Hviðu- og karlablogg

Það var svo hvasst í morgun að við Ásta þorðum ekki að dorma í strætó, heldur þyngdum að vanda í okkur pundið með því að gera okkur stífar. Heimir var rosalega þakklátur, þessi elska. Mikið held ég að það myndi auka á öryggið ef hviðumælir yrði settur upp við Akrafjallsveg (þar sem rúta fauk út af fyrir nokkrum árum og fólk slasaðist) og líka á milli ganganna og byggðarinnar á Kjalarnesi. Eini hviðumælirinn er  staðsettur skömmu áður en haldið er niður í Kollafjörð (á suðurleið) og stundum er hreinlega logn þar þegar við feykjumst til hliðanna á öðrum stöðum á leiðinni. Jamm, best að hafa samband við Vegagerðina, þar vinna víst sætir karlar! Ég er meira en til í að fórna mér og fara á stefnumót með þeim ef þarf til að koma upp fleiri mælum, yrði mér bara sönn ánægja.

Maðurinn á Merrild-bílnum var hvergi sjáanlegur íþegar ég gekk upp brekkuna. Hann þarf ekkert að vera hræddur. Það eru mörg ár síðan ég hef kastað mér á sendiferðabílstjóra á ferð í djörfum tilgangi, mér finnst vera komið að strákunum að stíga fyrsta skrefið núna.

Jæja, hafið það gott í dag, illskurnar mínar. Múahahahah

Athugasemdir

[Þröstur Unnar, 10.10.2007 kl. 09:08]

Já Gurrí, tek undir þetta með hviðumælana. Ekkert að marka þá (hann) maður verður að hafa sérstakan veðurvita í nefinu, sem kveikt er á áður en haldið er af stað. Vindáttin skiptir mestu máli þarna. N, NNA, A, áttir eru hættulegar.

Söfnum kvörtunarundirskriftalista.

[Guðríður Hrefna Haraldsdóttir, 10.10.2007 kl. 09:15]

Jamm, til er ég.

[krossgata, 10.10.2007 kl. 09:44]

Fórnarlund þinni eru engin takmörk sett.   Últrasvöl alveg.

[Sigurður Hreiðar, 10.10.2007 kl. 09:45]

Gaman að fylgjast með uppgötvunum þínum á veðurfurðum Kjalarnessins. Einu sinni man ég eftir því að það var óstætt rok við erfidrykkju á Klébergi. Efri hluti af marsípantertu flettist af í heilu lagi þegar átti að bera hana í hús og hefði farið í frumeindum út í Grundarhverfi ef svili minn hefði ekki notið þeirrar vafasömu heppni að verða fyrir henni, í sparifötunum. Í framhaldinu paufuðumst við tveir úr stórviðrinu við félagsheimilið að ganga frá nýorpinni gröf í Saurbæ. Þar blakti ekki logi á eldspýtu.

Er kominn hviðumælir í Kollafjarðarkleifarnar? Hvernig virkar hann?

[Birna Dis Vilbertsdóttir (IP-tala skráð) 10.10.2007 kl. 09:56]

Mér verður hugsað til þín hvern morgun sem ég heyri hvin í blokkinni minni. Og kíki svo á bloggið til að athuga hvort þú ert komin heil á húfi eða hvort þú vinnur að heiman þann daginn. Ég er nefninlega ein rok-hræddasta manneskja Íslands og verð rok-hrædd fyrir hönd annarra líka

[Guðríður Hrefna Haraldsdóttir, 10.10.2007 kl. 09:59]

Veit ekkert hvað það heitir þarna sem mælirinn er en hann er á sama stað og áður, skömmu áður en maður beygir til vinstri niður í Kollafjörðinn á leið frá Akranesi. Hann virkar nú bara vel ... nema þegar hann fauk sl. vetur og sýndi LOGN. Man ekki hvort einhver trúði honum eða hvað ... Þetta er merkilegur staður, Kjalarnesið, held að það væri spennandi að búa þar.

Auðvitað fórna ég mér, Krossgata, fyrir fleiri vindhviðumæla.

[Guðríður Hrefna Haraldsdóttir, 10.10.2007 kl. 10:00]

Úps, sá þig ekki Birna Dís!!! Hefði rútan lagt af stað klukkutíma fyrr í morgun hugsa ég að við hefðum fokið út af, það munaði svo miklu hvað hafði lægt á þessum klukkutíma.

[Kristín Katla Árnadóttir, 10.10.2007 kl. 10:26]

Vonandi að veðrið verð ekki svona vont þegar þú kemur heim. Eigðu góðan dag Gurrí mín.

[Guðrún Jóhannesdóttir, 10.10.2007 kl. 11:55]

púff Gurrí hvað ég dáist að þér fyrir að berjast þetta með þeim Heimi og Tomma í vitlausum veðrum, þakka mínum sæla að þurfa rétt hérna upp í OLÍSNESTI í svona roki

Fleiri mæla, styð það og er tilbúin að skrifa undir "óskalista" þar að lútandi :) 

[Jenný Anna Baldursdóttir, 10.10.2007 kl. 12:30]

Þessi á Merrild bílnum bíður eftir að þú klárir brekkuna.  Hann meikar ekki að hitta þig, þú ert ómótstæðileg.

[Ásdís Sigurðardóttir, 10.10.2007 kl. 20:04]

Allt fyrir öryggið, mér finnst þið dugleg að fara þessa leið hvern dag og veturinn er framundan.  En ég hugsa að þú sért með hörku bílstjóra á strætóinum.  BIðjum bílaGUÐ að gæta ykkar í allan vetur.

[www.zordis.com, 10.10.2007 kl. 21:45]

Lífshættulega lifir þú kona ..... gott að vita af þér heilli   kæreikskveðjur í hviðurnar!