Sjúkrapróf á lyftara og boldí bold ...

Rúllaði upp á Skaga með erfðaprinsinum í flotta kagganum hans. Fór í Harðarbakarí og keypti smá sjúklingafæði handa Ástu og færði henni líka smá lesefni. Hún er að mygla úr leiðindum og veikindum. Þarf að klára grein og gat því ekki leyft mér það ábyrgðarleysi að setjast inn í kaffi hjá henni. Hún sagðist vera hætt að smita þegar ég rétti henni dótið með gaffallyftara sem ég rændi úr Sementsverksmiðjunni. Sjúr!

VARÚÐ - BOLD:
Ridge setti drengjamet í lúðahætti í boldi gærdagsins þegar hann laumaði sér upp í rúmið hjá Brooke. Hún var uppdópuð af kvíðastillandi og hafði ekki kraft eða rænu til að fleygja honum fram úr. Á meðan var ástmaður hennar upptekinn við að bjarga móður sinni, Jackie úr fangelsi, sem tókst en á meðan notaði stóri hálfbróðir hans tækifærið, allt að undirlagi Massimo föður þeirra.

Hálfsysturnar Felicia og Bridget rífast um Dominick litla en Dante, pabbinn, ætlaði nú bara í skreppitúr með Bridget sína og barnið til Ítalíu og leyfa fjölskyldunni að sjá óvænta nýja barnið sem allir héldu áður að Nick ætti. Stefanía, mamma Feliciu, stendur með Feliciu og er hætt að vera næs við Bridget, enda tókst henni ætlunarverk sitt að stía Nick og Bridget í sundur ... svo að Nick og mamma Bridget, Brooke, gætu verið saman og þá er engin hætta á því að Ridge, sonur hennar, sé með erkióvininum Brooke. Verst að gamli ástmaður hennar og blóðfaðir Ridge, hann Massimo, vinnur gegn henni þar sem hann reynir svo ákaft að sameina Ridge og Brooke sem eiga nú barn saman. Annar barnsfaðir Brooke, Deacon, hélt einu sinni við konu Massimo, hana Jackie (fv. fanga) ,og þá var Massimo bjargarlaus í hjólastól, enn kvæntur Jackie, og gat ekki tjáð sig þótt hann skildi allt. Þetta fyrirgefur Massimo aldrei. Deacon var áður ástfanginn af Amber, þessari sem er horfin úr þáttunum.

Bridget ÆTLAR til Ítalíu með barnið og segir að Dante hafi lagalegan rétt. Þetta er bara vika. Felicia lítur á hvern dag sem sinn síðasta og það orsakar tregðuna. Stefanía lofar Feliciu því að barnið fari ekki utan annað kvöld. Þær Bridget ræða þó saman aftur án Stefaníu og verða eitthvað sáttari.

Ridge virðist hafa einhvern sómastreng í brjósti því að hann er næstum hugstola yfir því að hafa laumað sér upp í rúm til Brooke, ekki líður Brooke mikið skár! Hún viðurkennir fyrir Nick að hafa byrjað að taka pillurnar vegna komu föður hennar, hver þarf ekki róandi nálægt Bobby í Dallas?

Brooke er svo sjokkeruð eftir nóttina að hún getur ekki sagt Nick frá lymskubrögðum Ridge ... sem hélt í alvöru að hún hefði skyndilega fallið fyrir honum.

Jamm. Sjúr.

Athugasemdir

[gerður (IP-tala skráð) 30.1.2008 kl. 18:32]

Takk fyrir uppdeitið á Bóldinu. Sparar mér helling í áskrift að Stöð 2;-) Hnaut um Deacon, barnsföður Brooke. Hvaða barn og hver er Deacon???? Þessu hef ég bara alveg misst af. Gætir þú verið svo væn að upplýsa mig um það svo ég tapi ekki svefni í nótt af forvitni? Knús, G úr vinnunni.

