Krúttfrændur, kokkteilsósa og nýr aðdáandi

Frábæru frændur mínir, Úlfur og Ísak, fóru í aðgerð til að loka gómnum núna í byrjun október. Þeir sem ekki vita þá fæddust þeir með alskarð. Þeir dvöldu í fimm daga á spítalanum í góðu yfirlæti en nældu sér fljótlega í umgangspest, þessar elskur. Samt var alltaf stutt í brosið hjá þeim, enda eru þeir með geðbetri börnum. Þarna liggja þeir í kerrunum sínum inni á sjúkraherberginu, með spelkur á handleggjunum til að varna því að þeir geti rifið upp saumana. Þeir eru þrælslappir þarna, dúllurnar. 

 ----------          ------------         -------------        -----------

Hér í himnaríki lítur allt út fyrir latan sunnudag, erfðaprinsinn les, móðir hans íhugar næstu spennandi húsverk ... úúúú, setja í þvottavél, setja Jónas í gang og gefa krumma fiskbita, krummanum sæta sem hefur svifið hér fyrir utan gluggana og glatt augu okkar allra nema Jónasar. Jónatan svikari hefur eflaust fundið aðra svalakerlingu til að daðra við, enda mávur. Allir vita hvað þeir eru lauslátir. Svo þarf náttúrlega að undirbúa sig vel fyrir matarboðið í kvöld, farða sig, finna hugguleg föt og upphugsa skemmtileg umræðuefni til að fá fleiri boð.

 ---------       --------------

Mía er mjög góður kokkur, ég er svona meira í kökunum, enda í æfingu eftir öll afmælin. Eldaði þó góðar kjúklingabringur í gær. Kryddaði þær með Best á kjúklinginn og grillaði á mínútugrillinu og hafði stöppu úr sætum kartöflum með, já, og salat auðvitað. Þarf að venja erfðaprinsinn af plebbaskap en hann fékk sér kokkteilsósu líka. Hélt að ég væri af kokkteilsósu-kynslóðinni en ekki hann.

Athugasemdir

[Kristín Katla Árnadóttir, 14.10.2007 kl. 12:54]

Fallegir litlir drengir þessar elskur.

[Jóna Á. Gísladóttir, 14.10.2007 kl. 13:19]

Litlu englabossarnir. Sooooooo krúttlegir. Vonandi hafa þeir náð sér.

hvert ertu að fara í matarboð kona? do tell. Þú heppin að fá ástæðu til að stríla þig upp og fara innan um fólk og vera kúltiveruð heimskona... í svona 3-4 klukkustundi. Muuuhaaaaa

[Guðríður Hrefna Haraldsdóttir, 14.10.2007 kl. 13:25]

Matarboðið er hjá Míu systur og mági mínum, honum Sigþóri. Þótt þetta sé familí er engin ástæða til að farða sig minna eða vera leiðinlegri.

[Heiða Þórðar, 14.10.2007 kl. 14:04]

Æðislegir. Góðan og gleðiríkan dag Gurrý.

[Kristín Björg Þorsteinsdóttir, 14.10.2007 kl. 14:21]

Vona að snáðarnir nái sér - bið að heilsa henni systur þinni - svon Tónlistarskóla heilsu.....hver á tvíburadrengina?

[Guðríður Hrefna Haraldsdóttir, 14.10.2007 kl. 14:54]

Dagurinn verður áreiðanlega góður og gleðiríkur, líka hjá ykkur, issskurnar. 

Mía systir er amma þeirra, Kristín, og Heiðdís, miðbarnið, er mamman. Pabbinn heitir Baldur og frá Sauðárkróki, þessi elska.  

[Laufey Ólafsdóttir, 14.10.2007 kl. 15:29]

Það er tómatsósa sem er plebbismi, ekki kokteilsósa. Hægt er að krydda hana ögn og þá er hún algert æði. Ég set t.d. chilli í mína.

Krúttfrændur eru dásamlegir

[Guðrún Jóhannesdóttir, 14.10.2007 kl. 16:16]

krúttfrændinn, þessi sem situr, hann er nú bara alveg eins og þú þarna á myndinni Gurrí, ég er viss um að þú sérð það sjálf :)

[Jenný Anna Baldursdóttir, 14.10.2007 kl. 17:48]

Ég er á því að kokteilsósan sé merki um plebbisma, ef eitthvað er.  Svo finnst mér hún svo klígjuleg svona forbleik.  hehe.

Njóttu matarboðsins.

[Glúmur Gylfason (IP-tala skráð) 14.10.2007 kl. 22:12]

Finn enga tengingu á milli bloggsins og miðmyndarinnar - nema ef vera kynni..

[Guðríður Hrefna Haraldsdóttir, 14.10.2007 kl. 22:17]

... viti! Snjall.

[Guðný Anna Arnþórsdóttir, 14.10.2007 kl. 22:59]

Guðröður I og Guðröður II eru yndislegir drengir, jafnvel þó þeir heiti Ísak og Úlfur. Kokkteilsósa er alveg dásamlegt fyrirbrigði og mér er alveg óskiljanlegt hvað hún er illa umtöluð. Eða þá naggið um fitugar, djúpsteiktar kartöflur, þær eru yndislegar. Ekki satt? Bestustu kveðjur yfir flóann - ég horfi núna í gegnum bláa geisla til þín!

[Jens Guð, 15.10.2007 kl. 02:38]

  Svakalega sem nýjasta tölublað Vikunnar er vel heppnað.  Alveg dúndurblað.