Eru þau ekki að herma eftir Lindu Pé?

Mikið var ég ánægð yfir því að það fæddist dóttir hjá hefðardúllunum í Danmörku. Völvan okkar hjá Vikunni var svo viss um það en ég er efasemdarmanneskja ... Spádómar völvunnar okkar birtust líka í danska BT og það sem hún sagði þar hefur líka komið fram!

Líst vel á nöfnin á prinsessunni og flott hjá foreldrunum að breyta aðeins til frá hefðunum. 

Man hvað mér fannst flott þegar Hilda á Hóli reyndist heita Gunnhildur Benedikta Friðrika fullu nafni. Gleypti í mig bækurnar um Hildu í gamla daga. Hef alltaf verið hrifin af svona voldugum nöfnum. Samt heitir erfðaprinsinn minn tveimur frekar stuttum nöfnum. Tískan var þó önnur í nafngiftum þegar hann fæddist og þess vegna heitir hann ekki Guttormur Vilhjálmur eða slíkt. Nei, hann heitir Ljótur Bambi! Eða myndi kannski heita það hefði hann fæðst 25 árum síðar. 

Dönsk prinsessa nefnd Ísabella

Athugasemdir

[Jenný Anna Baldursdóttir, 1.7.2007 kl. 14:43]

En þú komst nú ansi nálægt þessu þegar þú svo skírðir einkaerfingjann Ófríðan Barnunga eða hvað?

[Helga Guðrún Eiríksdóttir, 1.7.2007 kl. 15:14]

-Af hverju heitir heita vatnið heita vatnið?

Eitthvað verður það að heita, vatnið.

[Anna Ólafsdóttir (anno) (IP-tala skráð) 1.7.2007 kl. 15:18]

Adda, Anna í Grænuhlíð og Hilda á Hóli voru mínar uppáhalds. Mundi samt ekkert eftir þessu stóra nafni hennar Hildu, hugsa að ég með mitt stutta nafn hefði nú bara fengið minnimáttarkennd ef ég hefði tekið eftir því. En þetta með völvuna: Gæti ég þá kannski líka fengið svona völvudjobb??? Ég veit alltaf hvort kynið er þegar ég horfi á óléttukúlu!   

[Guðríður Hrefna Haraldsdóttir, 1.7.2007 kl. 15:48]

Heheheheh, fyndnar addna! Anna, ég hafði líka mjög gaman af dramanu um Önnu í Grænuhlíð. Svo fann ég demanta í gömlu bókunum hennar mömmu, eins og Beverly Grey, Snjallar stúlkur (fann þá snilldarbók frá 1946 í gegnum Gvend dúllara en mömmu eintak var týnt), Ráðskonuna á Grund, Gesti í Miklagarði og fleiri. Verst var hvað vantaði inni í seríurnar, eins og Beverly Grey-bækurnar. Mamma er tvíburi og þær systur fengu oft sameiginlegar gjafir eins og þær væru ekki tveir einstaklingar! Bókasafn Akraness bætti úr þessu. Já, og ég bendi á þig sem ólétturáðgjafa völvunnar. 

[Björg K. Sigurðardóttir, 1.7.2007 kl. 15:53]

Þetta er voldugt nafn sem daman fékk, vorkenni henni samt þegar hún fer að læra að skrifa nafnið sitt. Úff!

Er samt að spá í hvort þetta sé eitthvað statement að hafa nafnið á drottningunni síðast, eitthvað tengdóvesen? 

[Jóna Á. Gísladóttir, 1.7.2007 kl. 16:47]

Nostalgía hér. Beverly Gray, Baldintáta, Hilda á Hóli. Sérstaklega Hilda. Hef lengi verið að spá í að lesa þær bækur aftur. Kallaði ekki Soffía litla nýfundna afann Afasín. Sossattín er orð sem mig rámar í líka. Soldið sona eins og Jennýsín hennar Jenfo.

