Mergjaðir morgundraumar

Mikið er gott að vera komin í vinnuna þótt skökk sé (útlitslega). Sem betur fer þurfti ég ekki að taka strætó og labba síðan upp Súkkulaðibrekkuna, heldur sat í bíl með Ástu og hafði hita við bakið alla leið. Er líka undir áhrifum íbúfens, næstsíðustu pillunnar, kannski í landinu. Tók svo með mér hitakrem og ef ég lykta undarlega í vinnunni þá segi ég bara samstarfsfólki að þetta sé nýtt, rosalega fínt og dýrt ilmvatn, vér Icelanders föllum alltaf fyrir öllu sem er nógu dýrt.

Þarf heldur betur að vera dugleg í dag til að vinna upp gærdaginn. Mikið er ég fegin að vinna ekki í t.d. kókosbolluverksmiðju þótt ég hafi hálfpartinn haft það með í framtíðardraumunum þegar ég ætlaði a.m.k. að verða sjoppukona, flugfreyja, leikkona, söngkona, dansmær eða ljósmóðir. Hef aldrei unnið í sjoppi en hef verið leikkona (m.a. Skagaleikflokkurinn og sem bláa öxlin í Heilsubælinu) og söngkona (í Kór Langholtskirkju, Mótettukórnum, Fílharmoníu). Dansmær get ég ekki kallast, þótt mér hafi þótt þrælgaman í Dansskóla Sigvalda í æsku og kann enn upphafið að dansi við lagið Black Night með Deep Purple, mjög, mjög hallærislegur dans en fyrir 50.000 kall skal ég dansa þetta upphafsatriði hvar sem er og hvenær sem er ... Ljósmóðurdraumurinn rættist heldur ekki, hef samt aldrei skilið hvaðan hann kom. Ekki las ég bókaflokk um neina Lilju ljósmóður sem tók á móti börnum á milli þess sem hún leysti dularfull sakamál. Svolgraði aftur á móti í mig bækurnar hennar mömmu um Beverly Grey fréttaritara og bloggvinir mínir vita hvernig það endaði. Mamma gleypti í sig Rósu Bennett hjúkrunarkonu og fór í Hjúkrunarskólann í kjölfarið. Skrýtið að maður endaði ekki sem prinsessa eða barónessa miðað við Barböru Cartland-lesturinn frá 10 ára aldri. Stundum þegar vekjaraklukkan hringir kl. 6.15 og úti gnauðar kaldur vindur, hviðurnar á Kjalarnesi eru 29 m/sek og soðinn lax í matinn í mötuneytinu þá óska ég þess pínulítið að ég væri prinsessa.

Athugasemdir

[Nanna Rögnvaldardóttir, 14.11.2007 kl. 08:30]

Það er nú óþarfi að gefa alveg upp vonina um prinsessutignina, Gurrí. Andrés Bretaprins er til dæmis alltaf á lausu, maður á besta aldri. Uppáhaldssonur drottningarinnar, las ég einu sinni, af því að hann var sá eini sem kunni að stilla vídeótækið - þannig að þetta er hinn nýtasti maður að hafa á heimili. Mætti tékka á honum.

[Guðríður Hrefna Haraldsdóttir, 14.11.2007 kl. 08:41]

Þú segir nokkuð! Annars frétti ég alla leið frá Spáni þar sem ein af aðstoðarkonum eldabusku í Buckinghamhöll dvelur stundum og þekkir Íslending í næsta húsi ... að Andrés sé meira upp á karlhöndina. Grimaldi-strákurinn þarna í Mónakó er líka á lausu, held ég.  

[Jenný Anna Baldursdóttir, 14.11.2007 kl. 08:47]

Beverly Grey OMG Æ lof hör.  Njóttu dagsins bláa öxl. 

[siggi (IP-tala skráð) 14.11.2007 kl. 10:10]

Þú ert Prinssesa í mínum augum Gurrí

[Nanna Rögnvaldardóttir, 14.11.2007 kl. 15:51]

En svo eru blessaðar prinsessurnar náttúrlega ekki góðar fyrirmyndir, skilst mér.

[Kristín Katla Árnadóttir, 14.11.2007 kl. 18:53]

Knús

[Erna Friðriksdóttir, 14.11.2007 kl. 19:26]

Ha ha ha ha ha  veistu hvað það er innilega gaman að vera núna amk sjoppukona á Hvammstanga?? He he heeh   Úrvals lið það með húmör. Og ég þar í dagvistun 

[Þröstur Unnar, 14.11.2007 kl. 20:33]

50.000 slegið. Mæting á Breiðina á Akranesi laugardagkvöldið 17. þ.m. kl: 22:00 sharp. Áætluð sviðsframkoma kl: 22:20 unsharp.

Bið að heilsa Hvömmstöngurum Erna.

[krossgata, 14.11.2007 kl. 20:58]

Rósa Bennett!   Var hún ekki svo einstaklega falleg og heilbrigð í útliti að hún þurfti ekki að nota kinnroða og svo fékk einhver ímyndunarveik frauka astmakast vegna meints kinnalitar hennar Rósu, sem auðvitað var miður sín að valda svona vandræðum alveg án þess að ráða við það.  Þetta er þá um það bil sem ég man úr Rósu Bennett bókunum.

Ég ætlaði að verða rithöfundur eða dýralæknir en varð hvorugt.

[Guðríður Hrefna Haraldsdóttir, 14.11.2007 kl. 21:11]

Hahhahaha, það var Dr. Wilie (eitthvað svoleiðis) sem æpti reglulega á Rósu og sagði henni að þurrka af sér kinnalitinn. Minnir að þetta hafi verið ástæðan fyrir því að ég fór ekki í hjúkrun.

Þröstur, skil ekki kommentið, ertu kannski að skipa okkur á ball um helgina, á tilvonandi kaldasta degi ársins? 

[Þröstur Unnar, 14.11.2007 kl. 21:18]

Tilvitnun: "en fyrir 50.000 kall skal ég dansa þetta upphafsatriði hvar sem er og hvenær sem er "

[Guðríður Hrefna Haraldsdóttir, 14.11.2007 kl. 21:30]

Hehehehhehehe, ég skil!!!

[Ásdís Sigurðardóttir, 14.11.2007 kl. 22:26]

Prinsessum leiðist oftar en Gurrýjum svo ég mæli með því að þú verðir áfram Gurrý. Við viljum það helst.  Ég er samt alveg til í að koma fram við þig eins og prinsessu þegar ég verð svo heppin að hitta þig.  

prinsess