Dyggð undir dökkum hárum

Held að Ástu hafi ekki grunað að ég svaf yfir mig í morgun, ég bar mig svo vel. Gekk settlega niður stigann, 12 mínútum eftir vöknun með latte í hvorri og ekkert benti til stressklikkunarinnar sem hafði heltekið mig skömmu áður. Vaknaði sem sagt kl. 6.40 og brottfarartími með Ástu var 6.50. Skipulagði morgunverkin á sekúndubroti. Hljóp austur í eldhús og kveikti á kaffivélinni, þaðan vestur á bað þar sem snyrting var framkvæmd á ljóshraða, enda þarf lítið að gera sökum fegurðar. Miðjutakkinn á kaffivélinni var hættur að blikka þegar ég kom aftur austur fyrir og ég ýtti á freyðitakkann við hliðina. Á nokkrum sekúndum, þar til hann hætti að blikka, tókst mér að klæða mig til hálfs inni í eldhúsi. Setti þá mjólkina í könnu og í stað þess að halda á henni undir stútnum klæddi ég mig alveg en fylgdist samt vel með hitastiginu. Þá kom röntgensjónin sér líka vel. Kl. 6.52 snerist himnaríki enn í hringi eftir hvirfilbylinn mig, kettirnir héldu sér í gardínurnar, knúpparnir voru dottnir af jólakaktusinum og allt ryk fokið af ljósakrónum þegar ég var á leið niður. "Ó, varstu komin?" spurði ég Ástu, sem hafði beðið í tæpar 2 mínútur. Hafði reyndar kíkt niður rétt áður en ekki séð hirðbílstjórann minn þar sem hann var of nálægt húsinu.

Ástæða fyrir yfirsofelsi: Nú, bókin Maður gengur með!!! Gat ekki sleppt henni fyrr en hún var búin. Hún fjallar um óléttu, frá fyrstu fréttum fram yfir fæðingu, upplifun föður. Hélt þegar ég sá bókina fyrst að hún væri sniðug fyrir nýbakaða eða tilvonandi feður, kannski bara alla feður, en mér sem kjéddlíngu þótti alveg frábært að heyra hina hliðina. Svo sakar ekki að hún er skemmtilega skrifuð líka. Mislangir kaflar og ekkert verið að eyða of mörgum orðum í suma hluti, æ læk itttt! Svo byrjaði ég á Patriciu Cornwell í jólaklippingunni í gær (ó, ég er orðin svo fín) og hún lofar góðu. Mikið elska ég bækur heitt!

Fyrirsögnin hér að ofan ber sama nafn og bók eftir Nettu Muskett, mikið elskaði ég bækurnar hennar á unglingsárunum!

Athugasemdir

[Katrín Snæhólm Baldursdóttir, 12.12.2007 kl. 09:51]

Það er engin fljótari en þú Gurrí þegar þú flýtir þér...sé fyrir mér snilldina í skipulaginu hjá þér frá austurs til vesturs..hahaha. Hlakka til þegar hvirfilbylurinn nær að þjóta yfir í vesturbæinn....á alltaf kaffirjóma svona til vonar og vara.

Knús!!! 

[Guðríður Hrefna Haraldsdóttir, 12.12.2007 kl. 10:02]

Elsku Katrín, ég hlakka svo til að hitta þig og knúsa þig fast og lengi. Það er svo ljúft að vita af þér á Íslandi, bara steinsnar í burtu. Þannig séð.

[Steingerður Steinarsdóttir, 12.12.2007 kl. 13:25]

Þetta er einstakur hæfileiki sem þú og ofurmennið eigið sameiginlegan nefnilega að geta gert allt á ofurhraða.

[Jenný Anna Baldursdóttir, 12.12.2007 kl. 13:41]

Dyggð undir döggum hárum og flagð undir fögru skinni.  Hm.. man eftir Nettu.

[jensen (IP-tala skráð) 12.12.2007 kl. 23:19]

Bíddu nú við,þú segist hafa hlaupið í austur og vestur,um íbúðina þína,er þá ekkert í norður og suður,,býrðu kannski bara í löngum gangi?

[Guðríður Hrefna Haraldsdóttir, 12.12.2007 kl. 23:29]

Ja, það má segja það. Eldhúsið snýr í austur, baðið í vestur, stofa og herbergin í suður ... útgöngudyr í norður.

[Sif Traustadóttir, 13.12.2007 kl. 00:25]

Já, það er ótrúlegt hvað hægt er að fara hratt yfir þegar mikið liggur við

[Guðrún Jóhannesdóttir, 13.12.2007 kl. 00:37]

bentu í austur, bentu í vestur, bentu á þann sem að þér þykir bestur

datt þetta svona í hug eftir þessi hlaup þín í austur og vestur, minnti mig líka á Húnvetninga sem nota áttirnar svo rækilega að í fyrsta sinn á ævinni náði ég að vera VISS um áttirnar þegar ég flutti á Hvammstanga hehehehe 

[Lára Hanna Einarsdóttir, 13.12.2007 kl. 01:04]

Ef ég þarf að flýta mér á morgnana er ekki spurning um austur, vestur, norður eða suður...  dagurinn er bara ónýtur og fer gjörsamlega norður og niður. 

[Jens Guð, 13.12.2007 kl. 02:59]

  Það er ekkert smá djobb að vakna í Himnaríki. 

[Heiða B. Heiðars, 14.12.2007 kl. 11:08]

"Maður gengur með" er einmitt til hérna í vinnunni minni! Ég nota hvert tækifæri til að lesa.... við kaffikönnuna, vatnsbrúsann, á leiðinni á klóið........ reddar því alveg að flestir kaflarnir eru fljótlesnir :)