Hvar varð eiginlega um ljóshærða manninn með ættarnafnið?

Mikið er nú annars gott þegar reglan tekur yfir óregluna, eins og í morgun þegar farið var á fætur um miðja nótt í himnaríki. Ásta var svo rugluð eftir dásamlegu ferðina sína til Dóminíska lýðveldisins að hún brunaði framhjá afleggjaranum mínum á Garðabrautinni en áttaði sig strax á mistökunum og sneri við. Hún er svo brún, afslöppuð og sæt, eitthvað sem tæplega er hægt að herma eftir nema fara hrikalega snemma að sofa nokkur kvöld í röð og bera á sig brúnkukrem.

----------------        -----------------           -----------------         -----------------------

 

Fyrrverandi ástkær eiginmaður átti hálfrar aldar afmæli í gær ... og ég gleymdi að óska honum til hamingju með það, best að senda honum hjartnæmt SMS í dag. "Astkaer fyrrv eiginmadur. til ham m afmaelid. gamli geithafur!" Þótt hann hafi ekki boðið mér í afmælið sitt er ekki ólíklegt að mér verði boðið í nokkur slík í ár. Allir eru alltaf með brennivín, ræður, söng og snittur, það virðist tilheyra. Ég kann ekki að halda svoleiðis afmæli. Kannski er ég voða "lummó" fyrst ég ætla að halda sama sið og síðustu 20 árin og bjóða til dýrlegrar "fermingarveislu" í himnaríki þar sem rjómatertur, brauðtertur, súkkulaðitertur og dúndurgott kaffi verða í aðalhlutverki!

Þegar Gulli stjörnuspekingur las stjörnukortin okkar fyrrverandi fyrir ótrúlega mörgum árum fölnaði hann og sagði að það væri allt of kalt fyrir mig (ljón með tungl og venus í krabba) að vera með manni sem væri ekki bara vatnsberi, heldur líka með tungl, merkúr og venus í vatnsbera og hvað þá mars í steingeit. Arggg! Ég skildi ekki orð en skildi samt auðvitað við hann í hvelli ... annað ... Anna föðursystir mín sat við hliðina á mér í erfidrykkju Guðríðar ömmu og hinum megin við mig sat þessi fyrrverandi vatnsberi minn. Vorum 18 ára. Ég sagði Önnu að þetta væri kærastinn minn en hún sneri upp á sig, sagði að ég ætti eftir að giftast ljóshærðum manni með ættarnafn. Anna kíkti stundum í bolla og var ansi sannspá. Ég er fegin að ég hlustaði ekki á hana, þá ætti ég ekki erfðaprinsinn. Af einskærri þrjósku giftist ég nefnilega manninum sem síðar varð fyrrverandi eiginmaður minn, eða um 24 ára aldurinn. Nú hefur aftur á móti langtíma einsemd kennt mér að sætta mig við ýmislegt þannig að nú mega alveg ljóshærðir karlar (gráhærðir eru ljóshærðir, líka sköllóttir) með ættarnafn (líka nöfn eins og Jói Jóns, Siggi Sveins, Gummi Jóns) fara að láta sjá sig. Auðveldast er að ná í mig milli 17.30 og hálfsex virka daga þegar boldið fer að hefjast.

Þessar pælingar komu bara í kjölfarið á afmæli fyrrverandi eiginmanns, sorrí!

Athugasemdir

[breiðholtshatarinn (IP-tala skráð) 18.2.2008 kl. 09:05]

Gleðigjafinn Bakkmann, hann er ljóshærður og með ættarnafn...

...ekki sakar að hann ekur strætó svo þið getið tekið rúntinn saman!

[Guðríður Hrefna Haraldsdóttir, 18.2.2008 kl. 09:08]

André er frábær, en ég þori ekki að fá mér strætóbílstjóra. Þeir eiga kærustur á hverri stoppistöð. Góð hugmynd samt, Breiðholtshatari!

