Veður og vandamenn

Nú stendur yfir landsleikur á hlaðinu við himnaríki. Sjórinn á þó vinninginn, enda er hann skrambi flottur núna. Núna klukkan 19 er háflæði, 3.91 m, skv. sjávarfalla- og áhlaðandaupplýsingum uppáhaldssíðunnar minar: http://vs.sigling.is/pages/84
(Áhugamál: Lestur góðra bóka, áhlaðandaupplýsingar og heimsfriður.)

Sjálfstjórn mín er aðdáunarverð. Hringt var frá Spron áðan, þótt ég sé með rautt X í símaskránni, og mér boðið kreditkort með alls kyns fríðindum og hárri heimild. Ég hefði ekki hikað við að stökkva á þetta fyrir tíu árum en núna hugsaði ég hratt. Á meðan ungi maðurinn í símanum lét dæluna ganga komst ég að þeirri niðurstöðu að ég hefði nákvæmlega ekkert við það að gera og gæti ómögulega réttlætt það fyrir sjálfri mér. Viska ellinnar að laumast að mér eða hrein og klár skynsemi með dassi af yndisþokka? 

Það eru komin sex ár upp á dag síðan ég nagaði mig harkalega í handarbökin yfir því að hafa sagt upp Fjölvarpinu. Heimurinn getur andað léttar þar sem ég er orðin áskrifandi aftur.

Það verður brjáluð rigning á morgun og klikkað rok á fimmtudaginn. Haustið heilsar með látum. Er ég rosalega klikkuð að hafa gaman af þessu?

Sól og blíða er eitthvað svo leiðigjarnt veður, ég held að ég gæti ekki blómstrað í slíku veðri þótt reynt hafi verið að telja mér trú um alla ævi að það sé besta veðrið.

Hreinskilni dagsins var í boði Veðuráhugakonustofu himnaríkis ...

Athugasemdir

[Jenný Anna Baldursdóttir, 11.9.2007 kl. 19:36]

Þú ert ekki klikkuð vegna veðurbleði.  Take it from the one who knows eins og veðurfræðingurinn sagði.  Ég er að fíla þetta í tætlur.  Að segja nei við kreditkorti bendir nærri því til of mikins þroska, ef það er mögulegt.

[Jenný Anna Baldursdóttir, 11.9.2007 kl. 19:38]

Tvær leiðréttingar:  "Veðurgleði" ekki bleði og of "mikils" þroska.  Ég er fífl og ég veit það.  Hahaha

[krossgata, 11.9.2007 kl. 19:45]

Það er fátt notalegra en sitja inni í hlýjunni með góða bók eða krossgátu og hlusta á veðrið berja á húsinu.  Annars finnst mér jarðskjálftar líka sérlega skemmtilegir.... í hæfilegri fjarlægð.

[Ásdís Sigurðardóttir, 11.9.2007 kl. 19:54]

Að horfa á geggjaðann sjógang er bara flott, væri alveg til í að horfa út um gluggann með þér næsta sólarhringinn, hann spáir nefnilega vitlaust áfram, þú verður að vera dugleg að mynda og setja inn á síðuna.  Knús á kisur

[Þröstur Unnar, 11.9.2007 kl. 20:02]

Þú ættir að rölta þér út í gamla vita á fimmtudaginn og smella nokkrum bloggmyndum.

Það er geggjað að vera þar í kolvitlausu veðri.

Vertu bara með gemsann.

[Ása Hildur Guðjónsdóttir, 11.9.2007 kl. 20:34]

“klár skynsemi með dassi af yndisþokka„ ekki nokkur spurning.

[Rannveig Lena Gísladóttir, 11.9.2007 kl. 23:16]

Af hverju ætli bankarnir séu í þessari endalausu sölumennsku?  Græða þeir ekki nógu mikið nú þegar?

[Jens Guð, 12.9.2007 kl. 02:52]

  Við eigum að fagna rigningu og roki.  Rigningin hreinsar og rokið blæs allskonar drasli burt.