Rólegur múgur, rökræður og nokkrir Norrisar

„Best að fara að kaupa bensín áður en það hækkar enn meira,“ sagði erfðaprinsinn beiskur og setti á sig húfuna, enda kominn tími á enn eina rándýra klippinguna. „Gættu þess að keyra ekki á öreiga, þú veist hvaða dagur er í dag,“ sagði umhyggjusöm móðir hans enn beiskari. Beiskja hennar stafaði helst af því að hafa ekki látið til sín taka í æstum mótmælum sem hefðu mögulega getað átt sér stað á Skaganum ef hún hefði æst upp múginn. Nei, hér var setið í algjörri leti og lesin bók sem heitir Lagleg. Ekki ævisaga himnaríkisfrúarinnar, heldur bókasafnsbók um mögulega framtíð mannkyns. Framhald Ljótrar.

Við erfðaprins rifumst enn og aftur, á hóflegum nótum þó, um Ísrael og Palestínu. Mér finnst hann litaður af áróðri Bandaríkjamanna en hann segist horfa á báðar hliðar mála. Aumingja Ísraelsmenn að þurfa að eyða þessum rándýru eldflaugum á svona pakk ... og þegar „pakkið“ reynir að verja sig og mótmæla yfirgangi þá er það hryðjuverk. Við urðum sammála um að vera ósammála. Ég hef þó ekki gefist upp. 

Hólmgeir bloggvinur er ekki hress í dag. Þið ættuð að kíkja í heimsókn á bloggið hans til að sjá hvað veldur. http://hk.blog.is/blog/hk/entry/525819/

Svo er hér dásamlegt myndband sem sjokkeraði ofurflughræddan soninn þegar ég sýndi honum það. Best að koma ykkur í uppnám líka ef þið nennið að klikka á hlekkinn.
http://www.dv.is/divi/spila/xlc3tdy7by08zt2kyvb3f3yipu40q

 

- Chuck Norris sparkaði einu sinni undir höku hests. Hesturinn og afkomendur hans hafa síðan kallast gíraffar.

- Sumt fólk sefur í Súpermann-náttfötum. Súpermann sefur í Chuck Norris-náttfötum.

- Chuck Norris rekur ekki tærnar í. Hann rústar stólum, rúmstólpum og gangstéttabrúnum af slysni.

- Chuck Norris prófaði einu sinni fallhlífarstökk en lofaði að gera það aldrei aftur. Ein Klettafjöll eru meira en nóg.

- Það er ekkert til sem heitir gróðurhúsaáhrif. Chuck Norris var kalt svo að hann hækkaði í sólinni.

- Chuck Norris getur kyrkt óvin sinn með þráðlausum síma. (Stolið frá Jack Bauer)

Athugasemdir

[Jóna Kolbrún Garðarsdóttir, 1.5.2008 kl. 16:19]

 

[Haraldur Bjarnason, 1.5.2008 kl. 16:43]

Gurrí þessi mynd af verðauglýsingunni hjá Neinum þarna upp í horninu er ábyggilega síðan í gær eða fyrradag. - Verðið er svo "lágt".

[Lára Hanna Einarsdóttir, 1.5.2008 kl. 16:49]

Ég tók einmitt eftir þessu sama og Haraldur...  þetta er útsöluprís á skiltinu miðað við núverandi verð. Enda hækkar eldsneytið næstum daglega nú orðið.

Tók mig loksins til og fletti upp þessum hetjulega Chuck Norris sem ég virðist aldrei hafa séð eða heyrt um áður. Hann er samt skemmtilegri í meðförum þínum.

[Guðríður Haraldsdóttir, 1.5.2008 kl. 16:53]

Chuck Norris er mikil kvikmyndahetja, mest í karate-myndum, held ég. Svona staðhæfingar eru líka til um Jack Bauer, hef bara ekki leitað þær uppi. 

Fann ekki yngri mynd af bensínverði, enda hækkar það dag frá degi, eins og þið segið.

[Jenný Anna Baldursdóttir, 1.5.2008 kl. 17:06]

[Marilyn, 1.5.2008 kl. 18:15]

Munið þið eftir þegar bensínið fór yfir 100 krónurnar að nokkrar bensínstöðvar þurftu að selja lítrann á 99.99 því talningaapparatið á tönkunum (eða voru það auglýsingaskiltin fyrir framan stöðvarnar) var ekki hannað með þriggja stafa tölur í huga.

[Guðríður Haraldsdóttir, 1.5.2008 kl. 18:22]

Vá, hvað það var eitthvað í "gamla daga", Marilyn ... kræst.

[Chuck Norris (IP-tala skráð) 1.5.2008 kl. 22:45]

Er á leiðinni........................................................................................................................það er kalt á Ísafirði núna.

[Óttarr Makuch, 1.5.2008 kl. 22:55]

Hahaha, ég sá auglýsingaskiltið í horninu og hélt eitt augnarblik að fundist hefði afgangs eldsneyti í tökum austur á landi sem enn væru seldar á "gamla" geninu.

[Óttarr Makuch, 1.5.2008 kl. 22:56]

Þetta átti vitanlega að vera "gamla" genginu

[Tiger, 2.5.2008 kl. 01:56]

Hahaha.. það er greinilegt að samband ábúenda í himnaríki er heilbrigt og gott. Sátt og samlyndi og heilbrigð skoðanaskipti án þess að vera endilega nákvæmlega þau sömu - bara gott mál. Drengurinn hefur sínar skoðanir og stendur fast á þeim, og auðvitað verðum við að virða það. Gott þó að þú gefist ekki upp á að ala hann upp í þínar skoðanir sko ... *glott*.

Ég hef aldrei verið hrifinn af Chukky, en svona brandarar eru bara skemmtilegir.

Myndbandið af flug-sundköppunum var frábærlega sniðugt. Endirinn kom á óvart sko ... hahaha.

[Guðmundur G. Hreiðarsson (IP-tala skráð) 2.5.2008 kl. 08:24]

Ísraelsmenn eru reyndar ekki að skjóta neinum flaugum, þær koma frá Palestínumönnum. Hafa ber það er sannara reynist.