[Guðríður Hrefna Haraldsdóttir, 30.1.2008 kl. 19:01]

Varúð - boldathugasemd:

Amber var gift Rick, syni Brooke, hún var "barnapían" hans og Bridget. Hún var kannski 19-20 ára en Rick var 17. Mikið drama. Hún var ófrísk, lengi vel hrædd um að svartur maður, poppari sem hún svaf hjá, ætti barnið en það fæddist andvana og hvítt. Ljósmóðirin geymdi nýfætt barn úti í bíl hjá sér sem frænka Amber, hjólhýsapakk mikið, hafði fætt í lausaleik og beðið ljósmóðurina að gefa til ættleiðingar. Ljósmóðirin fékk þá frábæru hugmynd að Amber fengi það barn í staðinn fyrir hitt sem dó. Barnið, með fæðingarblett á bossanum, reyndist hinn sætasti krakki og var skírður Eric, í höfuðið á afanum sem var hreint ekkert afinn. Frænka Amber, man ekki nafnið, varð fastagestur á heimilinu og fattaði við bleiuskipti á frænda að þetta væri barnið hennar. Faðirinn var svo enginn annar en Deacon. Hann festi ofurást á Amber og notaði barnið miskunnarlaust gegn henni. Frænkan, hin rétta móðir, hætti skyndilega að vera hjólhýsapakk, og breyttist smám saman í góðlynda hefðarmey, fékk banvænan sjúkdóm og dó sem dýrlingur. Hvað varð um Deacon, barnið og Amber veit ég ekki ... en um tíma reyndi hann að hafa gott af Jackie og flutti inn til hennar til að hjálpa henni, en allar konur í Boldinu eru ákaflega hjálparvana og reiða sig alfarið á sterka og helst ríka karlmenn. Hann níddist á Massimo í hjólastólnum og áttaði sig ekki á því að hann hélt vitsmunum óskertum, það var bara líkaminn sem var veikur ... um tíma. Eitthvað var áhorf mitt götótt á þessum tíma og svo gerði Stöð 2 mikið skammarstrik með því að hoppa fram um einhver ár. Núna erum við víst bara u.þ.b. tveimur árum á eftir Ammmríkunni í sýningu þáttanna. En Deacon var víst einhver dr ... sokkur, held ég. Veit ekki hvort hann varð góður eða hvað en ... vá, ég var búin að gleyma. Hann giftist Bridget til að hefna sín á Forrester-fjölskyldunni, féll fyrir mömmu hennar, Brooke, eins og hefur hent aðra tengdasyni (Nick) og á hana Hope litlu með henni ... jamms. 

[Þröstur Unnar, 30.1.2008 kl. 19:15]

Hvurs á maður að gjalda

[Guðríður Hrefna Haraldsdóttir, 30.1.2008 kl. 19:17]

Lesa minna ... horfa á aðvörunartextann ... eða bara lesa þetta, þú hefur gott af því og fattar hvað líf þitt er dásamlegt miðað við flækjurnar og fláræðið þarna í boldinu ... eða hvað?

[Þröstur Unnar, 30.1.2008 kl. 19:23]

Gurrí mín. Ég hef marg oft reynt að lesa þennan texta og tel mig nokkuð vel læsan, miðað við aldur. En þessi texti flækjist verulega fyrir mér og kemur út eins og snærishönk í flækju, myndrænt séð. Þarft að útbúa alvöru aðvörunarlogo sem birtist efst á síðunni þinni þegar Feit og Fögur er í þann vegin að fara í loftið.

[Guðríður Hrefna Haraldsdóttir, 30.1.2008 kl. 19:28]

Hehhehe, ókei, hef það í huga. Veit bara að þúsundir lesenda bloggsins lifa fyrir boldið ... Mér finnst þessir þættir hafa mikið skemmtanagildi ... og svo eru þeir líka afar vel þýddir.

[Jóna Á. Gísladóttir, 30.1.2008 kl. 19:51]

[Jenný Anna Baldursdóttir, 30.1.2008 kl. 21:11]

Ég las um Ástu, vonandi batnar henni strax (varstu í geimfarabúning?).

Boldið er orðið nó komment, heilinn á mér brennur yfir þori ekki meiru.

