Kuldaleg meðferð - gæsahúð í himnaríki

Mikið ofboðslega er gaman hjá einhverjum Orkuveitustarfsmanni núna. Þeir hljóta eiginlega að vera tveir, annar með kíki og hinn sem stjórnar heita og kalda vatninu. „Ahh, hún var að fara út af baðinu, skrúfuðu núna fyrir heita vatnið og láttu renna ísjökulkalt vatn í baðkerið, múahahhaha!“

Hraðsuðuketillinn er nú formlega fluttur inn á bað! Lífsgæðum mínum hefur hrakað til muna síðustu vikurnar og ég finn að gleðin víkur fyrir kvíða. Hvernig verður veturinn? En lyktin af mér? Festist gæsahúð á fólki?

Útdráttur þáttarins í morgun:
Nick faðmar Bridget ástríðufullt en horfir samt dapur út í loftið. Hann hugsar um Brooke, mömmu hennar, sem hugsar líka um Nick en einbeitir sér að því að ráða Dante, nýbakaðan unnusta sinn og bjargvætt Taylor, í tískuhúsið til að sjá um mynstur og svona, enda er hann listamaður. Bridget er að reyna að „tengjast“ Nick en hann fer sífellt úr stuði, enda eru þau á skrifstofunni hans og þar er mynd af Brooke. Þau ætla að giftast um borð í skipi í kvöld, bara tvö ein, en það hlýtur eitthvað að koma í veg fyrir brúðkaupið enn einu sinni ...
Draumórar Brooke: Nick kemur inn á skrifstofuna hennar, 18 efstu tölurnar á skyrtunni hans eru fráhnepptar. Hún flettir af honum skyrtunni og þau fara að kela. Draumórum lýkur. Brooke andar ótt og títt.
Nick pantar skipstjóra til að framkvæma vígsluna, Bridget hoppar á Nick, alveg kynóð og hann segir: „Bíddu, bíddu, þarftu ekki að redda kjól fyrir kvöldið?“
Hey, Nick er kominn inn á skrifstofu Brooke og segir henni að hann geti ekki hugsað sér að Brooke mæti í brúðkaupið en Bridget bauð mömmu sinni í fljótfærni, þótt þau Nick ætluðu að vera tvö ein. „Þú mátt ekki koma í brúðkaupið, þá veit ég ekki hvort ég geti þetta!“ segir hann með ástríðuþrungnum dapurleika. „Heldur þú að mig langi að koma þótt ég viti þetta rífi úr mér hjartað?“

Athugasemdir

[Hrönn Sigurðardóttir, 26.6.2007 kl. 10:27]

tíhí..... bara 18 efstu?

[Kristín Katla Árnadóttir, 26.6.2007 kl. 11:00]

Þú ert svo skondin sambandi við boldið

[Jenný Anna Baldursdóttir, 26.6.2007 kl. 11:04]

Nú er ég slegin orðleysi.  18 tölur eru yfir mörkin, jafnvel fyrir mig.

[Doddi - Þorsteinn G. Jónsson (IP-tala skráð) 26.6.2007 kl. 11:34]

Á bókasafninu er ég bara með efstu töluna fráhneppta og þú ættir að sjá hversu mikið segulstál það er ...

Það hefur hins vegar engin hoppað á mig ennþá og kelað við mig þar ... enda er kelerí með Dodda bara fyrir Veigu, þó svo að þú fáir ætíð kossa og knús frá mér dúlla !

[Jóna Á. Gísladóttir, 26.6.2007 kl. 13:05]

Hef áhyggjur af hraðsuðukatli inn á baðherbergi. Væri verra ef hann færi í bað með þér... í sambandi.

[Guðríður Hrefna Haraldsdóttir, 26.6.2007 kl. 13:41]

Baðherbergið er risastórt, ketillinn stendur við baðvaskinn í 500 metra fjarlægð frá baðkerinu. Salernið er svo nokkrum kílómetrum fjær.

Ein tala, Doddi, er segull ... 18 tölur er plebbalegt! Þú er smekkmaður! 

[Guðríður Hrefna Haraldsdóttir, 26.6.2007 kl. 14:54]

Hahhahahaha, geri þetta, hr. Guðmundur!

[Hildigunnur Rúnarsdóttir, 26.6.2007 kl. 17:10]

skipta um blöndunartæki, líf mitt varð allt annað eftir að ég hætti þessu með hraðsuðuketilinn og skipti. (gerði það ekki fyrr en draslið festist á 42° og ég fékk brunasár við að skola á mér hárið. Eða hefði fengið brunasár ef hitinn hefði nokkurn timann farið upp fyrir svona 40°)

[Guðríður Hrefna Haraldsdóttir, 26.6.2007 kl. 18:22]

Já, það ætla ég sko að gera sem fyrst!