Óætur húsfélagsfundur og þrælfyndinn Monk

Hússtjórnarfundur var haldinn í kvöld og ómissandi ritarinn úr himnaríki var boðaður með hálftíma fyrirvara. Þar sem húsfélagsformaðurinn er kokkur hugsaði ég mér gott til glóðarinnar að fá eitthvað gott að borða, hafði ekki enn snætt kvöldverð. Hann Níels eiturbrasari (í kvöld) bauð BARA upp á Prins Póló með kaffinu og það var ekki hægt að drekka kaffið hans af því að hann átti bara FJÖRMJÓLK út í það. Ég reyndi að segja honum á síðasta fundi að það væri plebbalegt að nota annað en nýmjólk, G-mjólk eða kaffirjóma út í kaffi en húsfélagsformaðurinn er í heilsuátaki og því voru móttökurnar svona meinlætalegar. Mig grunar líka að þetta hafi verið gulur Bragi ... Ég man nú eftir þeim húsfundum þegar kokkurinn hrærði í rækjusalat og skellti í bakarístertu. Kannski hefur Lýðheilsustöð þessi áhrif ... alla vega hefur karlinn ekkert minnkað reykingarnar síðan 1. júní, frekar en aðrir landsmenn sem reykja ... sem mér finnst stórundarlegt. Ætlunin var víst með reykingabanninu á veitingastöðum að gera reykingamönnum svo erfitt fyrir að þeir hættu. (Fliss)

Mjög fyndið atriði var í Monk-þætti í kvöld á Sirkus plús. Verkfall sorphreinsunarmanna stendur yfir og Monk er hjá sálfræðingnum sínum, alveg að fríka út yfir lyktinni í borginni og öllu sorpinu sem hefur safnast upp. Sálfræðingurinn spyr pirraður: „Adrian, have you been sending me your trash?“

Risíbúðin í hinum stigaganginum hefur verið seld og ég fæ pólsk hjón sem nágranna. Þarna fékk ég loksins útskýringuna á örvæntingafulla útlendingnum sem hringdi bjöllunni hjá mér fyrir nokkrum vikum og fór næstum að skæla þegar ég sagði honum að himnaríki væri ekki til sölu. Hann fór bara stigagangavillt, þessi elska. Ég hélt að hann hefði farið húsavillt því að seljandinn hafði, eins og bloggvinir mínir muna, heimsótt mig ÓVÆNT korter í Evróvisjón (í alvöru) og fengið að skoða sig um vegna fyrirhugaðra breytinga á sinni íbúð. Svona breytast nú hlutirnir hratt.

Athugasemdir

[Elín Arnar, 31.7.2007 kl. 00:10]

Þvílíkur dónaskapur að bjóða bara upp á prins póló!! OG LÍTIÐ Í ÞOKKABÓT!!

Hvernig er það átt þú ekki að vera farin að sofa?

[Guðríður Hrefna Haraldsdóttir, 31.7.2007 kl. 00:12]

Jú, þótt fyrr hefði verið ... er sko orðin grútsyfjuð.

[Jenný Anna Baldursdóttir, 31.7.2007 kl. 00:16]

Það er ekki rólegheitamóment þarna hjá þér.  Sofa í haus!  Gn og mundu að taka með þér nesti að ári.

Smjúts.

[Guðríður Hrefna Haraldsdóttir, 31.7.2007 kl. 00:23]

Að ári? Iss, þessir fundir eru næstum mánaðarlega. Svo var ritstjórinn minn að reka mig í rúmið, eins og þú sérð á kommenti númer eitt, og ég þori ekki annað en að hlýða. Kíktu, Jenný, á fyrri hluta framhaldssögunnar á síðunni hennar, það er nú ljótt að gera bloggvinum sínum þetta, ertu ekki sammála?

[Jóna Á. Gísladóttir, 31.7.2007 kl. 01:16]

Ég HATA fjörmjólk og undanrennu í kaffi. hverjum dettur svona fjarstæða í hug.

[Svava S. Steinars, 31.7.2007 kl. 01:42]

Fjörmjólk í kaffi, yuk !  Hún breytir því í gráan viðbjóð sem enginn vill drekka!  En Prins Póló stendur alltaf fyrir sínu !

[Rebbý, 31.7.2007 kl. 06:24]

sakna eiginlega Monks félaga - en ekki ertu öfundsverð af fjölda húsfundanna hjá þér.   ég er óvart í stjórn 2ja húsfélaga (fylgja bæði íbúðinni minni) og hef ekki verið boðuð nema á einn fund í hvoru á rúmu hálfu ári ...... geri aðrir betur

[Anna Ólafsdóttir Björnsson, 31.7.2007 kl. 08:59]

Endurkoma Monk er stórkostlegur sólargeisli í skammvinnri rigningartíð. Gurrí, það er rosalega gott að geta drukkið tvenns konar kaffi, sem eiga ekkert sameiginlegt annað en kaffi. Annars vegar ódrekkandi óþverra og hins vegar eðalkaffi. Ég veit að þú munt aldrei komast á það stig að geta drukkið hið fyrrnefnda, en mikið rosalega er það þægilegur eiginleiki, og nauðsynlegur þeim sem hafa lent í pólitík.

[HAKMO, 31.7.2007 kl. 09:02]

Ohh ég vildi að ég væri með stöð 2, er svo hrifin af Monk .

[Hildigunnur Rúnarsdóttir, 31.7.2007 kl. 10:49]

er gulur Bragi ennþá TIL???

[Kristín Katla Árnadóttir, 31.7.2007 kl. 11:12]

Ég drekk bara svart kaffi.

[Ásdís Sigurðardóttir, 31.7.2007 kl. 13:46]

Ég á eftir að sakna Monk. Ég bjó í blokk í 15 ár og var með húsfélagið þar af í 9, það gekk allt best þegar ég stjórnaði, trúið þið því.??

[Kristín M. Jóhannsdóttir, 31.7.2007 kl. 15:43]

Það er einmitt svona sorphirðuverkfall hjá okkur núna og ég hef velt því fyrir mér að fara að ráði Monks. Hvað kaffi varðar á náttúrulega að drekka það svart því þá þarf maður aldrei að hafa áhyggjur af því hvers konar mjólkurvörur fólk býður uppá.