[gerður (IP-tala skráð) 30.1.2008 kl. 21:13]

Takk KÆRLEGA fyrir þennan fróðleik um ástir og örlög í Bóldinu. Ég þurfti að lesa þessa frásögn svona circabát 10 sinnum yfir og draga upp ættartré til að ná þessu almennilega en held ég hafi náð því á síðustu metrunum. Man eftir Amber. Hún var fláráð gæra ef ég man rétt. Minnir meira að segja að hún (þ.e. leikkonan) hafi komið hingað á tískusýningu sem fram fór fyrir framan Vegamót, jamm, jamm. Ég sé að hann Þröstur Unnar ælir alveg í bunu yfir Bóldið þannig að við skulum láta staðar numið....í bili;-). Takk mín kæra.

[Guðríður Hrefna Haraldsdóttir, 30.1.2008 kl. 21:24]

Ég notaði framlengingu, Jenný, eða erfðaprinsinn sem afhenti Ástu herlegheitin. Henni hefði annars tekist að lokka mig í kaffi og þá hefði ég ekki getað unnið, hvað þá boldað.

Gerður, hann Þröstur er sannur karlmaður og þolir alveg smá bold, þetta eru bara töffarastælar í honum. Held að hann sé kominn með Stöð 2 til að geta barið þetta augum ... Jú, Amber kom hingað til lands og móðgaðist víst yfir athyglisleysinu ... well, átti alla vega erfitt með að skilja hvers vegna skrækjandi kerlingar sátu ekki um hana og báðu um eiginhandaráritun. Einhver sagði mér frá þessu í kommenti hér á blogginu.  

[Lára Hanna Einarsdóttir, 30.1.2008 kl. 22:18]

Ég held að Þröstur sé bara svona rosalega siðprúður. Hann þolir ekki siðleysið í Bold þar sem allir eru með öllum þvers og kruss, enginn hefur tölu á eigin hjónaböndum - hvað þá annarra, mæður stinga undan dætrum, bræður undan bræðrum og allir prédika gott siðferði og ævilanga skuldbindingu hjónabanda. Liðið virðist aldrei hafa tíma til að vinna, eða þurfa þess, því það er svo upptekið við rýtingsstungur, undanstungur og að stjórna lífi annarra.

Er nema von að siðprúðum manni blöskri.

Hitt er svo annað mál að ef Þröstur myndi horfa á nokkra þætti kæmist hann fljótlega að því að íslenskar konur eru hálfgerðar Maríu-meyjur miðað við konurnar í Ammríkunni sem þarna eru speglaðar. Álit hans á okkur myndi pottþétt aukast verulega og það fyndist okkur stelpunum ekki leiðinlegt.

En miðað við þróun mála vestra - ætli það sé svo ekki bara tímaspursmál hvenær Boldararnir verða látnir ganga í evangelískan trúarsöfnuð og breytast í biblíuberjandi halelújakór sem talar í versum. Þá verð ég vonandi farin til feðra minna. En já, satt segirðu Gurrí - þetta er afar vel þýtt!

[Þröstur Unnar, 30.1.2008 kl. 22:25]

Æi Gurrí mín. Það stóð nú ekki til að gera lítið úr skrifum þínum. Lára Hanna, íslenskar eru í uppáhaldi hjá mér, lang flottastar, ekki ammerískir hamborgararassar.

Exskús mí.

[jensen (IP-tala skráð) 30.1.2008 kl. 22:33]

Lára Hanna og Fröken Gurrí,enn og aftur spyr ég hvenær er von á þætti no 1542,líklegast getur Lára Hanna svarað því.Gurrí var búin að lofa að skrifa ritgerð um þann þátt er það árið 2011 eða hvað.?

[jensen (IP-tala skráð) 30.1.2008 kl. 22:35]

Viðbót hér,ég er sammála Þresti.Íslenskar ,já takk.

[Lára Hanna Einarsdóttir, 30.1.2008 kl. 22:38]

Jensen...  í þessum skrifuðu orðum sit ég og þýði þátt númer 4.798. Ég ætla ekki að segja þér um hvað hann er en höfum í huga máltækið góða "bræður munu berjast". Rosalega spennandi.