[Laufey Ólafsdóttir, 18.2.2008 kl. 10:40]

ég ligg í kasti! Gamli geithafur! Ég á einn gamlan geithafur (reyndar yngri en ég, en steingeit) og annan gamlan hreysikött (ljón og í alvöru gamall, miðað við mig). Takk fyrir innblásturinn í afmæliskveðjurnar í ár!

Á milli 17:30 og hálfsex! Gurrý þú drepur mig! Einmitt sami tími og ég er laus

[Ásdís Sigurðardóttir, 18.2.2008 kl. 11:13]

Elsku Gurrý, kát að vanda.  Ég var líka að fá eina mér kæra heim frá Dóminikanska, það er skúran mín. Hún er núna á fullu hjá mér, búin að leika Jónas og er núna á prikinu með blauta endann.  Ég hugsa og hugsa um hver væri bestur fyrir þig, sé þarna sekúndubrot sem hægt væri að skvísa inn kalli á þig.  Einar segir nú allan sannleikann, fátt sem getur eyðilagt eins mikið góð afmæli eins og brennivín.  Ég kem í terturnar er farin að spara fyrir gjöf  Heyrðu það mætti alveg skipta um nafn á Þresti og kalla hann Þröst Kramer, það er bara til þæginda að hafa hann á staðnum, svo getur hann bara haldið íbuðinni og þá þarftu ekki alltaf að hafa hann í kringum þig.  Eigðu ljúfa viku mín kæra.

[Guðríður Hrefna Haraldsdóttir, 18.2.2008 kl. 11:26]

Það er nóg fyrir hann að heita Þröstur UNNAR, og ef hann er farinn að grána þá smellpassar hann!  Svo þurfið þið að æfa ykkur, stelpur mínar, áður en þið skrifið afmæliskortið. Maður skrefar nebbilega GURRÍ, ekki neitt "fkings" Ý í því ...  Muna, stelpuskottin mín, Ý í Gurrí myndi alveg skemma afmælið mitt sko ... ehhehehe

[Laufey Ólafsdóttir, 18.2.2008 kl. 13:17]

Sorrý GurrÍ ...gerist aldrei aftur... þekkti sko einu sinni eina GurrÝ og er föst í venjunni... dirfist ekki að eyðileggja daginn fyrir ljónynjunni

[Guðríður Hrefna Haraldsdóttir, 18.2.2008 kl. 14:29]

Takk, Anna. Haltu endilega áfram. Ég er steinhætt að gera kröfur um að þeir séu mín megin rimlanna, þessar elskur.

[Renata, 18.2.2008 kl. 15:28]

snilld færsla :)

hló lengi og vel :)

kvitt kvitt Renata sem datt óvart á þín blogg

[Kolgrima, 18.2.2008 kl. 16:09]

Einu ljóshærðu mennirnir með ættarnafn sem ég veit um eru Helgi Seljan og Prins Valíant en læt þig vita í hvelli um leið og ég rekst á einhleypan, frambærilegan, fagran, fjárhagslega sjálfstæðan, barnlausan, ljóshærðan karl sem er búinn í námi.

[Kolgrima, 18.2.2008 kl. 16:10]

og er með ættarnafn.

[Kjóinn (IP-tala skráð) 18.2.2008 kl. 16:12]

En hann á ekki einusinni þann sem hann kallar BIG RED á mannmótum. Annars er færslan þannig að það tók mig smá tíma að geta skrifað....17:30 og hálf SEX.......er það til þess að þá sé sexið ekki búið? Það Á að trufla fólk þegar það er upptekið annars er ekki munað eftir  manni. smá hint fyrir ÞU

[Ragnheiður , 18.2.2008 kl. 19:16]

Gurrí, ég kyssti þinn fyrrverandi í gær. Hann varð að taka við happdrættisvinning fyrir hönd bróður síns sem skyndilega gufaði upp með húð og hári. Þetta var samt voða siðsamt.

Ég mundi hinsvegar ekki eftir afmælinu hans...shit ! Ég hefði smellt einum á hina kinnina hehehe

Sammála Einari, áfengi eyðileggur sko alveg afmæli !

