Undarleg hegðun í himnaríki

Tunglið, næstum fullt og svo óstjórnlega töfrandi, hefur skinið á mig í kvöld þar sem ég hef setið við skrifborðið og unnið. Mér var litið niður á hendur mínar áðan og sá að neglurnar hafa lengst mikið á nokkrum tímum. Ungverska baðbomban í gærkvöldi hefur líklega haft þessi áhrif en ég hef nagað neglurnar með góðum árangri í 40 ár. Bomban virðist reyndar líka hafa aukið hárvöxt minn og þarf ég líklega að raka fótleggina í kvöld, í fyrsta skipti á ævinni, jafnvel handleggina líka og handarbökin fyrst ég er byrjuð. Eyrun á mér hafa stækkað smá, nema það sé ímyndun, en heyrnin hefur örugglega aukist. Ég heyri greinilega í bílum sem koma upp úr Hvalfjarðargöngunum, reyndar bara þeim eru komnir á nagladekk.

 

Þetta er ekki það eina óvenjulega á þessu heimili í kvöld. Kettirnir hafa ekkert sést í nokkra klukkutíma en ég heyri samt niðurbælt hvæs í þeim innan úr einum fataskápum. Erfðaprinsinn er þó enn furðulegri í hegðun. Hann stendur við eldavélina, segist vera að gera gæðatilraun á kaffi og er með nokkrar teskeiðar ofan í heitum potti (hræðilegt brunalykt). Mér varð ekki um sel þegar hann spurði mig titrandi röddu hvort þær væru ekki örugglega úr silfri. Ég ætlaði að segja honum að þetta væri bara plett en þá fann ég að ég gat varla talað, er líklega komin með bráðatannholdsbólgu eða eitthvað, finnst tennurnar eitthvað svo stórar. Mig langar mest til að góla, bakið er að drepa mig ... en veit samt ekki hvort ég þori í heitt bombubað í kvöld ef það hefur svona aukaverkanir.

Athugasemdir

[Þröstur Unnar, 20.11.2007 kl. 23:22]

Ölvað tungl, loðinn líkami, eyrun stór. Má ég hringja á næturvaktina.?

[Guðrún Jóhannesdóttir, 21.11.2007 kl. 00:16]

máninn fullur fer um geiminn

...

er hann kannski að hæða heiminn

... 

Góða nótt himnaríkisfrú, 

[Jóna Á. Gísladóttir, 21.11.2007 kl. 00:21]

nú hló ég. Takk fyrir mig.

[alva (IP-tala skráð) 21.11.2007 kl. 00:43]

úff , gott að þetta var bara bomban, hvernig var kaffið annars..

[Jenný Anna Baldursdóttir, 21.11.2007 kl. 00:54]

[Fishandchips, 21.11.2007 kl. 01:25]

Kannski hefur eitthvert eiturgas losnað úr læðingi við þessa jarðskjálfta. Þetta er víst sami flekinn á Akranesi og Selfossi. En hef heyrt að jarðskjálftar geti haft þessi áhrif

[Ásdís Sigurðardóttir, 21.11.2007 kl. 01:37]

Það mætti nú halda að himnaríki væri í mínu póstnúmeri hér skelfur allt og fíflast og mér líður vel.  Eru eyrun að lagast. ???

[Hildigunnur Rúnarsdóttir, 21.11.2007 kl. 08:39]

híhí

rowr!

 

[Sigurður Hreiðar, 21.11.2007 kl. 08:56]

Svona byrjar það, Gurrí!

[Hulda (IP-tala skráð) 21.11.2007 kl. 16:09]

góð færsla