Rokkpælingar í morgunsárið

Endalaus deja vu-fílingur ríkti á leiðinni í vinnuna í morgun. Ásta undir stýri á drossíunni og við með flotta tónlist á hæsta, hita undir rassinum og í fínu morgunstuði. Ásta hefur verið frá vinnu í nokkra mánuði og því hef ég getað tætt meira en áður í strætóbílstjórunum í leiðinni ... múahahaha. Við hlustuðum á nokkur lög með Heiðu, kenndri við Idol.

Gaman að hlusta á Starlight (Trúbrot) í flutningi hennar og ljúga svo óvart að Ástu að Óðmenn hefðu upphaflega flutt Dimmar rósir, held að það hafi verið Tatarar. Ég er þremur árum eldri en Ásta en á Tatara-árunum  vorum við samt bara börn. Við erum af 78-kynslóðinni ... Slade, Uriah Heep og svona ... en Ásta fór einmitt á klikkaða tónleika með einum úr Uriah Heep á miðvikudaginn. Þar voru Dúndurfréttir, Eiríkur Hauksson og sjálfur Ken Hensley, mögulega sá sem kyssti mig á kinnina eftir tónleika Uriah Heep á Hótel Íslandi 1987 af því að ég tranaði mér ekkert fram eins og hinir ... sem fengu engan koss, múahahahaha. Við konur lærum með ýmsum hætti að halda kjafti og vera sætar. 

Aftur á móti vildi ég EKKI fara á tónleika Jet Black Joe með Sinfó og gospelkór þótt ég fengi borgað fyrir það. Maður á ekki að troða neinu „væli“ í rokkið og hvað þá rokki í sinfóníur ... mín skoðun. Hef reyndar einhverra hluta vegna alltaf hatað gospel ... en hrífst aftur á móti mjög af háklassískri og kirkjulegri kórtónlist, passíum, mótettum, madrigölum og slíku. Ásta starði á mig þegar ég tjáði henni þetta. Kannski fæ ég aldrei framar far með henni.

Þetta verður að öllum líkindum klikkaður dagur hér á bæ, blaðið í prentsmiðju og svona, gaman, gaman ... Megi dagurinn ykkar verða sérdeilis frábær!

Athugasemdir

[Brynja skordal, 2.5.2008 kl. 10:57]

ó mæ já Hlustaði mikið á Slade og Uriah Heep hafðu góðan dag mín kæra

[Jenný Anna Baldursdóttir, 2.5.2008 kl. 11:26]

Er bara verið að dissa Jet Black Joe og minn náfrænda hann Gunnar Bjarna í leiðinni.  Hm.. er reyndar sammála þér með rokk og sinfó, rokkið á að standa eitt og sér, hrátt og hrífandi.

Knús inn í föstudaginn villingur snillingur.

[Guðrún Jóhannesdóttir, 2.5.2008 kl. 11:29]

innlitskvitt á sólardegi

[Guðríður Hrefna Haraldsdóttir, 2.5.2008 kl. 11:36]

Myndi sko ALDREI dissa Jet Black Joe, eina uppáhaldshljómsveitina mína. Vil bara hafa þá án blúndu og rjóma á tónleikum ...

[Hildigunnur Rúnarsdóttir, 2.5.2008 kl. 11:37]

vá hvað ég er sammála með gospel. Allt í lagi að hlusta á eitt til tvö lög, svo er þetta allt eins. Og enginn safi í textunum, endalaust hallelúja!

[Þröstur Unnar, 2.5.2008 kl. 12:12]

Var þetta ekki gítarleikari Jetteró Töll sem var að spangóla með Eika?

[Guðríður Hrefna Haraldsdóttir, 2.5.2008 kl. 13:15]

Nojts, Þröstur, þetta var Ken Hensley úr Uriah Heep!!! Og heldur sér svona líka svakalega vel, að sögn Ástu. Alla vega röddinni ...

[Lilja G. Bolladóttir, 2.5.2008 kl. 22:06]

Ég fór reyndar í fyrrasumar, að hlusta á Sinfóníuhljómsveit Íslands og Dúndurfréttir, þar sem þeir voru að flytja saman "The Wall" eftir Pink Floyd, og gerðu það gífurlega vel..... svo ég er ekki sammála þér, að ekki megi blanda saman rokki og klassík, eða öðru.

Hef reyndar hlustað á Sinfóníuna oft, og finnst gaman að því þegar hún breytir til og tekur aðra í slaginn með sér, eins og t.d. Sálina eða Todmobile. Sýnir hæfni og getu okkar góðu Sinfónímanna/kvenna, að mínu mati, að þeir geta spilað margt annað en Bach, Mozart og Vivaldi (eða Vidalin, eins og sonur minn segir).... Mér finnst þetta skemmtileg tilbrigði og auðvitað enginn neyddur til að fara á eitt eða neitt og gott að þú velur frá.... að sjálfsögðu  En gaman að hafa valið, ekki satt?

[Sigga Guðna (IP-tala skráð) 2.5.2008 kl. 23:24]

Halló dúlla frábært að detta inná síðuna hjá þér  

hvaða hvaða með Jet black joe - þetta verða æðislegir tónleikar enda ég að syngja með þeim heheheheheh - ég get lofað þér því að þeir verða rokkaðir !!! engin sinfó með í för - láttu bara sjá þig og láttu strákana koma þér á óvart !!

knús kveðjur

[Guðríður Hrefna Haraldsdóttir, 2.5.2008 kl. 23:48]

Sigga mín, elsku gamla barnapía erfðaprinsins, Freedom, lagið sem þú söngst á sínum tíma, er enn besta Jet Black Joe-lagið að mínu mati.  

Já, Lilja, það segja þetta allir sem hafa farið á svona sinfó-rokk/popp tónleika að þetta sé æðislegt. Hef samt ekki treyst mér til að prófa. Ekki einu sinni hjá Dúndurfréttum, eins og ég elska þá. Er grúppía nr. 1 hjá þeim.

[Jens Guð, 3.5.2008 kl. 01:25]

  Starlight var snilld með Trúbroti og reyndar ágætt með Jet Black Joe.  En samt ekki sami "sjarminn" og hjá Trúbroti.  Óðmenn komu aldrei nálægt þessu lagi.

  Dimmar rósir voru líka snilld hjá Töturum.  Einhverjir hafa krákað það síðar.  Sennilega Bítlavinafélagið.  En enginn nær "sjarma" Tatara. 

  Sinfó og gospel-kór eru að öllu jöfnu það versta sem hægt er að blanda saman við rokkmúsík.