Yfirsof, áreiti, björgun og vinnualk ...

Skyldi vera gerlegt að vakna kl. 7.30 á mánudagsmorgni, öll fötin í þurrkaranum í austurenda himnaríkis og tannburstinn í vesturendanum, og ná samt strætó sem leggur af stað kl. 7.41 frá Skrúðgarðinum og kemur 2 mín. síðar á Garðabrautinni rétt hjá himnaríki? Já, það er gerlegt.

Þar sem ég beið í Ártúni eftir leið 18 og svaraði spurningum ungrar, ókunnrar skólastúlku sem kom og stóð þétt upp við mig og spurði mig um hvaðeina sem henni datt í hug og kvartaði yfir kennurum og kærasta, kom elsku Guðný á umbrotsdeildinni brunandi inn á stoppistöðina og kippti mér með. Mér leið eins og Jane þegar Tarsan bjargaði mér naumlega (kaffilausri) frá spjalli við ókunna manneskju. Tek það fram að ég er ekki morgunfúl en mér fannst óþægilegt að fá ekki frið til að hugsa um kaffi. Stelpan var ósköp ljúf en vantaði stopparann í hana. Ég hefði alveg verið til í að spjalla við hana seinnipart dags ... ekki kaffilaus, onei. Það voru tveir aðrir staddir þarna en þeir fengu frið. Hafa kannski haft vit á því að svara á útlensku: "Nje, prodskí póróna sitzen babúska pjotr sjú tem ..." 

Það er eins og standi á enninu á mér: "Komið! Ég er til í hvað sem er" því að reynt hefur verið ítrekað að frelsa mig inn í sértrúarsöfnuði (KFUK 9 ára, Guðsbörn 15 ára, Krossinn 25 ára), selja mér tryggingar (Sun Life) 41 árs, Stöð 2 sport 49 ára ... o.s.frv.

Jamms, fer og tek viðtal eftir hádegi niðri í bæ og fer síðan væntanlega beint heim á Skaga til að skrifa það. Seinnipartinn kemur síðan nágrannakona mín í heimsókn í himnaríki og segir mér djúsí lífsreynslusögu í Vikuna. Lífið er vinna 24 tíma sólarhringsins-sjö daga vikunnar, eða eins og Kaninn orðar það á styttri máta: 24/7. Vinnualkinn ég elskar þetta!

Eigið frábæran dag!

Athugasemdir

[Jenný Anna Baldursdóttir, 7.4.2008 kl. 11:15]

Haha, sé þig í anda í samtalinu við stúlkubarn.  Ég er ekki morgunfúl, en fyrsta klukkutíma dagsins eða svo, nenni ég ekki að kryfja neitt til mergjar, taka ákvarðinir né heldur spjalla um landsins gagn og nauðsynjar.  Þú átt alla mína samúð.

Knús

[Ásdís Sigurðardóttir, 7.4.2008 kl. 11:20]

Færslurnar þínar eru svo hressandi, það er eins og komi ferskur blær inn í íbúðina þegar ég les skrifin þín, þú ert sko EKKI morgunfúl yndið mitt, en ég skil þetta með kaffið og talandann, verð að fá mitt kaffi.  Eigðu ljúfastan dag yndið mitt.

[Helga Magnúsdóttir, 7.4.2008 kl. 12:14]

Djö... skil ég þig. Mitt heimilisfólk hefur lært af biturri reynslu að yrða ekki á mig fyrsta klukkutímann eftir að ég vakna.

[Guðmundur G. Hreiðarsson (IP-tala skráð) 7.4.2008 kl. 12:41]

Ja, ef að ég á að miðla ráði, þá dettur mér helst í hug að mæla með því að þú gangir með Burkha svo ennið sé ekki svona auðlesið. Eða bara að þú takir með þér kaffi á brúsa.

[Linda Linnet Hilmarsdóttir, 7.4.2008 kl. 16:12]

Innlitskvitt og kveðjur

[Guðný Anna Arnþórsdóttir, 7.4.2008 kl. 22:41]

Þú fjörgua Skagablaðakona, alveg ertu óborganlegt alheimskrútt.

[Kjartan Pálmarsson, 7.4.2008 kl. 23:00]

[jensen (IP-tala skráð) 7.4.2008 kl. 23:22]

Alveg einstaklega dýrðleg grein hjá þér,hvergi er minnst á  BOLDIР til hamingju.

[Lilja Guðrún Þorvaldsdóttir, 7.4.2008 kl. 23:33]

Oh, hvað ég skil þig.  En ég hefði alveg verið til í að vera þarna og fylgjast með samskiptaferlinu á milli ykkar.  Ertu viss um að þetta hafi ekki verið falin myndavél.

[Laufey Ólafsdóttir, 7.4.2008 kl. 23:52]

Hurrðu, þú varst dottin af bloggvinalistanum mínum... gerðist svo djörf að biðla til þín aftur því ég saknaði þín

...er að vinna í hinu ljúfust...

[Tiger, 8.4.2008 kl. 02:55]

  Eins og alltaf - frábær færsla hjá þér Gurrí. Hér er smá kökubiti með kaffinu á morgun. Eigðu góða nótt og yndælan dag á morgun ljúfan!

[Steingerður Steinarsdóttir, 8.4.2008 kl. 09:51]

Góðan daginn Gurrí mín, þú ert stórkostleg fyrir og eftir kaffi. Það get ég vitnað um eftir allar okkar ferðir í Kaffitár í Bankastræti.

[Fjóla Æ., 8.4.2008 kl. 11:56]

Þú átt sko allan minn skilning í sambandi við fyrir og eftir kaffi.

[Katrín Snæhólm Baldursdóttir, 8.4.2008 kl. 14:43]

Eins gott að við búum ekki saman Gurrí mín því ég byrja að tala og gala um leið og ég vakna og er bara í fínu formi...og myndi eflaust gera útaf við þig og kettina áður en þú kæmist í vesturendann til að bursta tennurnar..hehe.

Börnin eru alltaf að mjálma um Langasand og Himnaríki...en ég segi að við förum ekki fet fyrr en þú sért búin að koma til okkar.

Knús mín kæra og gleðilegt kaffi!!!! 

[Auður H Ingólfsdóttir (IP-tala skráð) 8.4.2008 kl. 17:26]

Er ekki fólk bara að reyna að koma sér í lífsreynslusögurnar í Vikunni...