Blessuð börnin ...

20.3.2008 | 14:12

Íslensk börn hafa löngum verið talin ódæl og full virðingarleysis gagnvart öllu. Ekki má þó gleyma því að þau eru líka sjálfstæð, uppfinningasöm og kunna að bjarga sér, ólíkt mörgum útlenskum börnum sem kunna varla á klukku fimm ára. Ég las mér heilmikið til um barnauppeldi þegar erfðaprinsinn var lítill og blandaði saman vitneskju úr bókum á borð við Summerhill-skólann, Samskipti foreldra og barna, Hann var kallaður Þetta, Children of the Corn, The Shining og fleira. Þetta gerði æskuár sonar míns bærilegri en ella fyrir mig.

Það er t.d. algjör óþarfi að kalla barnið sitt „Þetta“ til að ná fram hlýðni þess. Mun sniðugra er að beita rödd og augnaráði á sérstakan máta. Það virkaði vel hjá mér. Engin óvirðing, engar flengingar.

Ég gerði reyndar ein mistök. Í augnabliksveikleika leyfði ég syninum að fara í Heimspekiskólann án þess að hugsa um afleiðingarnar. Á meðan ég hafði frið til að horfa á Santa Barbara síaðist eitthvað inn í kollinn á drengnum sem hefði getað verið skaðlegt. Um tíma tókst honum nefnilega að tala mig inn á ýmislegt, t.d. að fá ís á sunnudögum og slíkt. Í einum sunnudagsbíltúrnum okkar fann ég þó leið til að stöðva þetta væl og við höfðum held ég bæði gaman af.

Ég var alltaf frekar frjálslynd þegar kom að háttatíma, enda vissi ég að syfjupirringurinn bitnuðu á þessum nöldrandi kennurum hans og þegar hann var kominn heim seinnipartinn nægði hvasst augnaráð og rétt raddbeiting.

Ég leyfði erfðaprinsinum líka að horfa á allar myndir í sjónvarpinu, ekki síst bannaðar. Slíkt herðir börn og kennir þeim að lífið sé ekki bara leikur. Svo sparaði þetta mér mikið fé. Eftir að hann sá Jaws bað hann aldrei framar um að fara í sund. Löngun hans í ferðalög til útlanda hvarf eftir að ég tók flugslysamynd á leigu, þessa sem gerðist í Anders-fjöllum. Hann borðaði heldur ekki kjöt í langan tíma á eftir. Auðvitað faðmaði ég hann ástúðlega og sagði að þetta væru bara bíómyndir en í huganum heyrði ég hringl í peningum.

Eftir að hann sá The Shining stríddi ég honum góðlátlega þegar ég vildi fá frið með elskhugunum og sagði: „Jæja, á ég að láta Jack Nicholson koma og elta þig?“ Mikið gat ég hlegið þegar þessi elska vaknaði stundum öskrandi og hélt í barnaskap sínum að það væri skrímsli undir rúmi og annað slíkt. Svo krúttlegt.

P.s. Mig grunar að það stefni í fallegar öldur seinnipartinn. Þær lofa þegar góðu. Hlakka til á flóði kl. 18. Ekki nóg með þá gleði, heldur sá ég í dagskrárblaði okkar Skagamanna að Sound of Music verður sýnd á Stöð 2 kl. 14 í dag og er að hefjast. Þetta getur ekki verið tilviljun! Góða sjónvarpsfólkið hefur fyllst ljúfri nostalgíutilfinningu við lestur bloggfærslu minnar um börnin í Sound of Music og hviss, bang, skellt myndinni á dagskrá!

Meginflokkur: Bloggar | Aukaflokkar: Kvikmyndir, Lífstíll, Vinir og fjölskylda | Facebook

Athugasemdir

Íslensk börn geta heldur betur verið mjög ódæl, ættir að hitta mín!

Gleðilega páska

Sigrún (IP-tala skráð) 20.3.2008 kl. 15:09

Ekki situr frúin bara inni í blíðunni, og reynir að réttlæta fyrir sér harðneskjulegt uppeldið á syninum?

Þröstur Unnar, 20.3.2008 kl. 15:31

Ja nú hefndist mér laglega fyrir að lesa þig síðast í röð bloggvinanna óteljandi, ég var að ljúka við að horfa á síðasta KORTERIÐ af Sound of music. Ég geymi alltaf bestu bitana þar til síðast.....

SHIT !

Eigðu notalega páska mín kæra

Ragnheiður , 20.3.2008 kl. 16:55

Sit hér inni í "veðurblíðunni" Þröstur og horfi á sjóinn fjúka til og frá!

Sömuleiðis, elsku Ragga, megir þú fá helling af páskaeggjum. Leitt að missa af megninu af myndinni, sérstaklega af því að þú hefur aldrei séð hana. Vantar mikið að hafa ekki söguna.

Páska, Dragon og Sigrún, vona að þið fáið líka fullt af páskaeggjum.

