Menningarlifnaður í himnaríki ...

Las Eineygða köttinn og Leyndarmálið á leiðinni heim með strætó. Algjör snilldarbók eftir Hugleik Dagsson. Ekki fyrir viðkvæma og heldur ekki DVD-myndin Hot Buzz sem við erfðaprinsinn orguðum af hlátri yfir nú í kvöld. Bráðfyndin bresk gamanmynd með dassi af hryllingi og spennu. Stundum verulega ógeðsleg. Lögreglumaður er fluttur til í starfi vegna of mikils dugnaðar og sendur í lítið fyrirmyndarsveitaþorp. Þar hitnar fljótlega í kolunum. Mikil menning í himnaríki í kvöld. Eftir smástund verður haldið áfram með Árna Þórarinsson, Dauða trúðsins, er næstum hálfnuð með hana og finnst hún ansi skemmtileg. 

Ridge tókst næstum að sýna leikhæfileika þegar hann sagði Taylor, konu sinni, upp í dag. Hvað verður nú um Tómas og tvíburana? Taylor viðurkenndi nefnilega að hafa sofið hjá öðrum manni fyrir löngu, já, og kysst brunakarlinn nýlega. Þetta var meira en Ridge gat þolað. Samt kjaftaði hann af sér þegar hann sagðist enn elska Brooke, Taylor fattaði bara ekki að hann notaði játningu hennar til að binda enda á hjónabandið. Verst að Ridge hefur ekki séns í Brooke lengur, hún er svo hrifin af Nick, tengdasyni sínum. Þau Nick horfast reglulega í augu á átakanlegan hátt en fórna sér fyrir Bridget.

Athugasemdir

[Jenný Anna Baldursdóttir, 19.10.2007 kl. 23:58]

Hvenær fæ ég endirinn á Harrý Potter? Dæs, dæs, dæs!!

[Ragnheiður , 20.10.2007 kl. 00:01]

BOLD aukaefni, hraðsending til Himnaríkis. Sending er hér 

[Guðríður Hrefna Haraldsdóttir, 20.10.2007 kl. 00:14]

Endirinn á Potter kemur brátt. Maður sem vinnur með mér sagði að bókin yrði sífellt betri og endirinn væri flottur. Fyrst ætla ég samt að klára Árna.

Vá, Ragga, þetta eru ömurlegar fréttir. Aumingja konan. Í fréttinni er sagt að hún leiki dr. Taylor Marone ... sem þýðir að hún á eftir að giftast Nick Marone, hálfbróður Ridge. Það tekur því varla að horfa næstu mánuðina ...

[Ingigerður Friðgeirsdóttir, 20.10.2007 kl. 00:30]

Smá innskot giftist hún ekki bara Masimo pabba Nick???

[Ragnheiður , 20.10.2007 kl. 00:33]

Æj úpps þá hef ég óvart kjaftað fléttunni...sowwy

[Guðríður Hrefna Haraldsdóttir, 20.10.2007 kl. 00:44]

Ónei, Ingigerður, ég leit einu sinni í kristalskúlu (Netið) og komst að því að þau Nick væru að pæla í að giftast, bara verst að Brooke vildi líka giftast Nick sem er í raunheimum orðinn að Ridge, sem dökkhærða og ljóshærða rífast um. Taylor hefur haft betur. Nema hún hafi gifst tilvonandi tengdapabba ..., hef ekki kíkt lengi. 

Anna, það fer alveg að líða að bíltúr, hræðilega langt síðan þú hefur komið í himnaríki.

Þú mátt kjafta öllum fléttum, Ragga mín! 

[BH (IP-tala skráð) 20.10.2007 kl. 03:28]

Hot Fuzz, ekki Bus

Breiðholtsgen eru aldrei víkjandi, það er nokk augljóst

[Guðríður Hrefna Haraldsdóttir, 20.10.2007 kl. 11:02]

Heheheh, Ég öskraði fram í stofu (íbúðin er stór): "Erfðaprins, hvað heitir myndin sem við vorum að horfa á?" "Bopp bösss" heyrðist og ég skrifaði það bara. Auðvitað heitir myndin Hot Fuzz, takk BH.

[Jóna Á. Gísladóttir, 20.10.2007 kl. 11:17]

Þau Nick horfast reglulega í augu á átakanlegan hátt en fórna sér fyrir Bridget.   Muuuhaaaaa ég sé þetta svo innilega fyrir mér

[Anna Ólafsdóttir (anno) (IP-tala skráð) 20.10.2007 kl. 11:39]

Ég verð að viðurkenna að það fyrsta sem ég gerði þegar ég las þessa færslu var að öfunda þig af að geta lesið í bíl. Það pirrar mig ósegjanlega að verða bílveik um leið og ég horfi a prent þegar ég er á ferð í bíl.