Fyrsti kossinn 07.07.72

Þann 7. júlí 1972 fór ég á afdrifaríkt ball í Aratungu. Ég var of ung, eða tæplega 14 ára, en afar fullorðinsleg eftir aldri, hélt ég, þar sem mér var hleypt inn. Komst að þeirri niðurstöðu síðar að dyraverðirnir hafi vitað að þetta væri „kaupakonan“ á Felli, enginn vandræðagemsi. Hitti aðrar stelpur úr sveitinni, m.a. eina sem var í sveit í Fellskoti, og hékk með þeim. Myndardrengur bauð mér upp og hjartað fór að slá hraðar. Hann var á sveitabæ í nágrenninu og ég hafði nokkrum sinnum séð hann og fannst hann sætur ... og við dönsuðum nokkra dansa saman.

Skellur þá ekki á þetta líka rosalega vangalag og ... til að gera stutta sögu enn styttri ... þarna fékk ég fyrsta kossinn. Heimurinn snerist ... og eins gott að þetta var vangadans með stuðningi, annars hefði ég hnigið beint niður á gólf. Ég varð samstundis rosalega skotin í honum. Sú ást entist eitthvað fram á veturinn þótt ég hafi ekki hitt hann aftur þetta sumar. Með kænsku og snilli tókst mér um haustið að hafa upp á símanúmerinu hans. Ég bað vinkonu mína (sem hafði aldrei hitt hann) um að hringja í hann og setti eyrað á mér upp við tólið svo að ég heyrði líka. Henni tókst að veiða upp úr honum eitthvað um sumarið og stelpurnar í sveitinni en það var eins og hann myndi ekkert eftir mér ... Ég steinhætti að vera skotin í honum, fannst ekki taka því, enda var annar eiginlega kominn til sögunnar, maður sem löngu síðar varð fyrrverandi eiginmaður minn.

Tuttugu árum seinna, á Radíuskvöldi með Davíð Þór og Steini Ármanni, hitti ég unga kaupamanninn næst og hann mundi eftir mér, merkilegt nokk.
Saklausasti brandarinn þetta kvöldið og sá eini sem ég man eftir var: Veistu hvað skýlið sem hýsir Fokkerflugvélarnar á nóttunni heitir? Svar: Mother-fokker. Fólk skemmti sér flest mjög vel, nema þessi fyrstakossmaður sem hvarf af vettvangi nokkru síðar fölur á vangann. Hann sagði mér í kveðjuskyni að hann hefði ekki smekk fyrir svonalöguðu.     

Eftir þennan fyrsta koss var greinilega engin leið að hætta ... sem sannast best á því að erfðaprinsinn fæddist tæpum átta árum síðar.

Hér fyrir neðan er rómantíska vangalagið í boði youtube. 
http://www.youtube.com/watch?v=IcQRI1vzd-0  

Athugasemdir

[Jóna Á. Gísladóttir, 7.7.2007 kl. 01:23]

það var nú gott að þú sast ekki uppi með þennan fýlupúka.

[Guðríður Hrefna Haraldsdóttir, 7.7.2007 kl. 01:26]

Segðu ... hver grenjaði ekki úr hlátri yfir Radíusbræðrum?

[Jenný Anna Baldursdóttir, 7.7.2007 kl. 01:38]

Ekki vangaðir þú við þetta lag 1972?  Btw 1972 var ég 20 ára góða mín.  Þú ert barn. OMG (skelfingarkarl)

[Ragnheiður , 7.7.2007 kl. 08:25]

sæt saga hjá þér Gurrý....ég skil hann samt vel, hef ekki smekk fyrir radíus heldur

[Kristín Katla Árnadóttir, 7.7.2007 kl. 08:59]

Skemmtileg saga Gurrí mín.

[Maja Solla (IP-tala skráð) 7.7.2007 kl. 09:17]

Aldeilis gaman að vera með svona dagsetningar á hreinu.

[Guðríður Hrefna Haraldsdóttir, 7.7.2007 kl. 09:37]

Hmmm, já Maja Solla, ég er frekar mikill nörd! Hélt líka Dagbók veiðimannsins að sjálfsögðu og skrifaði allt sem ég veiddi upp frá því ...

[Brynja Hjaltadóttir, 7.7.2007 kl. 20:57]

Eftirminnilegasta vangalag sem ég man eftir er Careless whisper með George Michael..

Jummí..

[Kristín M. Jóhannsdóttir, 8.7.2007 kl. 00:22]

Þykir mér þetta góð saga og svona rjómablár rómans er miklu skemmtilegri er kynlífið á topp vinsældarlistans.

[Bertha Sigmundsdóttir, 8.7.2007 kl. 17:22]

Já hver man ekki eftir fyrsta kossinum, minn var í afmælispartýi og ég var algjör slut, kyssti tvo stráka það kvöldið, einn hét Halldór, og hinn hét Elmar. Elmar varð svo fyrsti kærastinn minn, því að hún Þórdís vinkona mín spurði hann í frímínútunum hvort hann vildi byrja með mér, svo vorum við saman í þrjár heilar vikur. Þvílíkt stuð, töluðum aldrei saman, og kysstumst aldrei aftur...