Jólaundirbúningur, bold og skrýtin sjúkdómseinkenni á mbl ...

Við Ásta kíktum í Húsasmiðjuna á heimleiðinni. Ég keypti kannabis (ilmdropa) og eitt jólaskraut. Jólin nálgast óðfluga, eins og sést í búðum. Líklega verður þetta eini jólaundirbúningurinn í himnaríki, a.m.k. í október. 

----    ----   ----   ------     -----    -----     -----     ----- 

Þar sem Ridge er búinn að segja Taylor upp þarf hann að finna sér nýja konu í staðinn. Hann kíkir á minnisblaðið. Bíddu, jú, Brooke er hætt með Nick, tengdasyni sínum, og nýskilin við Eric, pabba Ridge. Hún ætti að vera nokkurn veginn á lausu. Hann fer og biður hennar. Nick birtist í miðjum klíðum með Hope litlu, dóttur Brooke og hins tengdasonarins sem Brooke tældi, Deacon. Þau voru úti í búð til að kaupa belgískar vöfflur. Hann spyr Ridge hvaða erindi hann eigi við Brooke. Nokkuð mikil afbrýðisemi hjá tengdasyninum. Af hverju er hann ekki hjá óléttu konunni sinni?  Brooke tekst að koma þeim út og heldur áfram að hafna Ridge.

Á sama tíma heima hjá Taylor: Stefanía kemur í heimsókn og sér að Taylor liggur döpur í sófanum. Steffí vill meina að hjónabandi þeirra Ridge sé aldeilis ekki lokið, hann hafi bara brugðist of harkalega við eldgamla framhjáhaldinu og kossi brunakarlsins!
Brooke segir Ridge að fara aftur til Taylor! Hann segist eiga heima hjá Brooke og börnunum.  
„Þú særðir mig meira en nokkur hefur gert,“ segir Brooke. Hún afhjúpaði Stefaníu, eða gervihjartaáfall hennar sem var sett á svið til að neyða Ridge til að velja Taylor, og með hjálp Jackie, mömmu Nicks, og ekki dugði það til að opna augu Ridge þannig að loks þegar Ridge hefur áttað sig er það of seint. Ridge elskar Brooke. „Ekki gera mér þetta,“ segir hún.
Stefaía kveður sorgmædda Taylor og hviss, bang, brunakarlinn birtist með rauða rós. Hann á erfitt með að fela gleði sína yfir skilnaðinum. Hvar er Amber? Hvar eru Rick og unga brúðurin hans?   

„Vefköku notanda vantar“ ... kemur stundum þegar ég reyni að blogga eða kommenta. Eru þetta ekki aðeins of miklar upplýsingar um viðkomandi bloggara? Þetta minnir á sjaldgæfan sjúkdóm.

Athugasemdir

[Gunna-Polly, 24.10.2007 kl. 22:23]

já hvarf er Amber?????????'

[Jenný Anna Baldursdóttir, 24.10.2007 kl. 22:52]

Ég hélt að þeir hefðu verið að rukka þig um legkökuna (dáldið seint hjá þeim sko)

[Guðríður Hrefna Haraldsdóttir, 24.10.2007 kl. 23:10]

Einmitt, Jenný, karlarnir urðu tæknilegir, ég var bara að tala um legkökusjúkdóm ... heheheheheheh! Já, hvar er Amber?

[Brynja (IP-tala skráð) 24.10.2007 kl. 23:36]

Smá leiðrétting sem skiptir kannski ekki máli eða hvað? þetta var ekki Brunakallin sem kom með rósina heldur ítalski folin sem er að reyna fá Dóttir hennar Brooke sem er með Nick  Annars er mikilvægt að geta lesið um þetta hjá þér ef ég missi af þáttum takk fyrir það sæta

[Guðríður Hrefna Haraldsdóttir, 24.10.2007 kl. 23:40]

Ó, ruglaði ég þeim saman? Úps, sjitttt! Hvernig datt honum í hug að gefa Taylor rós ef hann er spenntur fyrir dóttur Brooke? Verð að horfa með meiri athygli, svona á ekki að gerast. Bið alla aðdáendur boldsins innilega afsökunar.

[Brynja (IP-tala skráð) 25.10.2007 kl. 00:56]

Sko þessi ítali hjálpaði Taylor eitthvað þegar hún var týnd forðum daga og kom svo inn í þáttinn eftir að hún kom aftur heim og hefur síðan verið að reyna ná Dóttir Brooke eða eitthvað þannig missti aðeins úr þarna á tímabili en samt ekki furða þó maður ruglist á þessari Endæmis vitlaeysu en samt glápir maður úr sér Augun allataf hreint og verður að fylgjast með þér er örugglega fyrirgefið af öllum sem hér lesa