Held að ég viti ástæðuna ...

Á miðnætti í kvöld verður sýndur á RÚV þáttur um morðið á Gunnari leigubílstjóra, í röðinni Sönn íslensk sakamál. Hef reyndar aldrei verið svo fræg að sjá þessa þætti og stefni að því að verða sofnuð á þessum tíma vegna ókristlegs fótaferðartíma upp úr sex.

Við Mía systir vorum í leynifélaginu Frinton Rods. Pabbi hjálpaði okkur að finna sérstök leyninúmer sem voru reyndar fyrrihluti kennitölu okkar, ég var alla vega númer 120858. Við fórum í langar gönguferðir um Akranes og reyndum að upplýsa dularfull mál ef þau ræki á fjörur okkar. Minnir að við höfum elt grunsamlegan mann alla leið niður á hótel þar sem hann hvarf inn í teríuna. Mjög líklega framdi hann myrkraverk þar en við gátum ekkert sannað, kannski var hann látinn hverfa  en við sáum hann aldrei aftur. Þegar morðið á Gunnari leigubílstjóra kom í blöðunum og þjóðfélagið lék á reiðiskjálfi vegna þess ákváðum við að nú væri komið að því að leysa okkar fyrsta mál. Enid Blyton sagði a.m.k. í Dularfullu bókunum að krakkar væru svo klárir og léku sér að því að gera lögregluna að fífli, nema góða lögreglustjórann. Þetta strandaði bara á einu, hvernig áttum við að komast til Reykjavíkur? Vissulega gekk Akraborgin á milli ... en hvernig áttum við að smygla okkur með henni og plata mömmu þannig að hún fattaði ekki að við værum horfnar. Fullorðið fólk hafði þá, líkt og í dag, engan skilning á háleitum fyrirætlunum barna, um það mátti líka lesa í Dularfullu bókunum. Svo var annað vandamál, höfuðborgin var svo risastór og við kunnum ekki á strætó. Mitt í öllum þessum pælingum varð Mía unglingur, hætti að hjóla og fór að ganga í síðri kápu og sagði sig úr leynifélaginu.

Ég fer ekki ofan af því að átthagafjötrar og gelgja hafi verið ástæða þess að málið upplýstist aldrei.

Athugasemdir

[Gúrúinn, 19.8.2007 kl. 13:24]

Voru kennitölur þegar þú varst ung? Voru það ekki nafnnúmer?

Annars er leitt að þið upplýstuð ekki glæpinn. Það er ekki oft sem hormónar hafa komið í veg fyrir glæpi, yfirleitt er það í hina áttina. Ég sá annars ekki þáttinn, fannst morðinginn einhvern tímann?

[Rebbý, 19.8.2007 kl. 13:26]

hahahaha    flott að lesa þetta í morgunsárið ... glaðvöknuð núna
vesen að Mía varð unglingur svona snemma

[Guðríður Hrefna Haraldsdóttir, 19.8.2007 kl. 13:28]

Morðinginn fannst aldrei, skilst mér!

Mig minnir að það hafi verið þessi drög að kennitölu á nafnskírteininu og síðustu fjórir stafirnir (í kennitölunni) voru svokallað fæðingarnúmer og 9 aftast. Ég fattaði þetta allt sko þegar ég bjó í torfkofanum og hitaði kaffi fyrir mömmu á hlóðunum. 

[SigrúnSveitó, 19.8.2007 kl. 14:25]

Mikið er ég fegin að hafa ekki átt stóra systir!! Greinilega ekkert hægt að stóla á þær...vona að mínar 4 yngri systur hafi ekki svona slæma reynslu af mér...

[Ásdís Sigurðardóttir, 19.8.2007 kl. 15:01]

Ævintýrabækurnar voru sko frábærar, ég vildi að hefði tölu á öllum þeim bókum sem ég las frá 5 ára aldri til 18 það er sko safn á heilt skip til Laos.  Kær kveðja á Skagann. Njóttu dagsins.

[Svava S. Steinars, 19.8.2007 kl. 16:47]

Skv. pabba vissu allir hver morðinginn var, bara tókst ekki að sanna glæpinn á hann.... Þetta var audda fyrir daga CSI og töfraprentarans þeirra sem gubbar út úr sér greiningu á dna og hverju sem er á nokkrum mínútum.  En það er ekki of seint að pússa rykið af spæjarahæfileikunum, nú ratar þú um bæinn og þarft ekki að laumast neitt.  Væri fínt að crack a cold case   Btw, var virkilega til bók sem hét Ævintýrastíflan ??? Man ekki eftir að hafa lesið hana og ég hélt virkilega að ég hefði lesið hverja einustu Enid Blyton bók sem gefin hefur verið út

[Guðríður Hrefna Haraldsdóttir, 19.8.2007 kl. 17:33]

Baggalútur gaf út Ævintýrastífluna, innihaldið tengist eitthvað Kárahnjúkavirkjun. Svo allir vissu hver morðinginn var, þær fréttir komu aldrei á Skagann ... fáum Cold Case liðið í málið! Hringi beint í Míu. 

