkvöldi og skreið í bólið um hálftíu. Það var notalegt. Var of andlaus til að blogga og ákvað að ná góðum svefni, enda erfiður dagur fram undan í dag. Nú myndi ein kunningjakona mín segja að við værum orðnar svo gamlar að við yrðum að fá okkar svefn og engar refjar. Aftur á móti ef ég hefði vaknað hress eftir fimm tíma svefn tvo daga í röð hefði hún líka útskýrt það með ellinni, að við værum orðnar svo gamlar að við þyrftum ekki jafnmikinn svefn og þegar við vorum ungar. Ef hún fær í verk þá er það elliverkur... þessi kona er ekki orðin fimmtug! Þarf að fara að segja henni frá Madonnu, jafnöldru okkar! Það eru alla vega 40 ár í að hrumleikinn taki yfir hjá mér og þá ... þá fyrst er möguleiki á því að ég þori t.d. að prófa LSD. Þá er ég líka loksins orðin nógu gömul og stór til þess!

Dró vélstýruna með mér í matreiðslubókarkynningu Skjaldborgar eftir vinnu í gær. Út var að koma bók með kjúklingaréttum, ansi hreint girnileg og glæsileg bók. Búið var að elda flesta réttina úr bókinni og við fengum að smakka. Þetta var frábært. Við Anna hlömmuðum okkur hjá Skerjafjarðarskáldinu, höfundi Afa ullarsokks, og teiknaranum. Svo náði ég að kyssa helling af körlum úr bókaheiminum og meira að segja sjálfan Davíð Þór sem kom þarna þegar við Anna vorum að fara! Anna var söm við sig, mátti ekki heyra minnst á að keyra mig fyrir strætó, heldur var sko farið alla leið á Skagann. Samt hefði ég náð 18.30 strætó í Mosó ... Anna þurfti að fara að vinna kl. 20 þannig að þetta var bara keyrsla.

Færslan er skreytt með nýjum myndum af tvíburunum sætu sem stækka og dafna með hverjum deginum. Það er ekki að sjá á þessum myndum að drengirnir hafi fæðst með skarð í vör og gómi. Aðgerðin á þeim hefur tekist mjög vel. Mikið elska ég þessa stráka!

Meginflokkur: Bloggar | Aukaflokkar: Bækur, Dægurmál, Matur og drykkur, Vinir og fjölskylda | Facebook

Athugasemdir

Tvíbbarnir eru yndislegir!! Og orðnir svo mannalegir og búttaðir! Auðsjáanlegt að þeim líður vel, þessum litlu elskum. Takk fyrir að leyfa okkur að fylgjast með þeim.

Hugarfluga, 21.6.2007 kl. 10:09

Þeir eru fallegir elsku börnin.

Kristín Katla Árnadóttir, 21.6.2007 kl. 10:26

Þessir gaurar eru perlubörn. Hreint ótrúlega fallegir.

Sko ég hef frá fyrstu hendi (elstu dóttur minni) hvað átt er við í textanum: ""Komdu aftur til mín Dísa - komdu með í Kenwood Chef!" en það þýðir sleikur. (sko í sleik eins og hrærivél á fullu) meiri viðbjóðurinn í þessum börnum.

Jenný Anna Baldursdóttir, 21.6.2007 kl. 11:27

Hahhah, hélt að þetta væri svona hrikaleg misheyrn ... eins og í Sylvia´´s Mother. "Plís missis Seifría" sem á að vera "Plís missis Avery" Það þurfti Kana til að segja mér þetta! Æ, hvað ég er fegin að þetta var Kenw. Chef ...

Guðríður Hrefna Haraldsdóttir, 21.6.2007 kl. 12:40

Tvíburarnir eru gullfallegir og yndislegir, fyrir og eftir aðgerðina. Það ljómar alveg frá þeim, greinilegt að þeir eru mikið elskaðir og að vel sé hugsað um þá. Gott að heyra að þú fékkst nægan svefn, hann á það til að vera góður, blessaður svefninn, mér hefur samt alltaf liðið að ég get bara sofið þegar ég er orðin gömul (hversu gömul? Ekki alveg viss um það), en þarf oft að sofa mikið núna... Kannski er ég bara orðin gömul

Bertha Sigmundsdóttir, 21.6.2007 kl. 14:25

Sammála Önnu, Frú Bloomberg hljómar vel Fröken Gudrídur!

Krúttuboltar eru drengirnir fraendur zínir .... dafna vel og eru hreint yndi bádir tveir!

www.zordis.com, 21.6.2007 kl. 16:47

Ætlaði einmitt að mæla Bloomber bót, en Anna K. sá um það.

En er Madonna að skríplast eitthvað ennþá eða stríplast?

Og Hreinsmögur, skellti hann ekki einni léttri á þig milli kosssa!?

Börn eru já yndisleg, ekki síst tvíbbar!

Magnús Geir Guðmundsson, 21.6.2007 kl. 17:01

Takk fyrir fallegu myndirnar af tvíbbunum - þeir eru himneskir, ekkert minna Verð að fá mér þessa kjúklingaréttabók - uppskriftabækur eru í sérstöku uppáhaldi hjá mér - fer sjaldnast eftir uppskriftunum, nema svona í grunninn, verð alltaf að improvisera eitthvað til viðbótar. Hreinsmögurinn hefði nú fengið sérstakar kveðjur frá mér - enda hefur hann sko ort til mín lymru