Ný frænka, kátir kettir og dularfull dúndurgræja

Fyrir nokkrum dögum bættist gullfalleg frænka í hóp fallegustu kvenna landsins þegar Margrét, frænka mín, og Pétur, maðurinn hennar, eignuðust flotta dóttur. Það var alveg furðulegt hvað systir hennar, Gurrí, en alltaf kölluð Freyja Ísold, fullorðnaðist fljótt við að verða stóra systir. Freyja fær flotta gjöf frá Skagafrænku, þetta eru svo stór tímamót, litla barnið á heldur ekki bara að fá gjöf ... eða það finnst mér ekki.

Heimsótti Laufeyju vinkonu eftir vinnu og það var sko ferð til fjár. Ég held að hún haldi að ég hafi orðið fimmtug fyrr í mánuðnum, ja, eða fertug. Hún dró mig með sér í búð og keypti handa mér kápu, skó og boli og gaf mér í afmælisgjöf. Síðan var eldað og spjallað, skutlað í Mosó og skriðið inn úr dyrunum hálftíu. Svona djamm er skemmtilegt. Tína, tíkin á heimilinu, verður alltaf svo æst þegar ég kem í heimsókn að hún pissar á gólfið. Barbara, au pair stelpan, sagði: "She must love you!" og það er alveg gagnkvæmt! Barbara er pólsk svo að ég sló um með mig orðinu nje, aftur og aftur, því eina sem ég kann í pólsku. Þegar ég hitti Finna á förnum vegi reyni ég að koma orðinu hissi inn en það þýðir lyfta og er líka eina orðið sem ég kann á finnsku. Samræðurnar verða alltaf athyglisverðar, þetta er bara spurning um tjáninguna. 

Kettirnir voru kátir þegar ég kom heim en þeir verða enn kátari þegar þeir sjá hvaða þroskaleikfang ég keypti handa þeim í dag. Meira um það síðar, það er alla vega dúndurgræja, ekki samt eins og tryllitækið sem konan óskaði sér í afmælisgjöf, svona tryllitæki sem kæmist upp í 100 á einni sekúndu. Maðurinn hennar keypti glæsilega baðvigt handa henni.

Athugasemdir

[Hrönn Sigurðardóttir, 30.8.2007 kl. 22:18]

Sætar systur. Til hamingju með nýju frænkuna og allar þær gömlu líka

[Jenný Anna Baldursdóttir, 30.8.2007 kl. 22:23]

Heyrðu mig vantar svona gjafmilda frænku.  Rosalega eru þetta falleg börn.  Gurrí alveg einstaklega þroskuð í framan eins og nafnan.  Hún er auðvitað kölluð Freyja Ísold til að aðskilja ykkur.  Hahahahha

[krossgata, 30.8.2007 kl. 22:25]

Mér er ekkert mjög illa við minn ekta, en ef hann gæfi mér baðvigt með þessari athugasemd hugsa ég að ég myndir berja hann í hausinn með vigtinni.   Mér finnst annars hentugt að kunna að skála á sem flestum tungumálum.  Það er alltaf auðvelt að koma því inn í umræður, það má skála í öllum drykkjum áfengum sem óáfengum. 

[Þröstur Unnar, 30.8.2007 kl. 22:34]

Dúllurnar.....

Hvað með það að gefa elskunni sinni baðvigt og sýna henni með því að manni sé sko ekki sama hvernig hún líti út, á meðan hún sýnir tilþrif sín við heimilisstörfin, meðan maður nýtur boltans í sjónvarpinu.

[Ásdís Sigurðardóttir, 30.8.2007 kl. 22:38]

Alltaf jafn skemmtilegar færslurnar þínar.  Þú hlýtur að vera í einhverju mega uppáhaldi hjá þessari frænku þinni, ekkert smá flottar gjafir. Ég verð nú að viðurkenna að mér finnst doldið fyndið að hundurinn piss á gólfið af gleði þegar þú kemur. Frænkurnar þínar eru algjörir molar. Eg hendi vigtinni minni í fyrra og þarf enga lengur, reyni bara að passa í fötin, en sum hlaupa í þvotti. Spennandi að vita hvað kisurnar fá, mín fékk innan úr wc rúllu í kvöld og hamaðist þvílíkt á henni, alsæl og steinsefur núna hjá mömmu sinni þessi elska.

[Guðríður Hrefna Haraldsdóttir, 30.8.2007 kl. 22:52]

Svona eiginmenn kenna manni að segja hlutina beint: "Mig langar í Ferrari ..."

Laufey er reyndar ekki frænka, heldur góð vinkona sem ég kynntist fyrir rúmum 20 árum. Hún er ættmóðirin í samhentri fjölskyldu sem mér finnst ég tilheyra.  

[Rannveig Lena Gísladóttir, 30.8.2007 kl. 23:04]

Til lukku með nýju frænkuna :)

Bóndinn minn hefði fengið stóra kúlu á hausinn hefði hann gefið mér svona... hann hefði nefnilega fengið eintakið í hausinn aftur!

[Þröstur Unnar, 30.8.2007 kl. 23:06]

Þið eruð ótrúlegar.....

[Guðríður Hrefna Haraldsdóttir, 30.8.2007 kl. 23:11]

Við viljum bara Ferrari ...Þröstur, enga baðvigt þótt hún komist upp í 100 á engum tíma.

[Svava S. Steinars, 30.8.2007 kl. 23:18]

Til hamingju með nýju frænkuna, Gurrí II býst ég við   Hvaða þroskaleikföng keyptir þú handa kisunum ?

[Guðríður Hrefna Haraldsdóttir, 30.8.2007 kl. 23:22]

Það er leyndarmál í bili, þangað til ég hef lært á það og séð hvort það virkar eins og það á að gera og hvort það er jafnframt það dásamlega þroskaleikfang fyrir Tomma og Kubb sem ég vona. Frekari fréttir á laugardaginn ...

[Guðrún B. (IP-tala skráð) 30.8.2007 kl. 23:36]

Til lukku með nýju frænkuna .. hún er algjör moli

[Ólöf Anna , 30.8.2007 kl. 23:42]

[Steingrímur Helgason, 31.8.2007 kl. 00:54]

Gratjú með frænkið, myndar afsprengi.

Tíkarlegt af tíkinni að vera svona tíkarleg við þig.

Hvað er baðvigt ?

S.

[Guðríður Hrefna Haraldsdóttir, 31.8.2007 kl. 09:14]

Baðvigt gengur undir ýmsum nöfnum, eins og baðvog, tæki andskotans, pyntarinn, ógeðið o.s.frv. Svona ógeðstæki hefur ekki verið til á heimili mínu fjölmörg ár. Tíkin var ekki tíkarleg, heldur svo uppfull af ást og gleði að hún ... pissaði, er eitthvað athugavert við það herra Steingrímur? Hahhh, huuuhhhhh!