Fljótlegur og gómsætur kvöldverður með dassi af boldi

Hjartans erfðaprinsinn stendur á haus (orðatiltæki) í eldhúsinu og býr til uppáhaldið okkar, mexíkóskar pönnukökur, eins og við köllum það. Hann setur milda salsasósu á tortillaköku, síðan smá gráðaost, rjómaost og síðast rifinn ost. Svo setur hann aðra tortillaköku yfir. Skellir „samlokunni“ á heita pönnu og snýr henni svo við eftir smástund. Tilbúið þegar osturinn er bráðnaður. Sker svo í fjóra bita. Þetta er hrikalega gott. Gamli ritstjórinn minn, Elín Alberts, kenndi mér þetta í gamla daga og erfðaprinsinn betrumbætti síðar með smá dassi af gráðaosti og rjómaosti, sem gerir þetta ekki verra. Er bara ekki kvöldmaturinn kominn hjá ykkur, bloggvinir kærir?

Bold-þátturinn í gær var eiginlega bara endurtekning á mánudagsþættinum, allt það sama sagt en með öðrum orðum, það var fyrst í dag sem eitthvað nýtt gerðist, en varla þó.
„Hvernig fékkstu Taylor til að selja hlutabréfin?“ spurði Jackie, mamma Nicks daðursfull.
Bobby í Dallas: „....“ (þögn). Hann þorði ekki að viðurkenna að hann hefði sofið hjá Taylor, enda vill hann halda Jackie volgri/hott. Þau þamba kampavín og Bobby daðrar á móti, svínið. "Þú er mjög kynþokkafullur," segir Jackie og Bobby kyssir hana. Sú á eftir að verða sár þegar hún fréttir um hjásofelsi hans og Taylor. Vegna leikaraeklu í Hollywood grunar mig að eitthvert árið komi í ljós að Bobby sé ekki blóðfaðir Brooke og þá geta þau byrjað saman. Í þessum þáttum byrjar fólk að sofa saman þegar það kemst að því að það er ekki blóðskylt. Sparar leikara og auðvitað er spennandi þegar allir sofa hjá öllum ...
Stefanía ræðir rólega en af sannfæringu við Brooke um brottreksturinn og biður hana um að láta kærastann, Nick, og pabbann, Bobby í Dallas, ekki hafa þessi áhrif á ákvarðanir hennar. Hún lætur síðan sprengjuna falla og segir Brooke að pabbi hennar hafi sofið hjá Taylor.
Brooke var reyndar búin að fá þá snilldarhugmynd að stjórna Forrester-fyrirtækinu frá höfuðstöðvum Marone-fjölskyldunnar, eða þar sem Nick og pabbi hans ráða ríkjum. Þá þyrfti hún aldrei að hitta Ridge og Nick yrði rólegri fyrir vikið. „Viltu þá skila mér þessum 2%,“ spyr Stefanía en Brooke þrjóskast við. Bridget er orðin skotin í Nick aftur en hann talar bara endalaust um Brooke sína, mömmu Bridgetar.

Til að gleðja ykkur enn meira kemur hér myndband með áhugaverðri söngkonu. Enginn annar en Breiðholtshatarinn sendi mér það. Hann er fundvís á smart efni af Netinu.
http://www.singsnap.com/snap/watchandlisten/play/b9d92189

Athugasemdir

[Kristín Katla Árnadóttir, 12.3.2008 kl. 18:29]

OH svakalega langar mér í þetta er svo girnilegt.

[Þröstur Unnar, 12.3.2008 kl. 20:25]

Jebb samlokan virðist girnileg, en ekki beinlínis söngdívan

[Birna Dis Vilbertsdóttir (IP-tala skráð) 12.3.2008 kl. 21:03]

Er með óþol fyrir mjólkurvörum en þetta hljómar vel.Takk fyrir boldið var við það að fá fráhvörf af boldleysi.Varðandi söngin er fátt hægt að segja nema skál hehehehehe

[Auður Matthíasdóttir (IP-tala skráð) 12.3.2008 kl. 22:31]

Boldið:   Hnífakastið  hennar Stephanie var nú bara alveg hroðalegt.  Aumingja Brooke að  þurfa að takast á við kellinguna um 2% in.  Pönnukökuuppskrift  erfðaprinsins  verður prófuð á mínu heimili fljótlega. Líst vel á hana.  Takk fyrir fjörleg skrif!

[Jenný Anna Baldursdóttir, 12.3.2008 kl. 22:44]

Takk fyrir uppskrift og fyrir þetta hroðalega myndband

[Lára Hanna Einarsdóttir, 12.3.2008 kl. 22:56]

Ég veit ekki af hverju, en ég flissa alltaf innanímér þegar þið talið um Boldið. 

