Kjaftfori Breiðholtshatarinn ...

„Þú ert ömurleg manneskja, dáin að innan og hefur ekkert að segja ... en þú stelur ansi skemmtilegum myndum á bloggið þitt,“ sagði vinur minn góðlátlega við mig í síma áðan. Þetta er eitt mesta hrós sem ég hef fengið frá honum. Yfirleitt kallar hann mig herfu sem er skárra en belja, sem kom líka til greina. Ég gaf honum góðfúslegt leyfi til að kalla mig herfu, enda er ég ekki herfa svo að það skiptir engu máli.

Mamma þoldi hann ekki við fyrstu kynni en þau hittust heima hjá mér. Hún hefur örugglega fundið á sér að hann væri Breiðholtshatari. Hann var svo indæll að skutla henni heim þennan dag og þegar við ókum Vesturbergið áleiðis að Asparfelli sagði hann eins og þaulvanur leiðsögumaður: „Á vinstri hönd má sjá að verið er að stela veskinu af gamalli konu og hérna á hægri hönd er sjoppurán í gangi!“ Ég emjaði og orgaði en mömmu var ekki jafnskemmt, hún kreisti upp úr sér þvinguðan uppgerðarhlátur en svo bætti kvikindið við: „Bryndís, er þér sama þótt ég fleygi þér út á ferð? Ég vil ekki að hjólkoppunum verði stolið!“

Eftir að nafna mömmu, Schram, skrifaði fyrir löngu grein í blað þar sem hún fór fjandsamlegum orðum um Breiðholt, að mati mömmu, hefur mamma haldið uppi heiðri hverfisins með kjafti og klóm. Hún hefur m.a. bent réttilega á að mun fleiri rán og önnur ofbeldisverk væru framin í miðbænum og Vesturbænum en í Breiðholtinu.

Vinur minn hefur stillt sig um að segja Breiðholtsbrandara í viðurvist hennar eftir að ég skammaði hann fyrir það. En oft þegar ég hlæ hjartanlega að móðgunum hans vill hann meina að það sé þvingaður uppgerðarhlátur eins og heyrðist úr aftursæti bíls hans fyrir 11 árum.

Æ, ég elska hann samt.   

Athugasemdir

[Ragnheiður , 23.9.2007 kl. 23:00]

óboj..hann var heppin að mamma þín lamdi hann ekki með veskinu sínu..

[Glúmur Gylfason (IP-tala skráð) 23.9.2007 kl. 23:03]

Steingrímur Helgason! (?)

[Guðríður Hrefna Haraldsdóttir, 23.9.2007 kl. 23:04]

Hehhehehe, nei, ekki Steingrímur, en álíka snillingur.

Ragga, hann vissi ekki að mamma væri viðkvæm fyrir gagnrýni á Breiðholtið ...  annars hefði hann ekki sagt orð.  

[Steingrímur Helgason, 23.9.2007 kl. 23:12]

JAHÁ !

Þessi Glúmur er glúrinn Gylfasonur !

Hvernig veit hann það um mig að áður en að ég varð kvartaldar gamall sló ég fram í fjölmenni þeirri kenníngu að byggja ætti Kínamúr utan um Breiðholtið & hafa á því bara eitt hlið fyrir ofan Fákshesthúsin, sem að loka ætti 19.00 & opna fyrir strætó aftur 07.00 á morgnanna að fornum Varsjárghettóskum sið? 

Þessara yppu þarf að fletta upp !

Þess fyrir utan samdi ég ekki ~frazann~ "Herfa, herfa, láttu þig hverfa..."  Það er lýgimál !

S.

[Hildigunnur Rúnarsdóttir, 23.9.2007 kl. 23:56]

Vinur? Ekki frændi?

hljómar mjög svipað frænda þínum sem ég þekki líka...

[krossgata, 24.9.2007 kl. 00:32]

Ég sé að þú notaðir orðið emja.  Það gleður mig ósegjanlega mikið. 

Breiðholtið er auðvitað besta hverfið.

[Svava S. Steinars, 24.9.2007 kl. 01:12]

Ekki var ég rænd/kyrkt/nauðgað/brennd eða barin þegar ég bjó í Breiðholtinu.  Vona að ég sleppi líka við það hér í Skipholtinu

[Brynja Hjaltadóttir, 24.9.2007 kl. 06:43]

Hehehe frábær gaur þarna á ferð greinilega...sumir einfaldlega mega móðga mann...og annan.. Af því að þeir eru svo fyndnir.

[Magnús Paul Korntop, 24.9.2007 kl. 08:35]

Lengi lifi Breiðholtið.

[Guðríður Hrefna Haraldsdóttir, 24.9.2007 kl. 09:32]

Hildigunnur, eitthvað skylt, jú ... Að sjálfsögðu nota ég emja þér til heiðurs, Krossgata. Brynja, hann er rosalega fyndinn ... Sammála, Magnús, Breiðholtið lengi lifi!

[Heiða B. Heiðars, 24.9.2007 kl. 09:57]

Hahahaha Ég þekki þennan!!

[Hildigunnur Rúnarsdóttir, 24.9.2007 kl. 10:34]

híhí, ég vissi það :D