Leiðrétt kjaftasaga, heitar vöfflur og pínulítið bold

15.5.2008 | 18:03

Leiðrétt kjaftasaga, heitar vöfflur og pínulítið bold

Netið lá niðri í vinnunni eftir hádegi í dag og ég sem ætlaði að blogga í hádeginu. Splunkunýr Indverji var á Ártúnsstoppistöðinni í morgun og eitthvað grunsamlegt í gangi en nú er ég búin að steingleyma hvað það var.

Í hádeginu var farið að tala um kjaftasögur, margir starfsmenn hússins samankomnir í sólinni úti í porti. Handleggirnir á mér eru eins og undanrenna á litinn en ég bretti niður ermarnar þegar einn samstarfsmaðurinn sagði að það væri í tísku að vera hvítur. Held samt að hann hafi bara verið að gleðja mig en það glampaði samt óþægilega á handleggina, ég fékk ofbirtu í augun, svipað og þegar ég hef verið að horfa á SkjáEinn um kvöld og skjárinn verður mjallahvítur þegar auglýsingar eru kynntar inn.
Einn viskupúki staðarins veit bókstaflega allt sem er í gangi í þjóðfélaginu. Hann fór að tala um ráðherraskilnaðar- söguna og sagði hana algjört bull, verið væri að reyna að klekkja á viðkomandi, svona pólitískur viðbjóður ... eins og tíðkast víst í stjórnmálum þar sem reynt er að bregða fæti fyrir keppinauta um stjórnunarstöður og svona.

Ég fer mjög sjaldan í kaffi í vinnunni, tel mig ekki hafa gott af sætabrauði um miðjan dag, enda nóg af sætum strákum í vinnunni svo sem ... en í dag gerði ég undantekningu, það voru nefnilega heitar vöfflur með rifsberja- eða rabarbarasultu og rjóma. Biðröðin náði út upp í Europrís, eða hefði gert ef allir hefðu komið í einu.

Svo er alltaf sama stuðið í boldinu. Taylor orðin aðalhuggari ekkilsins Thorne sem veit ekki að það var hún sem ók drukkin á Dörlu. Donna, systir Brooke, er farin að sitja fyrir í Beði Brooke, tískulínunni kynþokkafullu og til að spara leikarakostnað tekur Ridge ljósmyndirnar af henni, ásamt því að hanna fötin. Þau eru hættulega innileg, svona miðað við að í framtíðinni eru miklar líkur á því að hún verði stjúpmóðir hans.

Meginflokkur: Bloggar | Aukaflokkar: Matur og drykkur, Sjónvarp, Stjórnmál og samfélag | Facebook

Athugasemdir

Síðan þú impraðir á þessu með ráðherraskilnaðinn er ég búin að heyra þetta úr ótrúlegustu áttum. Vona svo sannarlega að þetta sé bull. Á einum stað var mér meira að segja sagt hver væri nýji maðurinn. Knús

Ásdís Sigurðardóttir, 15.5.2008 kl. 18:11

he he he er þetta ekki sem koma skal ?

Erna Friðriksdóttir, 15.5.2008 kl. 18:59

Það væri nú varla skandall þó ráðherrar skilji. Ég meina everybody is doing it.

Jenný Anna Baldursdóttir, 15.5.2008 kl. 19:02

Sammála, Jenný, en það eru víst margar sögur í kringum þetta og þær eflaust skaðlegri en eitt stykki skilnaður. Ég vildi alla vega leggja mitt af mörkum til að leiðrétta þetta, trúi nefnilega leiðréttaranum mínum, hann veit bókstaflega ALLT! Enda vinnur hann við það.

Jú, Erna, ég held það!

Guðríður Hrefna Haraldsdóttir, 15.5.2008 kl. 19:07

Well, ég hefði nú frekar viljað kanelsnúða með kaffinu - en heitar vöfflur með rjóma og súkkulaði gætu þó líka gert kraftaverk. Leiðréttarar eru af hinu góða.. knús í kvöldið þitt Gurrí mín.