[Álfheiður Sverrisdóttir, 12.3.2008 kl. 22:59]

oh Boldið stendur sko alltaf fyrir sínu!:)

Vildi síðan bara þakka fyrir að bloggvinasamþykkið:) Það er alltaf gaman að lesa færslurnar þínar:)

Svo sjáumst við bara í Einarsbúð:D

[Guðríður Hrefna Haraldsdóttir, 12.3.2008 kl. 23:08]

Hehhehe, Lára Hanna, takk fyrir að leiðrétta mig ekki meira, ég hlusta stundum og missi án efa af einhverju merkilegu ... en það var samt ógurlegt þegar ég hélt því fram að hún héti Darla svikarinn þarna sem hjálpaði Massimo að koma Jackie í fangelsi svo að Nick yrði upptekinn af því að losa mömmu sína úr fangelsi og Ridge gæti reynt við Brooke á meðan.

Já, sjáumst í Einarsbúð, Álfheiður!

Njóttu vel, Jenný, múahahahahhaha, og þú líka Auður, vona að pönnsurnar heppnist vel hjá þér og ykkur hinum sem prófið vonandi. Verst með óþolið, Birna Dís. 

[Hulda (IP-tala skráð) 12.3.2008 kl. 23:13]

boldið er svo flókið að maður nær ekki að lesa það rétt og í röð

[Lára Hanna Einarsdóttir, 12.3.2008 kl. 23:26]

Ég les allar þínar færslur, Gurrí og hef ekki þurft að leiðrétta neitt nema í þetta eina skipti. Þú ert með þetta á tæru! 

[Tiger, 13.3.2008 kl. 00:10]

  Erfðaprins þinn er náttúrulega stórkostlegur, tortilla/fahitas pönnukökur eru æði, þú heppin... stórt prik fyrir hann!

Mínar fahitas eru þannig að ég smyr eina með Chredder(man ekki alveg hvernig hann er skrifaður) osti - set rönd af alls skyns grænmeti, kál, gúrkur, papriku, tómata (bara allt það grænmeti sem manni finnst gott) í eina röð í miðjuna - síðan ríf ég niður allar tegundir af osti sem ég strái yfir og að lokum ef maður vill kjöt er æði að brytja smátt steiktan kjúkling og strá honum í miðjuna líka.

Því næst set ég hana í hálfmána, flétti henni yfir, og svo rúlla ég hálfmánanum upp í pönnuköku. Geri nokkrar svona og set í eldfast mót - strái rifnum osti yfir og set í ofnin og hita þær vel. *slurp*...  fyrir grænmetisætur er náttúrulega bara að sleppa kjötinu.

  Jamm.. þakka fyrir boldgusu. Ég horfi nú sjaldan á það en svo sem gott að fá smá skot svona frá þér til að fylgjast þó með.. Knús á þig í nóttina Gurrí og takk fyrir mig.

[Guðrún Jóhannesdóttir, 13.3.2008 kl. 00:37]

Frábært myndband hehehehehe og eins og Birna segir, SKÁL! ;)

Boldið....

já það stendur alltaf fyrir sínu, takk fyrir að horfa fyrir mig

[Agný, 13.3.2008 kl. 02:08]

Ég hló að fólki sem var húkkt á þessum þáttum..Hlæ að vísu ekki í dag. Málið er að ég horfði alltaf á Í bítið þegar það var og asnaðist svo til að horfa á þennan þátt.....og ég varð húkkt.....maður á sko ekki að hlægja að öðrum.....nema þú sért viss um að geta hlegið að sjálfri/um þér líka.......Hvað er annars langt síðan við hittumst á Skaganum?.......Hefur að vísu aðeins fækkað í þeim hóp....

[Katrín Snæhólm Baldursdóttir, 13.3.2008 kl. 09:09]

Jummí...þarna komstu með góða hugmynd fyrir mig að hafa í kvöldmatinn Gurrí mín.

Þúsund þakkir fyrir síðast...æðislega gaman að sjá þig loksins og krakkarnir elska Himnaríki og Langasand. Og þig auðvitað líka. Sögðu að vinkona mömmu væri svo skemmtileg og góð!!! Smjúts inn í daginn!!!

[www.zordis.com, 13.3.2008 kl. 09:41]

Þetta var hádegismaturinn minn í gær!  Reyndar upprúlluð með mozzarella og svartri skinku í micróofn en það hljómar mun girnilegra eins og þið gerið! 

Njóttu dagsins!

[Nanna Rögnvaldardóttir, 13.3.2008 kl. 10:50]

 Mexíkanskur/mexíkóskur er breyting sem má rekja til Árna Böðvarssonar, orðabókarhöfundar og málfarsráðunautar RÚV, sem benti á að landið héti reyndar Mexíkó en ekki Mexíka.

 Af Vísindavefnum:

,,Í ritinu Ríkjaheiti og þjóðernisorð (Statsnavne og nationalitetsord) sem Norræn málstöð gaf út 1994 eru nefnd heitin Mexíkói og Mexíkómaður (bls. 25). Það kemur heim og saman við það að heldur er amast við endingunni -ani í þjóðaheitum. "

[Helga Magnúsdóttir, 13.3.2008 kl. 10:56]

Nammi, hvað þetta hljómar vel. Ætla að benda Stjána á þessa uppskrift þegar ég kem heim. Svo er alltaf fínt að fá að fylgjast með Boldinu því ég er alltaf að vinna þegar það er á dagskrá.