Kraftaverk óskast - bömmer í himnaríki!

Hvar eru rafvirkjar, sjónvarpsvirkjar og aðrir snillingar þessa lands þegar himnaríkisfrú og sárasaklaus erfðaprinsinn hennar verða sjónvarpslaus í miðri, bráðfyndinni mynd á laugardagskvöldi vegna sambandsleysis í útioftnetinu sem er reyndar staðsett inni? Hvers vegna datt erfðaprinsinum ekki fyrr í hug að fara í nothæft og almennilegt nám sem í lokin hefði bjargað svona stórvandamáli? Verður svo ekki Formúla í hádeginu ... bara til að ergja mann? Sjónvarpsloftnetið frá helvíti sést fyrir aftan Kubb á myndinni vinstra megin. Hinar myndirnar tengjast kvikmyndinni sem við vorum að horfa á þegar hryllingurinn skók himnaríki!

Og ég sem kláraði Sjortarann í dag, spennubókina nýju eftir Patterson ... argggg ........

Það var nefnilega þessi líka fyndna ástarmynd í gangi þar sem gæinn vogaði sér að segja dömunni upp og hún hefndi sín m.a. með því að fleygja grimmum hákarli inn um gluggann hjá honum og nýju kærustunni á 20. hæð í fínu íbúðinni þegar allt fraus.

Ég þori ekki fyrir mitt litla líf að fara með lítið skrúfjárn þarna ofan í þar sem snúran tengist í loftnetið (þar er vandinn), hræðist raflost meira en margt annað, eins og t.d. léttmjólk í kaffi og þá er nú mikið sagt. Nú þarf ekkert annað en kraftaverk ef þetta á að lagast. Bið um rosamikla samúð í kommentakerfinu og magnaðar tillögur að mögulegri viðgerð í fyrramálið.

Athugasemdir

[Einar Indriðason, 20.4.2008 kl. 11:08]

Formúlan verður næstu helgi.

Með rafmagnið og loftnetið, þá skaltu vera í gulum uppþvottahönskum, þegar þú ræðst á loftnetið með skrúfjárninu.  Gulir uppþvottahanskar einangra.  (Svo gætirðu tekið Dr.Spock takta með skrúfjárnið sem míkrófón.)

Aðrar uppástungur hef ég ekki að sinni, en ég vona að þið getið gert við (eða fengið gert við), fyrir næstu helgi.  Annars þarftu að fara í heimsóknir, sem, upp á algjöra tilviljun bera saman við útsendingar á Sý... ég meina, Stöð 2 sport.

[Edda Agnarsdóttir, 20.4.2008 kl. 11:24]

Æi ég vorkenni þér, ég hugsa oft um svona uppákomur þegar eitthvað fer aðtitr í varpinu og verð alltaf skelfingu lostin yfir tilhugsuninni umað ég missi af einhverju!

Knús annars á þig, eigum við ekki að stefna á stórmót ´bloggara í Skrúðgarðinum bráðlega?

Knús á þig sæta.

[Vera Knútsdóttir, 20.4.2008 kl. 11:46]

Þetta er að sjálfsögðu hræðilegt! Ég vona að ástandið batni sem fyrst og að kraftaverk eigi sér stað í himnaríki!

kv. frá Vín  

[Guðríður Hrefna Haraldsdóttir, 20.4.2008 kl. 11:47]

Líst mjög vel á stórmót bloggara í Skrúðgarðinum.

Erfðaprinsinn var að enda við að laga loftnetið, svakalega er hann efnilegur ... hann á eftir að rústa þessu námi!!! Hann notaði skrúfjárn með "gúmmíhanskahandfangi".

Ó, ég hélt að Formúlan yrði núna um helgina.

[Guðrún Jóhannesdóttir, 20.4.2008 kl. 12:19]

stórmót bloggara!  væri bara snilld og að sjálfsögðu í Skrúðgarðinum með ljúfa kaffinu hennar Maríu

Gott að erðaprinsinn er svona gífurlega hæfileikaríkur

Góðar kveðjur í himnaríki

[Einar Indriðason, 20.4.2008 kl. 20:19]

Oh... Gastu ekki fengið Chuck Norris til að hvessa augun á sjónvarpið?

Hmm... nei, sjónvarpið hefði sennilega bráðnað....

[Guðbjörg Hildur Kolbeins, 20.4.2008 kl. 22:09]

Fyrir tveimur árum fengum við loftnet hjá 365. Það dugði í fjóra mánuði.