Þrjár klárar konur og femíniskur strætóbílstjóri ...

Heimir bílstjóri er annað hvort sannur femínisti eða heyrnarlaus. Frá Mosfellsbæ sátum við þrjár kjarnakonur fremst í strætó; vísindakonan, smiðurinn og ritstjórnarfulltrúinn og töluðum hátt og snjallt um vísindi (æ, þið mynduð ekki skilja það ...), misrétti (Ísland 2007), úrtölur (konur kunna ekki að keyra, skilja ekki vísindi og geta ekki lært stærðfræði) og froska (dæmisaga frá smiðnum). Margir kjósa að misskilja svona umræður um misrétti og halda að verið sé að tala illa um karlmenn, sú var auðvitað ekki raunin, við erum allar, held ég, alveg kolvitlausar í stráka, eins og flestir femínistar.

Á leiðinni upp kúlurassbrekkuna tók ég vel á ... gekk rösklega og fann hvernig rassvöðvarnir styrktust með hverjum metranum ... og það var eins og við manninn mælt, maðurinn á Merrild-sendibílnum flautaði næstum því á mig og var alveg við það að stoppa fyrir mér svo að ég kæmist yfir götuna. Hann stoppar pottþétt á mánudaginn. 

Nellí prófarkalesari kom rennblaut í hús nokkrum mínútum á eftir mér. Hún varð holdvot inn að beini á því að labba úr bílnum sínum og þessa millimetra að húsinu. Ég nýt greinilega velþóknunar veðurguðanna sem láta víst bara rigna á rangláta. Eru ekki prófarkalesarar hvort eð er í sama flokki og stöðumælaverðir? Sífellt nöldrandi ... "þú átt ekki að leggja hérna" ... "þú átt ekki að skrifa Y í klifra" ... osfrv.

Athugasemdir

[Jenný Anna Baldursdóttir, 5.10.2007 kl. 09:11]

Sumir skrifa "ý" í femýnisti.  Ég veit ekki hvort ég myndi vilja láta prófarkalesa það í burt (Danmerkurfarinn Keli).

Annars skil ég ekki hvers vegna fólk heldur að það fari fram einhverjar lágstéttarumræður í almenningsvögnum, svona yfirleitt.  Ónei, þar fara fram háakademískar umræður um allt milli himins og jarðar, eins og þín færsla sannar.

[krossgata, 5.10.2007 kl. 09:31]

Ég hef lengi lagt metnað minn í að afsanna ýmislegt í úrtölufræðum.  Til dæmis bakka ég alltaf í stæði og er sérlega leikin við það.    En líklega er ég ranglát (enda rigndi á mig á leið frá bíl að inngangi vinnustaðar)  og yrði líklega flokkuð með prófarkalesurum eða mamma myndi alla vega setja mig þar.  Ég set y alltaf á rétta staði og er mjög liðleg við að benda henni á hvar þau eigi ekki að vera. 

[Guðríður Hrefna Haraldsdóttir, 5.10.2007 kl. 09:48]

Ég er ekkert "skárri" en prófarkalesari, sonur minn fékk ekki einu sinni að nota orðið SKE í æsku, og gerir aldrei þótt fullorðinn sé, tek það fram að ég elska prófarkalesanana mína ... og hef nákvæmlega EKKERT upp á stöðumælaverði að klaga, enda legg ég aldrei ólöglega, einhverra hluta vegna!

Já, Jenný, þær verða stundum ansi akademískar samræðurnar á morgnana, enda er víst ljóta og vitlausa fólkið sem áður tók strætó svo ljótt og vitlaust að það keypti sér bíl ... Nú er pláss fyrir okkur snillana!

[Guðrún Jóhannesdóttir, 5.10.2007 kl. 11:43]

[Katrín Snæhólm Baldursdóttir, 5.10.2007 kl. 12:39]

Kúlurassabrekkan á eftir að finn aþér mannsefni Gurrí mín..einhvern sem snarbremsar þegar þú bíður eftir að komast yfir götu með þinn snilldarhaus og lögulega rass.

Ég heyrði einu sinni samræður í strætó sem eru þess eðlis að ég get ekki haft þær eftir. Verð bara rjóð og undirleit þegar ég ryfja þær upp. Voru frekar á dónalegar sko og þetta var fólk á miðjum aldri sem talaði mig eldrauða í framan.

ypsilonið er í boði prófarkalesara Vikunnar.

Góða helgi

[Dagbjört (IP-tala skráð) 5.10.2007 kl. 12:59]

Hmmmm froska? Mér finnst það áhugaverðasta umræðuefnið! Hafði smiðurinn dæmisögu um froska???

[Guðríður Hrefna Haraldsdóttir, 5.10.2007 kl. 13:16]

Dæmisagan um froskana: Einu sinni ákváðu nokkrir froskar að klifra upp háa byggingu. Froskarnir á jörðu niðri sögðu aftur og aftur: Þið getið þetta ekki, ó, þið dettið! Og sjá, þeir duttu hver af öðrum, allir nema einn sem heyrði ekki úrtölurnar. Í ljós kom að hann var heyrnarlaus.