Guðríður Hrefna Haraldsdóttir, 20.3.2008 kl. 17:13

Fyrir tveim árum fór ég í klifursalinn í Reykjavík. Þar var barnanámskeið um það bil að ljúka og kennarinn sagði við krakkana: "Nú getið þið haldið áfram að klifra um stund en munið að þið megið ekki hlaupa, ekki öskra og þið verðið að passa ykkur á því að vera ekki undir neinum sem er að klifra." Um leið og hann sleppti orðunum varð allt brjálað og krakkarnir stukku út um allar dýnur öskrandi. Ég var að reyna að klifra og bæði var hávaðinn ærandi og eins gat maður ekki tekið neina sénsa því ef maður dytti þá myndi maður detta ofan á barn sem var að leika sér fyrir neðan. Á meðan sátu mömmurnar og lásu í blöðum og ekki ein einasta þeirra reyndi að róa barnið sitt. Ég á ekki að venjast þessu frá Kanada og mig langaði að garga á þessar mömmur að hafa aga á börnum. Málið var að þeim var alveg skítsama þótt börnin væru að trufla þá sem þarna höfðu borgað sig inn. Mér lá nærri að biðja um endurgreiðslu. Málið er að íslensk börn eru illa öguð vegna þess að foreldrunum er skítsama hvort krakkarnir eru til friðs eða ekki. Sama sér maður í sundlaugum heima. VIð Akureyrarsundlaug eru tvær laugar. Önnur er ætluð eingöngu til sunds og í hinni er yfirleitt talið í lagi að leika sér. En nægir það börnunum? Nei, þau þurfa að hoppa ofan í hina þar sem fólk er að reyna að synda. Og sama þar, foreldrum skítsama. Agavandamál íslenskra barna er algjörlega foreldrunum að kenna. Og hana nú.

Kristín M. Jóhannsdóttir, 20.3.2008 kl. 17:23

Nei takk ekki The Shining.

Edda Agnarsdóttir, 20.3.2008 kl. 18:30

Get alveg tekið undir þetta, Kristín. Foreldrar uppskera miklu skemmtilegri og meðfærilegri börn ef þeir aga þau. Man eftir skelfilegri bíóferð með vinkonu minni. Við fórum á Spiderman, minnir mig, og rétt fyrir aftan okkur sat faðir með þrjú eða fjögur hávær börn. Það yngsta var of ungt fyrir myndina og hjólaði um allan sal á hlaupahjóli, skríkjandi. "Pabbi, ég þarf að kúka," sagði eitt barnið hátt og pabbinn svaraði jafnhátt; Drífum okkur þá! Þetta var frekar leiðinleg bíóferð.

Þegar ég var lítil þá "hélt mamma með kennaranum" og ekki hefði þýtt fyrir mig að klaga hann en í dag heyra börnin jafnvel illa talað um kennarana heima hjá sér og missa þannig alla virðingu fyrir þeim. Ef kennarar reyna að aga börnin þá tryllast foreldrarnir ... það er kominn leiðindavítahringur, held ég. En auðvitað eru ekki öll íslensk börn illa uppalin! Sá hópur sem það er er bara svo áberandi!

Guðríður Hrefna Haraldsdóttir, 20.3.2008 kl. 21:56

Bestu óskir um Gleðilega páskahátíð,elsku Gurrý og fjölsk.

Linda Linnet Hilmarsdóttir, 20.3.2008 kl. 22:06

Gurrí mín. Einn daginn mun þér hefnast fyrir þetta uppeldi. Erfðaprinsinn kemur þér fyrir í hvíta húsinu með rauða þakinu inn við Sundin blá

Jóna Á. Gísladóttir, 20.3.2008 kl. 23:26

Aumingja barnið Ætli þú fáir ekki svipaða þjónustu þegar kemur að því að hann þarf að velja elliheimili fyrir þig

Jóna Kolbrún Garðarsdóttir, 21.3.2008 kl. 01:32

Hvað varð eiginlega um Hitlersæskuna?

Gleðilega páska.

Laufey B Waage, 21.3.2008 kl. 10:00

Gleðilega páska.

Marta B Helgadóttir, 21.3.2008 kl. 10:51

Skal alveg taka undir þetta með Kristínu og Guðríði. Íslensk börn eru mörg hver agalaus og bera ekki nokkra einustu virðingu fyrir einu né neinu. Enda kannski ekki furða, stressið, lætin, hamagangurinn og sjálfselskan í okkar þjóðfélagi er svo mikil að foreldrar gefa sér varla tíma til að tala við börnin sín, hvað þá að aga þau og ala þau upp. Í þau örfáu skipti sem ég á erindi í verslunarmiðstöð um helgar sé ég snyrtileg og uppstríluð börn sem fullan munn af sælgæti og nammipoka í hendinni. þannig eru þau til friðs og þegja meðan foreldrarnir sinna því sem þau vilja sinna. En þetta er ekki börnunum að kenna, það eru foreldrarnir sem (eiga að) ala þau upp.

Ég er eflaust full harðorð, þetta á sem betur fer ekki við um öll börn en eins og Guðríður segir, þessi hópur er bara svo áberandi. ! kv tveggja barna mamma sem á EKKI best upp öldu börn í heimi

Húsmóðir, 21.3.2008 kl. 11:19

ég fékk líka að horfa á allt í sjónvarpinu sem krakki og var bara kennt snemma að þetta væri ekki blóð heldur tómatsósa og allt væri hægt í bíó.
nú reyni ég bara alltaf að lifa bíómyndalífi og vona að hvað það sem miður fer lagist bara í framhaldsmyndinni (deginum á eftir) ... gengur ekki alltaf

Rebbý, 21.3.2008 kl. 11:51

Já, sonur minn hlakkar mikið til að velja fyrir mig elliheimili ... heheheheh! En auðvitað var þetta nokkuð ýkt, eiginlega bara logið, trúi ekki upp á ykkur að hafa trúað einu orði af þessu. Ljótasta myndin sem hann fékk að horfa á heima hjá sér var Home Alone! Ég þekki aftur á móti litla stelpu sem hefur verið afar vatnshrædd síðan hún fékk að horfa á Jaws, hún var ALLT of ung til að horfa á hana og að auki var enginn fullorðinn með til að útskýra neitt, bara glæpur að gera barninu þetta. Þegar draugaskipsmyndin var sýnd um daginn hefði ég gjarnan viljað að byrjunaratriðið væri bannað innan 50 ára svo ég hefði sloppið.