Fréttir af Vesturlandsvegi, uppseldu DV og afmæli mömmu

Það sem bar helst til tíðinda á leiðinni Akranes-Mosfellsbær í góða veðrinu í morgun var að litli sendiferðabíllinn frá Svefn og heilsu, þessi sem fauk nýlega út af í hvassviðri, er enn á sama stað ... ofan í skurðinum. Flottur minnisvarði um kvikindislegar hviðurnar. Allt gekk líka klakklaust fyrir sig þegar Skagastrætófarþegarnir hópuðust tugum saman yfir götuna að biðskýlinu sem leið 15 í bæinn stoppar við. Á einni stoppistöðinni í Mosó komu tvær konur inn. Ég þekki aðra þeirra, þá aftari, og ætlaði aldeilis að plata hana til að setjast hjá mér en hin hlassaði sér bara í sætið, þrátt fyrir ótalmörg önnur laus. Næst verð ég með teikníbólur, fýlubombur og þaðan af verra til að koma í veg fyrir svona slys.

Í hádegismatinn var lasagna, svona allílæ, en svo skrapp ég inn á DV, sem er hinum megin við matsalinn. Ætlunin var að ná mér í eintak þar sem allt var gufað upp hérna megin við matsal. En ... blaðið er uppselt og ég þarf að bíða þangað til ég kem heim til að lesa viðtalið við séra Gunnar á Selfossi. Málið er víst allt einn misskilningur, skilst mér að presturinn hafi sagt, hann bara kyssti og faðmaði stelpurnar, ekkert meira ... Mér er spurn ... það varð allt brjálað um árið þegar DV birti mynd af manni áður en hann var dæmdur fyrir barnaníð og allir vita hvernig það fór. Nú skúbbaði Stöð 2 með þetta á laugardaginn, myndbirting og alles, af hverju er fólk ekki jafnbrjálað núna?

Elskuleg móðir mín á afmæli í dag. Hún var einmitt í kirkjukór með Ágústu Selfoss-prestsfrú í gamla daga og þær sungu báðar eins og englar. Ég keypti dekurkörfu handa mömmu með baðbombum og kremum. Hún elskar allt slíkt, dekurrófan sú ...

Skelli inn mynd úr afmælinu mínu í fyrra þar sem mamma situr í sófanum (t.h.) með Eddu frænku við hlið sér. Vinstra megin er Beta sjúkraþjálfari og lengst til hægri er Gauja, vinkona og skólasystir, og systir Betu.

Athugasemdir

[Ásdís Sigurðardóttir, 5.5.2008 kl. 12:51]

Til hamingju með mömmu þína.  Ég er nú búsett á Selfossi og þetta er minn prestur. Trúi þessu illa upp á hann og bíð eftir nánari fregnum áður en ég segi nokkuð.  Allavegana eru mín kynni af honum þau að hann er einstaklega hlýr og umvefur allt í sínum kærleik og gleði.

[Hrafnhildur Ýr Vilbertsdóttir, 5.5.2008 kl. 12:57]

Til hamingju með mömmu þína....varðandi séra Gunnar, ég þekki af eigin raun hvernig svona mál ganga fyrir sig í kerfinu og segi bara það, að það leggur enginn heilvita manneskja það á sig að fara í erfiðar yfirheyrslur og málaferli nema rík ástæða sé til....yfirheyrslur yfir fórnarlömbum er óvægin og gengur mjög nærri fólki......eigðu góðan dag..

[Guðríður Haraldsdóttir, 5.5.2008 kl. 12:58]

Sammála þér, Ásdís, best að láta rétta aðila sjá um að rannsaka og kveða upp dóm.

[Guðríður Haraldsdóttir, 5.5.2008 kl. 13:01]

Einmitt, Hrafnhildur, held að stelpurnar séu ekki öfundsverðar, og enginn kærir að gamni sínu nema eitthvað mikið sé að. Held að það sé um 1% kæra sem reynast ekki vera á rökum reistar.

[Guðrún Jóhannesdóttir, 5.5.2008 kl. 13:10]

til hamingju með mömmuna þína og megi dagurinn vera þér ljúfur

[Þröstur Unnar, 5.5.2008 kl. 13:43]

Þessi lengst til venstre, er hún líka of ung til að binda sig?

Til hamingju með múttuna þína.

[Fjóla Æ., 5.5.2008 kl. 13:57]

Til hamingju með móður þína. Gott hjá þér að gefa henni dekur í dag. Hún á það svo sannarlega skilið.

Það er greinilegt að það skiptir máli hvort það sé séra Jón eða bara Jón í fjölmiðlaumfjöllun um viðkvæm mál.

[Guðríður Haraldsdóttir, 5.5.2008 kl. 14:14]

Heheh, Þröstur, þetta er hún Beta sjúkraþjálfari, hamingjusamlega gift og nokkurra barna móðir.  Sorrí, karlinn.

Held að mamma verði alsæl með dekrið, Fjóla. Hún elskar allt slíkt.

Megi dagurinn þinn líka verða ljúfur, Gunnsan mín.

[Brynja skordal, 5.5.2008 kl. 15:23]

Til hamingju með Mömmu þína æðisleg gjöf sem þú færir henni hafðu ljúfan dag elskuleg

[Steingerður Steinarsdóttir, 5.5.2008 kl. 16:07]

Mér finnst nú Gurrí mín að prestar eigi ekkert með að faðma og kyssa unglingsstúlkur í söfnuði þeirra. Ég myndi ekki kæra mig um það nema presturinn væri okkur persónulega kunnugur og sá sem færi að kássast þannig upp á mína dóttur með kraga og í hempu eður ei á mér að mæta.

[Guðríður Haraldsdóttir, 5.5.2008 kl. 16:21]

Já, sama segi ég, Steingerður almáttugur. Ég endursagði bara orð hans úr DV.

[Erna Friðriksdóttir, 5.5.2008 kl. 18:11]

Til hamingju með móður þína Gurrý, Oh það eru svo margir tengdir Hvammstanga sem eiga afmæli í dag :) Td systirdóttir mín,,,,, svo er stór prins þarna hjá þér á skaganum (sko ég er ömmusystirinn)    sem kemur fljótlega heim f. 3 maí :)

heyrðu minn maður var á Kjalarnesinu og smellti mnd af bílnum frá svefn og heilsa :(

Svona okkar, þá er bara eldri dóttir mín (24) sagði henni frá hugmynd okkar :)   Já mamma þú gerir þetta, láttu ekki svona he h he ehe,,,,,,,,  tala betur við hina og hef svo samband............ Bestu kveðjur til þín og auðvitað til Hildu.. Er hún kansi með síðu ????????

[Jóhanna Magnúsar- og Völudóttir , 5.5.2008 kl. 19:19]

Presturinn virðist vera mikill knúsari það er víst, kannski ekki og  eiginlega alls ekki passandi, sérstaklega þegar um ungar dömur er að ræða. Ég efast um að þarna sé um gróft ofbeldi að ræða eins og sumir láta það hljóma.  Mér finnst að fjölmiðlar hefðu átt að bíða með þetta þar til öll kurl væru komin til grafar.

Til hamingju með mömmu þína.

[Arafat í sparifötunum, 5.5.2008 kl. 20:10]

Til hamingju með mömmu þína, hún á sama afmælisdag og Tommi bróðir

 Magga mákona

[Tiger, 5.5.2008 kl. 20:29]

Innilegar hamingjuóskir með Móður þína Gurrí mín. Knús yfir á ykkur öll með óskum um góða nótt í himnaríki..