[Jenný Anna Baldursdóttir, 19.8.2007 kl. 17:34]

Leiðindi að þú skulir ekki hafa þekkt mig þegar þið ætluðuð að leysa Gunnarsmálið.  Ég hefði kennt þér hvernig má svindla sér í Akraborgina með góðum árangri.

Af hverju í ósköpunum hét félagið: Frinton Rods??

[Guðríður Hrefna Haraldsdóttir, 19.8.2007 kl. 17:44]

Þið Svava eruð efni í leynilögreglumenn, kunnið að spyrja réttu spurninganna! Í einni Dularfullu bókinni fundust tveir bréfmiðar á glæpavettvangi, á öðrum stóð Frinton og á hinum Rods. Í ljós kom að mjólkurpósturinn hafði óhreint mjöl í pokahorninu en miðarnir voru raktir til hans. 

[Þröstur Unnar, 19.8.2007 kl. 17:49]

Svava, Gurrí og Jenný, bara skiptast á við Stebba yfirlöggu, og standa miðbæjarvaktir. Þið næðuð örugglega fullt af þrjótum.

[Kristín Katla Árnadóttir, 19.8.2007 kl. 18:07]

Þetta er nú meira Ævintýrið.

[Hrönn Sigurðardóttir, 19.8.2007 kl. 19:36]

Ferlega hefði nú verið spennandi ef þið hefðuð leyst gátuna.....

[Halla Rut , 19.8.2007 kl. 19:59]

Ég ætla að horfa á þáttinn.

[Jóna Á. Gísladóttir, 19.8.2007 kl. 22:37]

ARRRRGGGHHHH .... þegar ég bjó í torfkofanum og hitaði kaffi fyrir mömmu á hlóðunum.....

ég skynja smá frústreringu í þessu hjá þér. Ég er í kasti

[Guðríður Hrefna Haraldsdóttir, 19.8.2007 kl. 22:45]

Hehehhe, þetta var svona spurning: Voru til bílar þegar þú varst lítil? Katrín sagði líka að ég væri nörd af því að ég væri að verða fimmtug og ég sem er enn með leifar af 49 ára veislunni inni í ísskáp, skjúsmí bara, má maður vera fjörutíuogeitthvað í friði!!! Skyldi Madonna fá svona spurningar oft á dag? 

[krossgata, 19.8.2007 kl. 22:45]

Það voru nafnnúmer þegar ég var að hita kaffi fyrir mömmu á kolaeldavélinni í bárujárnshjallinum... (er nefnilega ekki alveg orðin 49 og aðeins orðið þróun í heimilistækjum og íslenskum byggingariðnaði).  Það voru tvær fjögurra stafa tölur með bandstriki á milli og ég man mitt nafnnúmer.  Það gerist með aldrinum líka, maður man allt gamalt en ekkert nýtt tollir í minninu stundinni lengur.

[Brynja Hjaltadóttir, 19.8.2007 kl. 23:37]

Ég ætlaði bara að segja það ! Ævintýrastíflan og ég hefði aldrei lesið hana...döh hvað maður er einfaldur..

[Katrín Snæhólm Baldursdóttir, 20.8.2007 kl. 00:50]

Madonna borgar sínum aðdáendum morð fjár fyrir að þegja yfir svona upplýsingum og spurningum. Viltu reikningsnúmerið mitt????????? Við erum ekki að tala um mánaðarlaun á Vikunni sko.....meira svona söluverð á Alvöru Himnaríki.

[Laufey Ólafsdóttir, 20.8.2007 kl. 01:20]

Ég er talsvert undir fertugu enn og man bara eftir nafnnúmerunum. Var örugglega komin (eða fannst ég vera komin) á fullorðinsár þegar kennitöludótið kom.

Var einu sinni haldin Ævintýrastíflunni. Hún afar heiftarleg ritstífla og varði í nokkur ár. Þvílík ævintýrin sem ég kom mér í á meðan. Gott að vera farin að skrifa aftur. Sparar mér mikinn höfuðverk.

[Jens Guð, 20.8.2007 kl. 01:26]

  Ég hef ekki séð þessa þætti Sönn íslensk sakamál.  Er ekki með sjónvarp.  En mér skildist á sínum tíma að lögreglan hafi verið nokkuð viss um morðingja leigubílstjórans en vantað herslumun upp á sönnun. 

[Guðríður Hrefna Haraldsdóttir, 22.8.2007 kl. 14:36]

Anna panna, lesa kommentin, sjá komment númer 8 þar sem í ljós kemur að Ævintýrastíflan fjallar um Kárahnjúkavirkjun og var samin af Baggalútunum knáu á baggalutur.is, ég stal bókarkápunni miskunnarlaust af google.is.