Ástarsaga að morgni og upprisa hunds a la EHÁ

Fékk far í bæinn með Birki og Ástu ... jú, einmitt, sögupersónunum úr unglingabókinni þarna ... Það var svo gaman hjá okkur á leiðinni að Birkir bíleigandi móðgaðist ekkert alvarlega þótt Yaris-dolla þyti fram úr drossíunni hans. Bylgjan var á og  í einkabíl er hún ekki jafnbráðaofnæmisvekjandi og í strætó. Við meira að segja skellihlógum að fyndni útvarpsfólksins. "Hvað er hraðfiskibátur?" "Hmmm, er það ekki bátur sem veiðir tilbúna fiskrétti?"

Æ, ég er svo veik fyrir aulabröndurum ...

Birkir ók mér upp að dyrum í vinnunni, þessi elska. Vel þegið svona einu sinni að þurfa ekki að klöngrast, ég meina svífa léttilega, upp brekkuna. Svo bara datt ég ofan í VINNU strax upp úr hálfátta í stað þess að byrja á því að blogga ... vildi koma tveimur greinum sem ég vann í gær í prófarkalestur sem allra fyrst. Bjóst hálfpartinn við því að sjá starfsmenn DV húka við dyrnar, svona miðað við fréttir morgunsins en við erum að sameinast þeim. Ef þannig færi að nafn okkar breyttist í DV get ég loksins farið að nota gömlu pappírspressuna mína sem á stendur: Guðríður - DV. Indæll maður hjá Álfasteini vildi endilega gefa mér slíkan stein/pressu fyrir 20 árum þegar ég vann hjá DV. Fer ekki lífið í hringi?

Elías Halldór Ágústsson samdi nýja trúarjátningu og birti á Moggabloggi sínu í gær. Ég stal henni miskunnarlaust ... maðurinn er snillingur:

„Ég trúi á Lúkas, hans einkahund, Drottinn vorn, sem mærður var af Barnalandsmömmum, píndur á dögum Moggabloggsins, sparkaður, dáinn og urðaður, steig niður til heljar, reis á þriðju viku upp frá dauðum, situr ofan Akureyrar og mun þaðan koma að dæma plebba og fávita.“

Athugasemdir

[Kristín Katla Árnadóttir, 18.7.2007 kl. 11:06]

Þetta er fyndið Gurrí með þessa nýju trúarjátningu.

[Anna Ólafsdóttir Björnsson, 18.7.2007 kl. 11:47]

Æ, æ, ég sem elska dýr, blandaði mér samt ekki í Lúkasarumræðuna, þetta er bara fyndið.

[Jenný Anna Baldursdóttir, 18.7.2007 kl. 12:28]

Hahahahahahahaha skessuhlátur í tveimur  liðum.

1. Trúarjátning Elíasar bara brilljant

2. Hraðfiskbáturinn brilljant líka, er sökker fyrir aulahúmor.

Bíddu sameinast DV? Verður þér þá ekki bannað að vera á Moggabloggi? OMG

[Gunna-Polly, 18.7.2007 kl. 12:44]

snilldar trúarjátning

ég vann nú á skiptiboði DV 1 ár með Eddu og  co

[Anna Ólafsdóttir Björnsson, 18.7.2007 kl. 13:01]

Æjá, eitt enn sem hraðfiskibáturinn minnir á, ég var nefnilega alltaf að reyna að finna út hjá mömmu hvaða bátar færu á plokkfiskveiðar, þegar ég var lítil. Maður heyrði um báta á síldveiðum (já, ég er svo gömul) og þorskveiðum og alls konar veiðum en aldrei á plokkfiskveiðum og mér fannst (og finnst) plokkfiskur svo rosalega góður. Hef ábyggilega verið skíthrædd um að plokkfiskurinn í landinu kláraðist, fyrst enginn var að veiða hann, en mömmu fannst þessi aulabrandari bara ekkert fyndinn. 

[Ásdís Sigurðardóttir, 18.7.2007 kl. 13:01]

Þú er snilla gullið mitt. Kveðja að norðan. Hraðumslagapóstkveðja 

[Díta (IP-tala skráð) 18.7.2007 kl. 13:07]

Þessi trúarjátning er snilld! 

Ég verð að kíkja inn á þennan unga snilling (er hann ekki annars ungur???) 

[Jóna Á. Gísladóttir, 18.7.2007 kl. 22:34]

þessi trúarjátning á skilið að verða lærð utan að og hana nú

Gunna-Pollý; og Guðlaugu...? ég var á smáauglýsingadeildinni.