[Brynja www.skordal.bloggar.is (IP-tala skráð) 30.1.2008 kl. 23:02]

Ástarþakkir fyrir frábært Bold blogg í dag þó ég horfi stundum þá næ ég þessu alltaf miklu betur hjá þér Gurrí mín ekki spurning já takk bíð spennt Lára Hanna eftir næstu þáttum vel þýddum

[Brynja Hjaltadóttir, 30.1.2008 kl. 23:02]

Gurrý....þúrt æði

[Arafat í sparifötunum, 30.1.2008 kl. 23:26]

Það er óhugnalegt hvað lífið í boldinu er eitthvað svo ,,eðlilegt,, þegar þú skrifar um það. Segir mikið um hæfileika þína sem rithöfundur. Miklu skemmtilegra að lesa um það enn að horfa. Takk takk reyndar hef ég aldrei skilið hvernig fólk sem er svo gjörsneitt öllum leiklistarhæfileikum eins og Broke og Ridge hefur verði haft þarna í áratugi. Fyrir utan að Ridge hefur álíka kynþokka og blautur moggi. Ein af skemmtilegu minningum mínum af mömmu var þegar hún var að lýsa fyrir pabba hvernig fólkið var tengt og hann hló mikið ....en elsku mamma missti aldrei af boldinu sínu. Fylgist spennt með skrifum þínum um boldið

[Ásdís Sigurðardóttir, 30.1.2008 kl. 23:52]

Æ, þú ert moli, boldið er engu líkt, gott að hafa svona side life, þá líður manni svo vel í eigin heimi.  Hafðu það gott mín kæra.

[Marta B Helgadóttir, 31.1.2008 kl. 00:05]

[Guðrún Jóhannesdóttir, 31.1.2008 kl. 00:30]

Bóldið klikkar ekki

[Linda Linnet Hilmarsdóttir, 31.1.2008 kl. 09:23]

Ég hélt að Dominick ætti Hope með Brooke?

[Kristín Katla Árnadóttir, 31.1.2008 kl. 10:45]

En alltaf skal maður fylkjast með þessari........

[Breiðholtshatarinn (IP-tala skráð) 31.1.2008 kl. 12:03]

Harðarbakarí?

Selur hann Harðar-kleinur, Harðar-tertur og svo framvegis? bitnar nafnið ekki heiftarlega á markaðssetningunni?

[Guðmundur G. Hreiðarsson (IP-tala skráð) 31.1.2008 kl. 14:02]

Breiðholtsbakarí var með alveg júník köngulóasnúða hérna í denn. Jömmí!

[Kjartan Pálmarsson, 31.1.2008 kl. 14:24]

Fagurt og feitt undir húð hverri! Ég held ég fari og ......úhhúuoooaaaa

[Guðríður Hrefna Haraldsdóttir, 31.1.2008 kl. 14:28]

Linda, hann á ekkert barn með Brooke en er greinilega ákaflega barngóður ...

[jensen (IP-tala skráð) 31.1.2008 kl. 20:37]

Allir brandarar mínir út á bold bullið eru hér með afmáðir,ja hérna Lára Hanna þú segist vera að þýða þátt no 4.798,úff verði aðdáendum þessara þátta að góðu og til ánægju,ekki er ég í þeim hópi.Lára Hanna þú ættir að fá verðlaunaorðu frá aðdáendum þessara þátta,að sjálfsögðu er þetta afrek hjá þér.

[Lára Hanna Einarsdóttir, 31.1.2008 kl. 20:46]

Jensen minn...  það er nú langt í frá að ég hafi þýtt alla þessa þætti, guði sé lof. Þá væri ég nú sennilega farin yfirum. Sá fyrsti sem ég þýddi var nr. 2.175, það var í janúar 2000, svo slepptu þeir úr 2 árum eins og minnst var á hér að ofan, auk þess sem við erum tvær sem skiptum þessu á milli okkar. Ég heiti sjálfri mér því reglulega að fara nú að hætta þessu, en þetta er bara vinna - salt í grautinn. Ég fæ stundum ágætis efni inn á milli, sem betur fer.

Lífið er saltfiskur... eða Bold.