[Helga Magnúsdóttir (IP-tala skráð) 18.2.2008 kl. 19:40]

Hæ. Iss það er ekkert að marka þessar stjörnur. Í kínversku stjörnuspánni er ég hestur og maðurinn minn rotta. Samkvæmt fræðunum eigum við helst ekki að búa í sama sveitarfélagi. Búin að hanga samt saman í 27 ár. Í sambandi við maka vil ég benda þér á að fá þér sjómann. Þeir þéna vel og eru sjaldan heima. Eiginlega eins og að vera áskrifandi að öðrum launum bara.

[Lára Hanna Einarsdóttir, 18.2.2008 kl. 19:50]

Er ekki Ólafur F. á lausu...? 

[www.zordis.com, 18.2.2008 kl. 23:40]

Er ekki Georg Clooney á lausu?

Annars eru flestir kappar komnir með ljóst uppúr fermingu, nei meina fertugu!  Knús á þig káta kona!

[Helga Guðrún Eiríksdóttir, 19.2.2008 kl. 00:12]

Snilldarvel skrifuð og skemmtileg færsla, ég hló upphátt!  

Myndarkona eins og þú þarft sko ekkert að sætta þig við hvað sem er, ég er viss um að þín bíða ævintýr og menn með ættarnöfn í röðum og þú getur bara setið eins og fín dama með þínar pönnsur og rjúkandi kókóbolla og valið úr.

PS. Ég myndi velja heimaafmælið "anytime"!

[Sigga (IP-tala skráð) 19.2.2008 kl. 14:12]

Sæl Gurrí!

Mér er það lífisins ómögulegt að skilja af hverju þið Þröstur Unnar hafðið aldrei rekist á hvort annað....og þið bæði á skaganum. Verslið þið ekki bæði í Einarsbúð?  Þú ættir að reyna við hann þó svo hann hafi ekki ættarnafn....finnst þið getið passað fínt saman....svo er hann bara fjallmyndarlegur maðurinn....ég sá hann í BT fyrir jólin :)

[Steingerður Steinarsdóttir, 19.2.2008 kl. 16:52]

Þú ert jafnfyndin og venjulega Gurrí mín. Ég býst við að sá ljóshærði með ættarnafnið leynist einhvers staðar í nágrenni við litlu konuna í peysufötunum sem ég var skírð í höfuðið á.

[Þröstur Unnar, 19.2.2008 kl. 17:11]

Hm... hvurt á maður að skipta sér af eður ei?

Höfum það ei.

[Guðríður Hrefna Haraldsdóttir, 19.2.2008 kl. 18:05]

Ja, eitt bónorð getur nú ekki sakað, Þröstur minn, engin afskiptasemi í því ...

djók ... 

[Magnús Geir Guðmundsson, 19.2.2008 kl. 20:36]

Nú, til að uppfylla skilyrðin gæti Þröstur alveg bara keypt sér Unnarsnafnið og þar með er hann hinn eini sanni Þröstur Unnar, svona svipað og snævar og Hlíðar!

Og svo þegar þið byrjið að hlaða niður litlu "beibíunum" sem glæný tækni, rétt handan við hornið, gerir kleift og gerir spræk sprund eins og gurrí með einföldu í enn sprækari, þá myndast glæstur höfuðstóll UNNARSÆTTAR frá Skaga!

Og fyrsta sveinbarnið yrði að sjálfsögðu skírt í höfuð hins mikla hjónabandsmiðlara, Magnúsar Geirs!

Magnús Geir Unnar hljómar frábærlega!

Út að kaupa hringa!

[Guðríður Hrefna Haraldsdóttir, 19.2.2008 kl. 23:47]

Á ég að berja hann, eða ætlar þú að gera það, Þröstur?

[Magnús Geir Guðmundsson, 20.2.2008 kl. 01:11]

Þú lemur nú aldrei þá sem maður elskar, Gurrí með einföldu í!