[Kristín M. Jóhannsdóttir, 1.7.2007 kl. 18:53]

Ég las aldrei Hildu á Hóli, veit ekki einu sinni hvaða bækur það eru. En af því að Anna frá Grænuhlíð var nefnd verð ég endilega að segja frá því að ég hef komið í Grænuhlíð. Lucy Maud Montgomery, höfundurinn, bjó á nágrannabæ við Grænuhlíð en elskaði þennan bæ og gerði hann því að sögusviði bóka sinna. Og það eru í alvöru ástargöng frá bænum. Á Prins Edward eyju hefur líka verið byggt upp þorp að nafni Avonlea og þjónar sem skemmtigarður fyrir túrista. Enda var Avonlea bæði í bókunum um Önnu og svo að sjálfsögðu síðar í 'Leiðin til Avonlea'. Daginn áður en ég fór til Prins Edward eyju gisti ég á hóteli í Halifax og sá þá konu í ótrúlega flottum jakka, þannig að ég horfði meir á hana en ég horfi svona vanalega á fólk sem ég mæti á hóteli. Allt í einu snéri hún sér við og þá sá ég að þetta var engin önnur en Jackie Burroughs sem lék aunt Hettie, í Leiðinni til Avonlea. Fannst þetta ferlega fyndin tilviljun.

[Magnús Geir Guðmundsson, 1.7.2007 kl. 20:15]

Skemmtileg saga hjá Kristínu, Sjónvarpskonu ekki satt?

Ég strákskömmin man nú vel eftir þessum þáttum frá fyrri tíð, Leiðin til Avon Lea minnir mig sérstaklega að hafa verið mjög vinsælir.

En útaf nöfnunum mörgu á kóngafólkinu, þá eru nú fleiri sem lenda í þessu, m.a. "Maðurinn með gullröddina" Pálmi Gunnars, hann var skírður allavega Aðalsteinn Helgi líka, gott ef ekki einu nafni til!?

[Guðríður Hrefna Haraldsdóttir, 1.7.2007 kl. 20:22]

Held að Kristín sé "bara" íslenskufræðingur í framhaldsnámi ... veit ekki með sjónvarpið. Annars er ég algjör dóni ef ég hef ekki þekkt hana.

Ég á vinkonu sem heitir Guðjóna Sigríður Elísabet ... kölluð Gauja. Hún ber þessi nöfn með miklum sóma! Veit ekki með Pálma, hef aldrei heyrt þetta.  

[Jenný Anna Baldursdóttir, 1.7.2007 kl. 22:34]

Hvað með Milly-Molly-Mandy stelpur?  Og Möttu-Maju?  Hönnubækurnar og..og..og.  Ég held að ég hafi sjaldan hlegið eins mikið sem unglingur þegar ég las ráðskonuna á Grund.

[Brynja Hjaltadóttir, 1.7.2007 kl. 23:12]

Ég hafði engan áhuga á þessum stelpubókum. Las bara Bonanza og Frank&Jóa..enda heita synir mínir Frank & Jói...hmm...nei átti einu sinni kærasta sem heitir Frank en man ekki eftir neinum Jóa...

Ég heiti nú bara Guðríður og kölluð Brynja...

Ljótur Bambi..ææ..

[Guðrún Jóhannesdóttir, 2.7.2007 kl. 01:34]

Ó já !    Hönnu bækurnar :)  þegar ég var krakkakvikindi las ég Hönnu bækurnar, var sérstaklega hrifin af " hanna eignast hótel"  ætlaði mér sannarlega að eignast hótel þegar ég yrði stór :) nema hvað, þegar ég varð stór, átti ég GISTIHEIMILI á Hvammstanga Gunnukaffi, en það gerðist nú aldrei nein sérstök dramatík þar hehehe

 En svona er nú að trúa á draumana sína, þá eru miklar líkur á að þeir rætist .

[Kristín M. Jóhannsdóttir, 4.7.2007 kl. 02:25]

Það er rétt hjá Gurrí, ég er bara málfræðingur. Annars var ég með þættina Daglegt mál um tíma í útvarpinu og í ein tvö ár var ég málfarsráðunautur á sjónvarpinu, þannig að ég er næstum því sjónvarpskona.

[Guðríður Hrefna Haraldsdóttir, 4.7.2007 kl. 08:12]

Ég setti BARA innan gæsalappa af því að mér finnst ögn merkilegra að vera málfræðingur ... lít alla vega rosalega mikið upp til þín!