Hefði gaman af því að heyra strætósöguna við gott tækifæri, Katrín ... múahahahhahaah ... 

[Ásdís Sigurðardóttir, 5.10.2007 kl. 13:40]

alltaf gaman að lesa þínar færslur. Getur þú nokkuð útvegað mér viðtalið við hana Lovísu sem var í Vikunni um daginn, ég er innilokuð og kemst ekkert næstu vikur.  Eigðu góða helgi með kisunum.   

[Magnús Geir Guðmundsson, 5.10.2007 kl. 15:48]

Æ Gurrí, þú og þinn rass, bráðum fer mig að langa að klappa honum!

Ritstjórnarfulltrúi? Fór alveg framhjá mér, að þú hafir verið lækkuð í tign þarna um daginn!!

En svo áttu ekkert með að heyra blautar frásagnir frá vinkonunni góðu, mundu að þú ert TEPRA!

[Heiða B. Heiðars, 5.10.2007 kl. 15:59]

Þú ert ógeðslega fyndin þessa dagana Gurrí!! Hvað er í vatninu þarna á Skaganum?

[Ragnheiður , 5.10.2007 kl. 16:45]

Hm verður maður ekki að eiga bíl til að leggja ólöglega ? Froskarnir eru góðir, ég held að ég sé heyrnardaufur froskur..THERE  I said it ! Hef aldrei skilið get ekki hugtakið....

Knús á ykkur elskurnar á Skaganum

[Jóna Á. Gísladóttir, 5.10.2007 kl. 16:54]

 Ég er sammála Heiðu. Þú ert fljúgandi mælsk og dregur sjálfa þig saman í háði þessa dagana. Baaaara fyndin. Takk fyrir pistil

[Guðríður Hrefna Haraldsdóttir, 5.10.2007 kl. 17:27]

Heheheh, ég hitti SME í dag og það urðu fagnaðarfundir með okkur, faðmlög og alles. Hef ekki hitt þessa elsku í mörg ár! Já, ske er danska og rosalega ljótt, a.m.k. í rituðu máli.

Farin heim!!! úúúúúúú

[Glúmur Gylfason (IP-tala skráð) 5.10.2007 kl. 19:11]

"Kúlurassabrekka"? Er þetta viljandi stagl sem á að þýða rassarassabrekka? Culo þýðir rass á ítölsku. Hugsanlega líka á latínu. Veit ekki.

Er prófarkalesarinn Nellí kvenkyns? Lærði þá reglu í barnaskóla að öll kvenmannsnöfn sem enduðu á hljóðinu í væru rituð með löngu ý.

[Guðríður Hrefna Haraldsdóttir, 5.10.2007 kl. 19:25]

Vá, tókst mér óafvitandi að segja rass tvisvar í einu orði? Vá, hvað ég get verið fyndin ... hahahhaha! Takk fyrir þetta.

Líklega er Nellý með Ý, þar sem hún heitir Nellý ... aftur á móti fékk ég stuðning Orðabókar Háskólans við að breyta Gurrý í Gurrí fyrir 20 árum, enda gælunafn. Vil alls ekki láta kalla mig Gurrujjjj ...

[Nanna Rögnvaldardóttir, 5.10.2007 kl. 21:46]

En Gurrí, ef þú hafnar ske á þeirri forsendu að það sé danska (reyndar upprunalega þýska), verðurðu þá ekki líka að hafna kannski á sömu forsendum (það er samsett úr kann og ske)? Hvorttveggja er a.m.k. 500 ára gamalt í íslensku, ske kemur m.a. mjög oft fyrir í Nýjatestamentisþýðingu Odds Gottskálkssonar, sem er elsta prentuð bók sem til er á íslensku. Má ekki segja að orðið hafi unnið sér þegnrétt á nærri 500 árum? 

[Nanna Rögnvaldardóttir, 5.10.2007 kl. 22:07]

... eða reyndar 700 árum - ske kemur fyrst fyrir í íslensku á 14. öld.

 En ég vann reyndar einu sinni  hjá manni sem sagðist alltaf finna bragð af tökuorðum þegar hann notaði orð eins og gaffall og skúffa (af því að -ff- inni í orði er ekki til í forníslensku eða eitthvað). Hvorttveggja eru reyndar yngri tökuorð í íslensku en ske.

[Guðríður Hrefna Haraldsdóttir, 5.10.2007 kl. 22:24]

Mér finnst SKE hræðilega ljótt orð og engist þegar fólk notar það, a.m.k. í ritmáli. Berst gegn því en líklega vonlausri baráttu. Takk fyrir fróðleikinn, þú klikkar ekki. Vissi reyndar þetta um kannski en nota það nú samt. Hef líklega bara "ofnæmi" fyrir hnetum, möndlum, döðlum, rúsínum, morfíni og orðinu SKE.